DD
*6th Dec 2020 Chanchin Thar (DDNEWS)*
Governors Message on Armed Forces FlagDay :
Mizoram Governor P. S. Sreedharan Pillai chuan Mizoram Chief Minster lo ni tawh pathum te chu Sipaia tang tawh an ni a , hei hian India ram venhimna kawngah Mizo mipuite thawhhlawk zia a ti lang chiang hle a ni a ti.
He thu hi naktuk, Dec ni 7 a Armed Forces Flag Day lo awm tur pual a thuchah ah Governor chuan sipaite chu mipuite venghimtu leh thlamuantu an ni a ti a. Armed Forces Flag Day-ah hian Army, Navy leh Air Force a thawk, nula leh tlangval huaisen te, kan ram ropui tak venghim tura nuna hlantute inpekna te hre thar leh turin mipui a chah a ni.
Armed Forces Flag Day hi kum tin December ni 7 ah, rampum huapa hman thin a ni a. Ram venhim hna thawktu sipai service lai te leh nunna chan ta te chawimawina leh zahna lantirna ni a ni.
//////////////////////////
Phaizau MNF Unit sends apology for their illegal fishing:
Tut lui, jeletine hmanga Bomb chungchangah Phaizau MNF Unit hruaituten ziakin ngaihdam an dil.
VC leh All NGO Joint Committee Phaizau ten thuchhuah anlo neih tawh angin, Tut lui dung an humhalh chhungah Phaizau MNF unit hruaitu ,Bialtu MLA leh Block hruaituten November ni 21 a jeletine (bomb) hmanga sangha an vawm chungchanga Phaizau khua hmuhsitna leh thamlohnaa ngaia thu anlo chhuah tawh angin. Phaizau MNF unit hruaitute chuan ziakin NGO hnenah ngaihdam an dil bakah, an chawitur zat cheng 10000 chu hun tiam a ral hmaa an pek thu, VCP Pu Lalramvulmawia Pachuau chuan a sawi a. Ngaihdam dilna lehkha leh pawisa chawi tur an pek hnuah erawh NGO te pawhin boruak tha a awm theih nan an ngawih rih tawh thu sawiin, boruak thalo awm zui zel lo tura an duhthu a sawi bawk.
///////////////////////
More covid recovery than positive case within a week in Mizoram:
Tun kar kalta chhung khan Mizoramah Covid 19 kai aiin enkawl dam an tam zawk a, hri vei tawh atanga dam zat hi Zaa 94.25% a ni.
Kar Kalta Pathian ni atanga tukin tleng khan Mizoramah hri kai thar 128 an awm a, hetih chhung hian Mizoram hmun hrang hrangah hri kai enkawl dam 273 an awm thunga , hri kai thar aiin enkawl dam hi 145 in an tam zawk a ni. Nimin lam khan Mizoramah hri kai thar 21 hmuh belh an ni a. Heng hri kai thar te hi ZMC atanga hmuhchhuah mi 5, BSF mi leh sa vek , True Nat laboratory atangin mi 4 , Melte , Chhingchhip, Lunglei leh Kolasib atangin 1 theuh leh Rapid Antigen Test hmangin Aizawl ami 2, Lunglei mi 2 leh Lawngtlai mi 8, an vaiin mi 12 an ni.
Heti hian tun dinhmunah Mizorama Covid 19 kai tawh zawng zawng chu 3934 a ni a, mi 3708 enkawl dam tawh niin , hri kai enkawl lai 220 an awm mek a ni.
///////////////////////
ASEP awarded Balipara Foundation Award 2020:
Eastern Himalayan Range huam chhunga ramngaw leh nungcha humhalhna kawnga thawk \hate lawmman Balipara Foundation Award dawng thei zingah Association for Environmental Preservation (ASEP) a tel.
Balipara Foundation Award
hi an Headquarters awmna Guwahati, Assam-ah kum tin sem thin a ni a, khawvel hmun hrang hrang a\angin environmentalist ropui tak takte an fuankhawm \hin a ni. Kuminah
erawh hripui avangin biakhmuhtheihna kaltlangin he hun hi December ni hnih atang khan hman tan a ni a, Nimina lawmman semnaah Association for Environmental Preservation (ASEP ) chuan lawmman an dawng a. Mizoram aiawhin Chief Minister Pu Zoramthanga leh ASEP President Pu K. Lalmuansanga ten thu an sawi a ni.
