DD
15th November 2020, Pathianni Chanchinthar DD News
Assam atanga Mizoram luhna kawng dan hawn a nih leh hnuah dan pangaiin lirthei an tlan leh mek a, tun thlengin ei leh barah Mizoramin harsatna a tawk lo.
Ramri buai avanga Assam lam miten National Highway 306 an dan avangin Vairengte a lo lut tur lirthei engemawzat chu Assam lamah hun engemawchen dan a ni a, tunkar ningani, November ni 11 zan dar 6:30 atang khan kawng dan hi tihtawp niin, Mizoramah luhtir leh tan a ni.
Sorkar thuchhuah tarlan danin, vawiin tlai dar 4 thleng khan Assam atanga Vairengte Gate patlangin lirthei 2890 a rawn lut tawh a, an zingah hian tuialhthei phur 138, eirawngbawlna gar phur 110 a tel a, hei bakah hian lirthei te 576 a tel bawk.
/////////
Kar khat chhungin Mizoramah Covid 19 hri vei dam 255 an awm a, hri kai hmuhchhuah 302 an awm thung.
Pathianni kalta atanga nimin Inrinni, ni 7 chhungin Mizoramah mi 7091 te sample endik a ni a, heng zinga 302 chuan hri an kai a, nimin bikah hri kai thar 25 an awm bawk. Kar khat chhung hian hri vei enkawl dam 220 te dam taka chhuahtir an ni a, vawiin ah mi 35 chhuahtir leh niin, Pathianni kalta atanga vawiin thlengin mi 255 chhuahtir an ni. Hetih lai hian nizan dar 11:30 khan Covid 19 hri vei ZMC-a enkawl lai, kum 34 mi, Dr. Lalnuntluanga, Durtlang chu a thi a, vawiin chawhma khan vuiliam a ni a, Mizoramah hri thihpui palina a ni.
Kar khat chhung hian Bihar inthlana Mizo police duty lo haw zinga 53 hri kai hmuhchhuah an awm a, Staines’ Memorial School Hostel, Chanmari-ah mi 32 hri kai hmuhchhuah an awm bawk a, Dinthar, Aizawlah kai thar 25 an awm bawk.
Nimin bikah hri kai 25 hmuhchhuah a awm a, hri kai hmuhchhuahte hi ZMC RT-PCR khawla endik 341 atangin mi 20, Rapid Antigen Test a endik 152 zinga 4 leh TrueNAT khawl hmanga endik 84 zingah 1 in hri an kai a ni.
Hri kai hmuchhuah thar 25 te hi mipa 20 leh hmeichhia 5, kum 12 atanga kum 62 inkar an ni a, an zinga a tam zawk mi 16 chu Aizawl, Lawngtlai leh Lunglei a hmuhchhuah, tualchhunga hri inkaichhawng an ni a, state pawn atanga lo lut mi 9, Aizawla hmuhchhuah 8 leh Serchhipa hmuhchhuah 1 an ni.
Heti hian tun dinhmunah hri vei enkawl lai 534 an la awm mek a, hri vei tawh zawng zawng 3393 zinga 2855 enkawl dam an ni tawh a, dam tam lam hi za zela 86.14 a ni.
///////////////////
Mizorama tuialhthei dahkhawlna awm chhun, IOC Oil-Depot Vairengte ami chu kum 10 vel zet hman tlak lohin a awm tawh.
Kum 1986 vel khan Indian Oil Corporation (IOC) chuan Vairengte ah tuialhthei dahna hmun, Oil Depot a siam a, hetah hian Petrol, Diesel leh Khawnvartui Litre Nuai 4 vel theuh leng tura ngaih a ni. Hun engemawchen chu tangkai taka hmangin, IOC chuan heta tang hian Mizoram hmun hrang hranga dah turin Oil an pechhuak thin a ni.
He Oil Depot hi kum 1997 khan a Tanky Leak avangin hman theih a ni ta lova, siamthat a nih mai loh avangin zawi zawiin IOC chuan a hlamchhiah hret hret a, vawiin thlengin hman theih lohin a awm ta a, Mizoram Oil phurtu Tanker ten Ramnagar (Silchar) atanga an Oil phurh te Mizoram hmun hrang hranga an dahna tur siamfel a Challan tih fel nan chauh hman a ni ta a ni.
////////////
Mizoram chhim lam kalpawhna lei pawimawh, Tuipui 'D' lei chei that hna chu nimin khan zawhfel a ni.
PWD Hnahthial Sub Division in hunpui vuakveta mipui leh bungraw phur veivah awlsam lehzualnan Tuipui 'D' lei chei \hat hna hi hun engemaw chen an thawh hnuah nimin Inrinni khan an zo fel a, SDO Pu Lalrammawia Renthlei chuan ni hnih khat chu siam \hat hna an la thawh a \ul dawn niin a sawi.
