DD
🌐🌐🌐🌐
Chanchinthar DD News: 18th November 2020 (Nilai Ni)
Health Minister chaired review meeting of Covid19:
Mizorama COVID-19 hri leng dinhmun thlirhona neih ah Special Contact Tracing team ten hri kai hnu chhui harsa zual 102 zinga 41 chu an chhui chhuak tawh tih an tarlang.
Health Minister Dr. R. Lalthangliana hova Meeting-ah hian, tunhnaia Aizawl khawpui lockdown leh Mizoram puma COVID-19 No Tolerance Drive kalpui mek thlirho a ni a, Integrated Disease Surveillance Programme (IDSP), Health department report danin COVID-19 positive enkawl mek zingah Civil mi 461 an awm a. Heng zingah hian, Mizoram police, Bihar-a election duty kal haw 61 chhiar tel an ni a. Fronline Workers 14 leh Central Armed Police Forces (BRO chhiar telin) 29 an ni. Contact Tracing team chuan October hma a positive hmuhchhuah zinga za-a 15 chu taksa a natna langchhuak an nih thu an sawi a, October khan Za-a 40 ah kaiin, lockdown atanga nimin thlengin za-a 36 a nih thu an tarlang bawk. Contact tracing team indaih loh avangin, hri kaina chhui harsa zualte umzui tur Special Contact Tracing team din a ni a, an ni hian November ni 7 atang khan hma la tanin, chhui harsa zual 102 zinga 41 chu an chhui chhuak tawh a ni.
Meeting-ah hian Medical Operational Team Chairman Dr. ZR Thiamsanga, MLA, Chief Secretary Pu Lalnunmawia Chuango bakah DM&R, Home, Health department hotulian te leh Aizawl DC bakah Contact Tracing Team leh Indian Medical Association aiawh te an tel a ni.
//////////
Mizoram recovery rate of Covid case rises to 85.37%
Mizoramah Covid 19 hri vei, dam tam lam chu za-a 85.60 a tling tawh.
Mizoramah, Covid19 positive 3481 zingah, mi 2980 enkawl dam tawh an ni a; heti hian, hri kai enkawl lai mi 496 an awm mek a ni.
Nimin khan, ZMC RT-PCR laboratory-ah COVID19 positive 18 hmuhchhuah a ni a, District hrang hrang TrueNAT laboratory-a sample test zingah COVID-19 positive hmuhchhuah thar 6 an awm a. Rapid Antigen Test hmanga COVID-19 positive hmuhchhuah thar 13 an awm thung. Hetih lai hian, Vawiin khan Covid19 enkawlna hmun atangin, mi 8 an chhuak thei a ni.
///////////////
Revenue Minister & Local Council Meeting:
Revenue Minister Pu Lalruatkima hova thukhawm chuan, kum 2019-2020 chhungin State sorkarin Revenue Deptt chhiah hmuh tur a bituk zat hmuh kim a la ni lo tih a tarlang.
Revenue Minister ho hian, vawiin khan Revenue official te leh Aizawl City Local Council Association hruaitute chuan Covid 19 hripui inkhuahkhirhna avanga Land Revenue chhiah leh Zoram chhiah khawn kalpui dan tur leh harsatna awm thei chungchang sawiho in; Thingtlang khaw țhenkhatte leh Aizawl veng thenkhatah, hripui avanga Revenue Deptt. Chhiah khawntute luh theih lohna avangin kum 2019-2020 chhunga Leiman chhiah leh Mizorama awm man Zoram Chhiah khawn a khaih lak fo tih an tarlang a. Chhiah khawnah Arrear Tax leh fine te laka hriatthiamna nei chunga a khawn hun chhung pawhsei a ni chungin, chhiah a lut țha lo tih an tarlang tel a.
Meeting hian, Mizoram pum huapa Land Revenue chhiah leh Zoram chhiah khawn hun pawhsei leh ni se tiin a rel a. Covid-19 laka dan dinglai, țha taka zawma chhiah khawn chhunzawm leh nise tiin, December ni 7 atanga khawn chhunzawm leh anih theih nan Aizawl AMC area a Local Council te leh VC hrang hrangte puihna nen, chhiah khawn chhunzawm ni se, mipuite pawh chhiah ţha taka lo pe tura ngen nise tih rel a ni bawk.