///////////////////
Saihapui V asks Govt to prioritize development for their village:
Saihapui V VCP chuan an mipui te'n, ram tana chan reng chu hrehawm an tih tawh thu sawiin, Mizoram sawrkarin an khaw hmasawnna tur ngaipawimawh sak se a duh thu a sawi.
Nimin khan Kolasib Dist MJA ten Vairengte leh Saihapui V , ramria dutyna hmun te an tlawh a. He hunah hian MJA te chuan Vairengte ah hian BSF awmna tur in thenkhat sak ni mahse in thenkhat sak zawh a la ni lova, Assam lam erawhin SSB an dahna hmun chu Border Outpost tur anga cheibawl nghalin, In engemaw zat an sa tawh tih an sawi . Hetih lai hian Saihapui V khaw mipui ten ram humhalh nana an chan mek laiin Assam Sawrkar chuan Saihapui V khaw mipui te chu hmasawnna hna thawh sakah an thlem reng bawk avangin , Mizoram sawrkar chuan an khaw hmasawnna chu ngaihpawimawh sak se a duh thu VCP Pu Vanlalzona chuan a sawi a ni. Tun dinhmunah ramri ah boruak a ralmuangin a zalen a, lehlam leh lamah Border duty te an awm mek a ni.
//////////////////////////
55kg Marijuana seized by Serchhip Police:
Myanmar lam atanga phurh luh Ganja kg 55 chuang leh, a phur tu mi pahnih chu Zirtawp zan khan Serchhip Sailiam kawn a Police duty ten an man.
Zirtawp zan dar 11:30 vel khan Serchhip Sailiam kawn a Police duty te hian khawchhak lam atanga Truck lo lut pakhat atangin Ganja thahnem tak an man a. Ganja phurtu Lirthei hian a thingzai phurh hnuaiah Ganja te hi a thukru a ni. Tun hnaiah DIG Eastern range leh Serchhip SP te ruahman anga khawchhak lam a\anga lirthei lo kal rinhlehawmte endik zel tawh tura tih an nih angin Serchhip Police duty ASI Michael Lalremsanga leh Constable Malsawmtluanga te chuan zirtawp zan khan lirthei hi anlo endik a. Lirthei ah hian a neitu Vanlalbiaka kum 23, Hnahlan khua leh a khalhtu Lawmsangliana kum 22 Hnahlan khua tuna Bawngkawn Chhimveng a awm mek nia insawi te chu an chuang a, an Ganja phurhte chu Myanmar lam mi ta a nih thu sawiin, Vanzau peng ah an hmelhriatloh mi pahnih in an rawn dah niin an sawi a. Ganja phurtute lakah hian Serchhip Police Station ah thubuai ziahluh a ni a , Gaja nman te hi tualchhunga a hralhna rate chuan cheng Nuai 2 leh Sing 7 hu a ni.
/////////////////////
Adhaar enrollment slow due to defective equipment in Lunglei:
Adhaar Enrolment Agency DC Office Lungleia thawktute chuan hun engemaw chen an khawl thenkhatin hna a thawh theihloh avangin Adhaar Card siam hna an thawh chak theih loh thu an sawi.
Thawktute chuan Adhaar Card siamna khawl an neih zinga a tam zawk chu hun engemaw chen an hman mumal theih tawh loh avanga anmahni pantu mipuite'n harsatna an neih thin thu an sawi a, hetiang a nih avang hian ni khatah thla 30 bak an la thei rih lo tih sawiin, mi tam tak Ration Card leh Adhaar card-a an nihna tarlan dan in mil lo leh an Document danga an nihna tarlan dan in mil lo awm thin chu an harsatna a nih thu an sawi a, hei vang hian Adhaar Card siamthat tir an tam thu sawiin, mipuite fimkhur tura an duh thu an sawi bawk.
//////////////
Tlabung 11kv powerline repair:
Tlabung power house atanga kawlphetha pekchhuahna hrui pui, nimin tlai lam dar 4 vela thing tluin a vuak vanga a ban chawpa tlu chu vawiin khan khawtlang huap hnatlang kohin siam a ni.
Nimin tlai khan, Tlabung khaw chhungah mi thenkhatin an kih, teak thing tluin 11kv line a vuak vangin, khaw chhunga kawlphetha pekchhuahna chu a ban chawpin a tlu a, YMA : Tlabung branch huaihawtin vawiin khan kawlphetha hrui thlunna tur ban phun thain mi tlawmngaite an thawkchhuak a ni. Vawiina hnatlangah hian veng hrang hrang atangin mi tlawmngai mi 130 bawr vel thawkchhuakin, Tlabunga Power & Electricity department-a thawktute nen kawlphetha ban leh hrui chhia siam a ni a, P&E department-in hnatlanga thawk chhuak mi tlawmngaite ei leh in an tum a ni.