He lei hi matric ton 2 aia rit phur tan zawh theih a ni lova, hetih lai hian pick-up/sumo rit tak tak phur zawh tum an awm \hin a, duty ten an unload \hen tir \hin a, nimin lamah pawh lirthei 6 vel lai an man tih thuneitute chuan an sawi a, lei hmangtute chu dan zawm turin an ngen nawn tih an sawi.
////////////
Serlui bialtu MLA Pu Lalrinsanga Ralte chuan a bial chhung ramri depa awm khuate hmasawn nan Chief Minister kaihhruaina hnuaiah hmalak mek a ni a ti.
Nimin khan MLA Pu Lalrinsanga Ralte hian Saihapui V tlawhin, ram leh hnam tana khawtlang mipuite inpekna leh an huaisenna fakawm a tih thu a sawi a, Chief Minister Pu Zoramthanga kaihhruai sorkar chuan, ramri dep a awm khuate hmasawn nan theihtawp chhuahin hma a la mek zel a, Saihapui V panna kawng pawh tun thal lai ngeia siam a nih tur thu a sawi a, VC House sak thar a nih tur thu leh Agriculture department lam pawhin Saihapui V-ah nasa taka hmalak an tum tih a sawi bawk.
Bialtu MLA hian Buarchep, Phainuam leh Vairengte pawh tlawhin, khawtlang hruaitute hnenah Mizoram sorkar in Vairengte mipuite sak IR post thar chu chhuahsan a tum loh thu leh remchanga chei that an tum thu a sawi.
////////////
Lai Autonomous District Council inthlanpui neih tur atan Political Party ten ngawrh takin inbuatsaihna an kalpui tan.
December 4-a LADC Inthlanna atan MNF Party chuan bial 25 a an candidate tur te an tichhuak tawh a, Party dang te chuan tunkar lo awm tur hian Candidate turte an puan rin a ni. Inthlanna chuhtumte tan tun thla November ni 20 thleng hun hawn a ni a, December 8 ah vote chhiar a ni ang.
Sorkar kallai a MNF Legislatrure Party Leader, Sangau East Bialtu MDC, Pu F.Rohnuna leh Congress atanga MNF zawmtu, Sangau South bialtu, Pu ST Laldailova te chuan MNF Party Ticket an chang lo a ni.
Nimin khan MNF Legislature Party Leader Pu F. Rohnuna chuan BJP a zawm a, BJP chu Lairam leh hnam damna tur ni a a hriat vanga zawm ta a nih thu a sawi.
BJP Legislature Party Leader, CEM, Pu T. Zakunga chuan, ram mipuiten khaw eng an hmuh theih nan BJP chuan ruahmanna tha leh rintlak a nei a, chu chu mipuiah pawh an zawrh mek a nih thu sawiin, Laifaten mahnia ro inrelna an neih, Autonomous District Council in dinhmun sang leh awmze nei zawk a neih theih chu an duh ber a ni a ti.
//////////////////
Tuikum bialtu MLA, Er Lalrinawma chuan a bial chhunga khelmual puitling siam dan tur a enfiah.
Bialtu MLA, Deputy speaker ni bawk, Er Lalrinawma chuan nimin khan Chhiahtlang Chanmari Venga Khelmual puitling laih dan tur chu Engineer te nen a hmuna kalin a enpui a, hun rei tak khelmual laih tur hmalak chhunzawm awm lo a awm reng chu a ngaih pawimawh thu leh hun reilote hnuah laih a nih thuai tur thu a sawi a, Er Lalrinawma chuan tun term chhunga khawtlang tana ro tling, khelmual puitling siam tura hmalak a tum thu a sawi.
/////////
Tunkar nilaini, November ni 11 zing atanga chin hriat loha bo, Lalsiamthara kum 2 leh a chanve mi, Vairengte khua chu tun thlengin hmuh a la ni lo.
Puan tawh angin, Lalsiamthara hi nilaini khan Vairengte hmar lam High School Tuikhuah mualah a pain hruaiin, a pain ramhnuai lama a kalsan hlanin naupang hi chin hriat lohin a bo ta a, vawiin thlengin hmuh a la ni lo a ni.
Bo zawng hian Vairengte bakah a chhehvel khua Kolasib, Bilkhawthlir, Phainuam, Saihapui V khawtlangte an thawhchhuah bakah, Vairengte tlaklam leh chhuahlam Cachar (Assam) khua, Bilaipur, Lailapur, Bagha leh Dholai mite pawhin an theih ang angin an lo ngaihvenpui ve bawk.