////////
Lok Sabha MP visits Model village-Damparengpui
Lok Sabha MP, Pu C Lalrosanga'n Model village atan, scheme hranpa awmlo mah se, Centrally sponsored scheme hmangin, a theih ang chinah hmasawnna tur atan hmalak tum a ni ati.
Model Village atana thlan, Damparengpui a tlawhna ah he thu hi sawiin; Lok Sabha MP chuan, Sawrkar laipuiin SAGY hnuaiah model village atana thlan bik a neih zingah, Damparengpui chu khaw dangte tana kawng hrang hranga entawn tlak ni tura chahin; Kawng hrang hranga, hmasawnna ruangam tha tak din tum a nih avangin, khaw mipui te pawh an rilru in puahchah turin a sawm a. MLA leh sawrkar department hrang hrangte nen ṭangkawpin, hma lak a ni dawn tih MP chuan a sawi bakah, Damparengpui chu ramri dep a nih avangin BRO ten kawngpui an enkawl mek hi chak zawka thawh a nih theih nan Union Defence hnenah pawh a ngaih pawimawh thu ziakin a lo thlen tawh tih a sawi bawk.
Hetihlai hian, Rajya Sabha MP Pu K.Vanlalvena chuan vawiin khan Lawngtlai a MNF Party Office tlawhin, Sorkarin, Chhimlam hmasawnna turin ruahmanna hrang hrang a kalpui mek tih a sawia; Lawngtlai District chhimthlang lam, Chamdur phairuam pawh innghahna tlaka siamtumin ruahmanna siam a ni a ti a, Kaladan Multi Modal Transit Transport Project hnuaia Myanmar ram pawh tura kawngpui sial pawh a hlawhtlin theih nan hmalakna kalpui reng a nih avangin, hna pawh an tan leh thuai dawn a ni a ti bawk.
////////////
Agriculture Minister ATMA meeting:
Agriculture Minister Pu C. Lalrinsanga'n Agricultural Technology Management Agency (ATMA) leh KVK kaltlang a loneitute zirtirnaah Tlangram lonei mite chhawr tangkai theih tur zawn a pawimawh thu a sawi.
Meeting ah hian, kum 2019-20 leh 2020-21 chhunga ATMA hnathawhte, an hmalakna leh hmachhawp te, kuthnathawktuten District hrang hranga harsatna an tawhte leh AgricultureTechnology hmanga heng an harsatnate hi sutkian dan tur sawiho a ni a; Mizorama Kuthnathawktuten State chhung mai nilo, State pawn lam thlenga Market linkage an neih theih dan turte sawiho a ni bawk. Hei bakah hian, State Agricultural Management and Extension Training Institute (SAMETI) hnathawh dan leh ruahman te meeting ah hian sawi ho tel niin, awmze nei zawk a skill development training programme kalpui chhoh dan tur leh Agri & allied Graduate te tana mahni a bul tan theih tura chherna scheme Agri Clinics & Agri Businness Centre (AC&ABC) kalpui dan turte sawiho a ni.
//////////////
Political party candidates confirmed for LADC upcoming election:
December ni 4-a Member 25 awmna, Lai Autonomous District Council (LADC) inthlanpui neih tur chu kilthum atangin BJP, INC leh MNF ten an chuh dawn tih a chiang tawh.
MNF leh Congress ten an Party Candidate tur te an puanfel hnu ah, vawiin khan BJP chuan bial 17 a an Party Candidate tur te an puang a; LADC a Chief Executive Member nilai Pu T.Zakunga chu a bial ngai Vawmbuk bial ah a ding dawn a, Congress Party atanga BJP zawmtu MDC dang paruk te pawh an bial ngai ah theuh an ding dawn a ni.