/////////////////
Tlabung-Serhuan Ferry service to begin soon:
Tlabunga Public Works Department leh Tlabung Village Council tangkawp hmalaknain, Tlabung leh a ral lehlama awm Serhuan inkarah a mamawh apiangte hman theih tur lawngleng veivahtir a ni dawn.
Harsatna hrang hrang vangin, Tlabung leh Serhuan inkara mihring thiarkaia kartawn thin lawngleng chu tihtawp a lo ni tawh a, thlai chinna huan pan tur leh, thil tul dang vanga tuipui kan ngaiten harsatna an tawh phah fo tawh thin avangin, Tlabung VC-te chuan Pu C Laldintluanga, EE (PWD) chu he harsatna sutkiansak tur hian an lo ngen tawh a ni.
Tlabung PWD EE-in a lo hrilh anga Tlabung leh Serhuan inkara veivakte thiar kaitu tur lawngleng chu Tlabung VC-ten an zawn hmuh hnu-ah, nimin khan Tlabung thlenpui a ni a, lawngleng man Cheng 25,000 bakah Tlabung thlenpuina atana senso dang chu Pu C Laldintluanga hian a tum nghal a ni. Lawngleng buaipui tur hian, a hranpain a enkawltu rawih a ni dawn a, hemi atana sen ngai zawng zawng chu Tlabung VC-in a tum thung dawn a ni.
////////////////
UPC Lunglei District Missions Conference:
UPC North East India hnuaia Lunglei District Missions Conference vawi 46-na rorel inkhawm chu Venglai Biak inah Director Rev.R.Vanlalenga kaihhruainain tluang taka neih a ni.
He Conference hian kum 2021 - 2022 atan Home Missions Field pasarih (7) hawn leh ni se an ti a, kum 2022 District Missions Conference nan Pukpui an ruat bawk. Report bu a alan danin Lunglei District Missions Department hnuaiah hian Missions Field pasarih awm mekin, heng Missions field-te hi Home Missionary ten an thutchilh a, report hun chhung hian mi thar 46 sengluh a ni. Rorel inkhawm neih chhung hian Home Missionary-te hnenah Lunglei District L.A.D, Headquarters bial L.A.D., Rahsiveng bial L.A.D. leh Pukpui bial L.A.D. te bakah a thlengtu Venglai Local L.A.D. ten thilpek an hlan a ni.
//////////////////////
Bible Sunday:
Vawiin hi khawvel puma Kohhran tamzawk ten Bible Pathianni atana an hman thin a ni a, hripui leng avangin kum dang anga hman a ni lo.
December Pathianni hmasaber hi kohhran tamzawk chuan Bible Sunday pual atan an hmang \hin a. Mizoramah pawh kumtin hman \hin a ni a, Kohhran pawl hrang hrang ten he ni pual hian thupui zir tur siamin Bible Society rawngbawlna atan thawhlawm an thawh thin a ni. Kuminah erawh Hripui vangin kumdang anga hman theih ani lo nachungin Tualchhung Kohhran ten Bible Sunday pual thawhlawm hi tualchhung sum a\anga thawhin Bible Society of India, Aizawl Auxiliary ah an thehlut dawn a ni.
//////////////////////
Nation pays homage to Bharat Ratna Dr BR Ambedkar on his 64th Mahaparinirvan Diwas
Dr BR Ambedkar-a thihchampha vawi 64-na rampumah hman a ni a, Prime Minister Narendra Modi chuan Babasaheb-a ngaihtuahna leh duhthusamte chuan tun thlengin mi tam takte hnenah chakna a pe chhunzawm zel a ni, a ti.
He ni pual hian ramchhung hmun hrang hrangah hun hman a ni a, ram hruaitu engemawzatin Parliament House tualzawla a lim siamah zahna an lantir a ni. Prime Minister Modi chuan Ambedkar-a duhthusam tipuitling tura theihtawp an chhuah thu a sawi a, a ngaihtuahna leh duhthusamten tun thlengin mi tam takte hnenah chakna a la pek chhunzawm zel thu twitter kaltlangin a sawi.