///////////
Nizan dar 6 vel khan Sairang zero point thlangah truck leh scooty inpel sualin, scooty khlahtu hi a thi a, truck hi a tlan tlang nghal nia hriat a ni.
Sairang Police station atanga thu dawn danin Scooty khalhtu hi Rodingliana Pautu kum 36, Pu Lalmuana fapa Upper Republic a ni a, ka pawh chhawn lohin a chetsualna hmunah hian a thi nghal a ni.
Scooty hian a hma truck tlan lai chu tlan pelh a tumna lamah a chesual a, scooty hnunga chuang hmeichhe pakhat erawh a hliam na lo thung a, truck hi a pawl niin sipai truck nia a hriat thu scooty a chuang ve hian Police te a hrilh a, tun thlengin truck leh a khalhtu hi hriat an la ni lo a ni.
Mitthi hi vawiin khan postmortem a ni a, Sairang YMA ten kuang siamsakin, vawiin khan vuiliam nghal a ni.
///////////////
Nungcha humhalh kawnga thawk thate chawimawina, Balipara Foundation Awards, 2020 dawng turin Association for Environmental Preservation, Mizoram (ASEP) thlan a ni.
Balipara Foundation ten chawimawina kum tina an pek thin, Balipara Foundation Award, a tum 8-na atana an pek turah hian ASEP te hi Mizorama thing leh mau leh nungcha humhalh kawnga an thawh that avangin thlan an nih thu an sawi a, Himalaya chhak lam hual vela hemi kawnga thawk tha mimal leh pawlte hnenah he chawimawina hi pek thin a ni.
Lawmman semna hun hi thla thar December ni 5 ah buatsaih a ni dawn a ni.
////////////
Lunglei tlak lama ram thatna hmun khaw hrang hranga loneitute hnenahah thlai chi a thlawna sem a ni.
Lunglei High Powered Committee leh Division Horticulture Office tangkawp chuan nimin khan Lunglei HPC Vice Chairman Pu Lawmawma Tochhawng hovin khaw pathum Phairuangkai, Putlungasih leh Zawlpui khuaah thlai chi hrang hrang nuai 1 sing 6 chuang an sem a ni.
HPC Vice Chairman Pu Lawmawma Tochhawng chuan intodelhna kawngah theihtawp chhuah mek a nih thu sawiin, a hmun ngeiah Dept. a thawktute pawhin kal chilhin kuthnathawktute nen an tangho chu lawmawm a ti a, a dawngtu chauh nilova a petu nih tum a, thlai, buh leh bal leh thei eitling thar chhuak tura thawkrim turin loneitute a sawm a ni.
/////////////
Khawhnai khuahah Sanghal in mi pahnih feh lai na takin a hliam.
Mamita Doordarshan palai thu dawn danin, nimin tlai dar 2:00pm vel khan W. Phaileng atanga kilometre 8 vela hlaa awm, Khawhnai khuaa Pu Vanramengi kum 40 leh Pu Vanlalhlana kum 34 te chu Teirei kama nul siama an hnathawk lai chu Sanghal sum ngaa lian chuan phinin a seh a, Pi Vanramengi hi thlama a insa seng hnuah Sanghal hian Pu Vanlalhlana hnathawk lai chu bei lehin a hliam nual a, an thawm hriaa lo chhan tum mihring dang an lo kal hnuah pawh sanghal hian Pu Vanlalhlana chu a banah sehin a thlah duh loh avangin an sat hlum ta a ni.
Hliam te hi W. Phaileng Hospitalah hruai nghal niin, ngaihtuahawm an ni lo nia thu dawn a ni.
//////////
A tum 7-na turin NDA MLA thlan tlin tharten vawiin khan Nitish Kumar chu Bihar Chief Minister atan an thlang a, naktukah Patna-ah lakluh a ni ang.
NDA MLA thlan tlin tharten lungrual takin Nitish Kumar hi Chief Minister atan an thlang nawn leh a, he hunah hian Defence Minister Rajnath Singh leh party hotute an telpuia ni. Puan tawh angin Bihar inthlanpui neih zawh takah khan NDA kaihhruai BJP, JD(U), Hindustani Awam Morcha (HAM) leh Vikassheel Insaan Party (VIP) ten seat 125-ah hnehna changin sorkarna an siam a, Independent MLA Sumit Singh chuan NDA a thlawp thu a sawi bawk.
//////
India-ah Covid-19 hri vei nuai 82 chuang enkawl dam an ni tawh a, dam tam lam hi zaah 93.09 a ni.