Heti hian, tun dinhmunah, LADC inthlanpui hi kilthum atangin, bial engemawzatah, Political Party pathumte an inbei dawn a; MNF Party hian Bial 25 a an candidate turte tifel tawhin, INC-in bial 15 bak ah Independent an puihna tur bial thum an puangfel tawh a, vawiin khan BJP hian bial 17 a an Candidate tur an puang ve thung a ni.
Heih lai hian, Sports Minister Pu Robert Romawia Royte chuan LADC inthlanna neih turah, MNF party in chakna an chan ngei a beisei tih sawiin MNF party zawm thar mi 97 chu Chawnh-ah vawiin khan a lawm lut nghal bawk. Sports Minister chuan, Lawngtlai District hmasawn nan Development Engine 3 - District Council sorkar, State sorkar leh Central NDA sorkar te kan tangho dawn a ni a ti.
//////////
MPCC lodged complaint against Speaker to EC
MPCC Vigilance Dept-in, Assembly Speaker Pu Lalrinliana Sailo chuan LADC huam chhung khaw hrang hrang a tlawh kualna ah, Election model code of conduct rules a bawhchhia ni an hriat avangin, State Election Commission hnenah complain an thehlut.
He lehkha ah hian, Speaker leh MNF Hqrs hruaitu ṭhenkhatte chuan vawiin khan Lawngtlaiah, Public Leader te kokhawmin, Speaker hian Meeting a neihpui a, hei hi Election Model Code of Conduct Rules bawhchhiatna ni ngeia hriain, Pu Lalhruaitluanga Bawihtlung, MPCC Vigilance Secretary chuan a ṭul anga hma la turin SEC a ngen a. SEC chuan Lawngtlai DC hnenah he thu hi a thawn nghal tur thu a lo sawi a ni. MPCC Vigilance Dept Secy chuan Speaker te hi a lai taka awm tur leh Party mi an nihna ti lang lo tura ngaih an nih laia, thla thar ni 4-a LADC inthlan neih tura Party hruaitu engemaw zat hruaia meeting a neihpui hi a pawiin, Speaker zahawmna tih bawrhbanna ni hiala a hriat thu leh Election Model Code of Conduct Rules bawhchhiatna ni ngei a hriat thu a sawi.
///////////
N.Vanlaiphai VC election vote recount held:
N.Vanlaiphai VC election neih zawh taka thil felhlel awm ni a hriat avangin, vawiin khan vote tla te chhiar that leh a ni.
Serchhip District N.Vanlaiphai khua a Independent Candidate 4, INC Candidate 1 leh ZPM Candidate mi 4 bakah Agent 6, te chuan, Kumin August ni 27-a VC thlanna neih zawh taka Vote chhiar chungchang ah thil fello a awm ni a an hriat avangin, an hming ziakin SEC-ah Complain an thehlut ta a ni.
Hemi chungchangah hian vawiin khan Serchhip DC Conference Hall ah Pu C.Lalchuangkima, Chairman, Election Tribunal chuan hearing neiin; Complaint tu te leh Official atangin an thusawi ngaihthlak a nih hnu ah Vote chhiar that lehnghal a ni. Election Tribunal atang hian Chairman bakah Member Secretary, Pu Vanlalrova, Jt Dir.SYS Dept leh Member dang Pu Malsawmtluanga Project Director DRDA, Serchhip te an thu a ni. Hearing leh Vote chhiar thatna neihna ah hian, he inthlana Returning Officer Pu Lalchhanhima SDEO, N.Vanlaiphai leh Official te bakah Complain thehluttu leh an aiawh te an tel a, Chanchinthar buatsaih lai hian Vote hi chhiar zawh a la ni lo.
///////////
India, US reiterate their firm commitment to strategic partnership
India leh US ten Indo-Pacific huamchhunga hmalak kawngah thawhdun zel an remti.
Prime Minister Narendra Modi chuan vawiin khan biakhlatna hmangin US President atana thlan tlin, Joe Biden nen Covid-19 chungchangte, sik leh sa inthlak danglam leh Indo-Pacific huamchhunga hmalak zel dan turte sawi dun a, India leh US inlaichinna tihngheh zel an remti a ni. Prime Minister chuan Joe Biden leh US Vice President atana thlan tlin, India thisen kai, Kamala Harris chu lawmpuina a hlan bawk.