Dr Ambedkar hi ram danpui duanna kawnga a sulsutu pawimawh berte zinga mi a ni a, hnam hnuaihnung Harijan chhungkua atanga seilian a ni a. Hnam hrang hrangte intluktlanna tura hmalatu leh hmeichhiate dikna chanvo humhalhtu langsar tak a ni.
///////
COVID-19 recovery rate improves to 94.37 per cent in the country
Rampumah Covid-19 vei dam tam lam chu zaah 94.37 a tling.
A zawna ni 9 na turin hri vei enkawl dam tam lamin hri kai hmuhchhuah a khum a, hri vei enkawl dam zat hi hri vei enkawl lai aiin a let 22 a tam tawh zawkin, tun dinhmunah enkawl dam nuai 91 chuang an awm tawh a. Enkawl lai nuai 4, sing 30,248 an awm mek bawk.
Darkar 24 chhungin hri kai sing 3 chuang hret hmuhchhuah a ni a, hri vei sing 4 sang 2 vel enkawl dam an ni a, thi 482 an awm bawk.
Rampumah sample vbc 14 leh nuai 70 endik a ni tawh a, nikhata sample nuai 15 endik hman a nih theih nan sorkarlaipui leh ICMR chu an thawkdun a ni. Tun dinhmunah laboratory 20,205 a awm mek a, nimin khan sample nuai 11 chuang endik niin, WHO in nikhata endik tur a bithliah zat aia a let ngaa tam endik ziah ang a ni.
///////
Govt asks private TV channels to follow ASCI guidelines for advertisements
Sorkarlaipui chuan private tv channel te chu advertisement an tihchhuahah Advertising Standards Council of India (ASCI) zawm turin a hriattir.
Information and Broadcasting Ministry chuan Ministry of Consumer Affairs, ASCI, News Broadcasters Association leh sorkar hnuaia pawl hrang hrangte nen advertisement chungchang an sawiho hnuah private tv channel te chu online gaming leh a kaihhnawih fakna dang an tihchhuahah dan phal loh engthil mah palzut lo tur leh ngaihnepna lam hawi tilang lo turin a hriattir. ASCI in kaihhruaina a duanah hian online gaming fakna hrang hrangah disclaimer zaa 20 tal tihlan tel a ngai a ni.
//////
PM Modi to lay foundation stone of new proposed Parliament Building in New Delhi on December 10
Prime Minister Narendra Modi chuan December ni 10-ah Parliament Building, New Delhi-a sakna tur lungphum a phum dawn.
Lok Sabha Speaker Om Birla chuan building thar hi kum 100 lo la awm tur ngaihtuah chunga sak a nih tur thu a sawi a, a sak nan cheng vbc 971 ruahman a nih thu leh Committee Room leh Political Party office siam belh a nih tur thu a sawi bawk. Parliament building sak thar tur hi a hlui aiin sq metre 17,000 laiin a lian dawn a, kum 2022 a peihfel hman beisei a ni.
//////
Farmer leaders to meet govt representatives on Wednesday for 6th round of talks
Loneitu lungawilote leh sorkar aiawhte karleh Nilaini-ah a tum 6 nan New Delhi-ah an inbe dawn.
Agriculture Minister Narendra Singh Tomar chuan Minimum Support Price (MSP) hman chhunzawm a nih tur thu a sawi a, loneituten an lungawilohna an tawpsan vat a beisei thu sawiin, an ham thatna ber turin sorkarin hma a lak zel tur thu leh Narendra Modi-a kaihhruai sorkarah an rinna nghat ngam turin a ngen bawk.
Puan tawh angin loneitute hamthatna tura sorkarlaipuiin dan thar a siam - Farm Law- zinga pathum duhloh avanga lungawilohna lantir mek, loneitute hi sorkar nen tum 5 an inbe tawh a, siamrem ngai engemawzat an siamtha tawh a ni.
////////
Haryana Health Minister Anil Vij, who participated in COVID vaccine trial, tests positive
Covid-19 vaccine enchhinna atana inpe Haryana Health Minister Anil Vij chuan Covid-19 a kai tih hmuhchhuah a ni.
Haryana Health Minister Vij hi nimin khan damdawiinah dahluh a ni a, doctorte chuan a dinhmun a that thu an sawi. Vij hi Covaxin enchhinna atan a inpe a, a dose hmasa ber chu tunhnai khan pek a ni. Vaccine siamchhuaktu Bharat Biotech chuan ni 28 inkar danah dose hi tum 2 lak tur a nih thu an sawi a, vaccine enchhinna hian a tlem berah ni 42 chhung a awh dawn a ni.
///////