Darkar 24 chhungin hri vei 42,000 chuang enkawl dam an ni a, hri kai 41,100 hmuhchhuah an ni bawk a, thi 447 an awm a ni. Rampumah hri vei nuai 88 chuang an awm tawh a, heng zinga nuai 82 chuang chu enkawl dam tawh niin, nuai 4,79,000 enkawl mek an ni a, nuai 1,29,636 in an thihpui tawh a ni. Hri vei enkawl dam tam lam hi zaah 93.09 a ni a, thi zat hi zaah 1.49 a ni bawk.
////////
Prime Minister Narendra Modi chuan India zalenna sualtu Birsa Munda-a hnathawhin ram mipuite thinlung a hneh thu a sawi.
Vawiin hi Birsa Munda piancham vawi 145-na a ni a, Vice President M Venkaiah Naidu chuan Munda chu Dharti Aaba 'Father of Earth tia sawiin, British awpna hnuaia mipuite hruaikhawmtu, mi huaisen a nih thu a sawi a, tribal ten an dikna chanvo an neih theih nan theihtawp chhuahtu a nih thu a sawi bawk. Prime Minister Narendra Modi pawhin miretheite leh chanhaite dawmkangtu a nih thu a sawi a, zalenna sual kawnga a thawhna leh ram mipuite inkara inremna a awm theih nana a beihna chuan ram mipuite thinlung a hneh thu a sawi.
Ram hruaitute hian Jharkhand mipuite chu Statehood Day hlim taka hmang turin duhsakna an hlan a ni
////////
Prime Minister Narendra Modi chuan Jain sakhaw puithiam Shree Vijay Vallabh Surishwer Ji Maharaj-a piancham hriatreng nana siam Statue of Peace chu naktukah a hawng dawn.
Shree Vijay Vallabh Surishwer Ji Maharaj hi Lord Mahavira hnathawh leh a duhdan thehdarh kawnga thawhhlawk tak, Jain sakhaw tana a hun pum hmangtu a ni a. Thil tha lo umbo tura theihtawp chhuahtu leh zirna ngai pawimawh mi a ni a, thu leh hla thahnem tak a ziak bawk. Amah hriatrengna leh zahna lantir nana lim siam Statue of Peace hi inche 151 a sang a ni a, Rajasthan, Vijay Vallabh Sadhana Kendra-ah dah a ni.
////////
Kar liamtaa Pakistan sipaiten ramri hmun engemawzata inkahhaina thuthlung an palzut chu India in a dem hle.
November ni 13 chawhnu lam khan Pakistan sipaiten LoC huamchhung, civil mite chenna tiamin hmun engemawzat an kap a, civil mi 4 an thi a, mi 19 zet an hliam bawk a ni. Ministry of External Affairs chuan Pakistan sipaite chetlakna a dem thu a tarlang a, hunpui lawm tura ram a inbuatsaih laia remna tichhe thei zawnga pawikhawihna leh tharum thawhna an thlen chu a hriatthiam loh thu a tarlang bawk.
India chuan Pakistan in ramri kan tum mifirfiakte tanpuina hna a chhunzawm reng chu tha lo a ti a, a thuneihna huamchhung ramte chu mifirfiakte chetlakna atan hman a remtih ngai loh tur thu a tarlang a ni.
////////
Hranghlui lemchanthiam Soumitra Chatterjee chu vawiin khan kum 85 mi niin, Kolkata-ah a thi.
Dadasaheb Phalke chawimawina lo dawng tawh tu, Soumitra Chatterjee hi Kolkata Nursing home-ah a thi a, thla hmasa khan Covid-19 a vei tih hmuhchhuah a ni. A enkawltu doctor te chuan Covid-19 avanga thi a nih loh thu an sawi. Soumitra Chatterjee hian All India Radio Kolkata-ah announcer in bul a tan a, lemchan lama a inlan chhungin Padma Bhushan leh France sorkarin civil mite hnena chawimawina a pek thin, Legion of Honour a lo dawng tawh bawk.
////////
Kabul University beihnaa a bultumtu ber nia hriat Mohammad Adel chu Afghanistan sipaiten Kabul-ah an man.
Kabul University pawikhawihna chhui tura sipai a bika ruat ten Kabul-a beihpui an thlak naah Mohammad Adel hi an man a, Afghanistan Vice President Amrullah Saleh chuan Adel chu he pawikhawihnaa a bultumtu ber a nih thu leh Taliban firfiakpawlte nena inkungkaihna nei Haqqani network tana thawk a nih thu a sawi. Puan tawh angin tun thla tir khan mifirfiak 3 in Kabul University hi luhchilhin, mi 22 an kaphlum a, mi 27 vel an hliam a ni.
//////