////////
COVID-19 recovery rate reaches around 93.52 pct in country
India-ah Covid-19 hri vei nuai 83 chuang enkawl dam an ni tawh a, dam tam lam hi zaah 93.52 a ni.
Darkar 24 chhungin hri vei 44,000 chuang enkawl dam an ni a, hri kai 38,617 hmuhchhuah niin, thi 474 an awm bawk. Rampumah mi nuai 89 chuangin hri an vei tawh a, heng zinga nuai 83,35,000 chu enkawl dam ni tawhin, hri vei nuai 1,30,993 an thi tawh bawk a, thi zat hi zaah 1.47 a ni.
///////
Over 25 lakh applications received under PM-SVANidhi scheme
Pradhan Mantri Street Vendor’s Atma-Nirbhar Nidhi scheme hnuaiah loan dilna nuai 25 chuang thehluh a ni tawh.
Hrileng mekah kawngkama dawrte hawngte tanpuina tura loan dil theihna PM-SVANidhi scheme hnuaiah loan dilna nuai 25 thehluh tawh a ni a, heng zinga nuai 1,87,000 chu semchhuah tawh a ni. Dik leh felfai zawka he scheme hi kalpui a nih theih nan mobile app leh web portal te hman a ni.
///////
Four-day celebrations of Chhath Puja begin today
Ni 4 awh tur Chhath puja chu vawiin atangin ramchhung hmun thenkhatah lawm a ni.
Hindu te kut pakhat, Ni pathian hnena lawmthu sawina, Chhat Puja hi Inrinni thleng lawm a ni dawn a, Bihar, Uttar Pradesh, Jharkhand leh Nepal hmun thenkhatah uar taka hman thin a ni.
///////
BRICS nations adopt new counter-terrorism strategy to effectively deal with the menace
BRICS ramten firfiaka chetna do kawngah hma thar an la dawn.
Ram 5 inzawmkhawm BRICS summit tum 12 chu nimin khan Russia-ah neih a ni a, he hunah hian firfiaka chetna leh mifirfiakte do kawnga hma thar lak rel a ni. BRICS ramte chuan firfiaka chetna chu dan bawhchhiatna lian tak, mihringte zalenna leh dikna chanvo rahbehna, remna leh venhimna tih derthawnna a nih thu an sawi a. Mifirfiakten kawng hrang hranga tanpuina an dawn thin titawp tura thawhho an rel bawk.
////////
China prepared to cooperate with India on COVID-19 vaccine: President Xi Jinping
China chuan Covid-19 vaccine siamchhuah kawngah India thawhpui a inpeih.
BRICS summit neih mekah China President Xi Jinping chuan Covid-19 vaccine enchhinna, thawhthumna neih mekah China Company ten Russia leh Brazil an thawhpui thu a sawi a, vaccine siamchhuah kawngah South Africa leh India thawhpui tura a inbuatsaih thu a sawi bawk. President Xi chuan vaccine siamchhuah leh enchhin kawngah te leh a tuldangah BRICS ramte thawhpui a inpeih reng thu a sawi bawk.
///////
Japan & Australia sign landmark defence deal to counter China's growing influence in South China Sea
Japan leh Australia ten South China Sea-a China chetlakna dodal turin inremna an ziak.
Japan Prime Minister Yoshihide Suga leh Australia Prime Minister Scott Morrison chuan China in South China Sea a vai deuh thawa pumbilh a tumna leh a thuneihna hnuaia Pacific thliarkar ramte dah a tumna dodal turin inremna an ziak a, inremnaah hian ram pahnih lawng sipaite intlawh tawnna leh tuipui venhimna kawnga thawhdunna turte a tel a ni. Ram pahnihte hian South China Sea status quo thlak tumna engpawh an dodal thu an tarlang.
/////////////
Chanchinthar DD News: 18th November 2020 (Nilai Ni)