DD
🌐🌐🌐🌐
25th August 2020, Chanchin Thar (DDNEWS)
Mizoram Covid Update 35 new Positive:
Darkar 24 chhungin Mizoramah Covid 19 positive 35 hmuh belh a ni a, mi 2 enkawl dam an ni.
Nimin khan ZMC Laboratory-a sample 503 endik niin , heng zinga 30 chu positive tih hmuhchhuah a ni a, hei bakah hian Rapid Antigen Test 1043 atangin positive 5 hmuhbelh a ni bawk. Nimin vek khan Lunglei Civil Hospital TrueNAT laboratory-a sample test 20 test niin result a negative vek thung. ZMC -a COVID-19 positive hmuhchhuah tharte hi Aizawl district-a sample lak vek niin mipa 22 leh hmeichhia 8 an ni a, tun hnaia zinna nei 6 awmin a dang zawng hi tualchhunga kai an ni.
Melriat-a positive hnu chhui atanga kai , Melriata cheng vek mi 14 an awm a, heng positive te hi hnuchhui tih a nih vanga khunghran lai vek an ni.
Zangena petrol pump a thawk positive hnu chhui atanga kai mi 9 an awm a, an zingah hian natna lang chhuak an awm lova , khunghran lai vek an ni bawk. Hei bakah hian Ramhlun South a cheng mipa kum 42 chu Hri kai tawh nen an in hnimnaih atanga chhui zuinaah a positive tih hmuh chhuah a ni a, ani pawh hi natna la lang chhuak lo leh khunghran lai a ni. Tun hnia State pawn atanga rawn haw zingah Positive 6 hmuh belh niin , quarantine Facility a awm lai vek an ni a. Rapid Antigen Test hmanga COVID-19 positive hmuhchhuahte hi Mamit ami 2, Kolasib ami driver 2 leh Aizawl Dist ami 1 an ni.
Heti hian tun dinhmunah Mizorama Hri kai hmuh tawh zat chu 953 niin , 463 enkawl dam an ni tawh a, Hri kai enkawl mek 490 an awm a ni.
///////////////////////////
Assam Rifles and MSU meeting regarding AR misconduct:
Mizo Students’ Union Hruaitute chuan Assam Rifles te chu Mizo mipuite rilru hliam zawnga awm tawh lo turin an duh tih an hrilh.
Nimin khan , 23rd Sector Assam Rifles, DIG Brig. Vinod S hovin a pisa ah MSU hruaitute neninkawmhona neih a ni a. Tun hnaia Assam Rifles te Mizoram chhunga an chet dan chungchang sawihoin, MSU hruaitute chuan Assam Rifle chu Tlang Mite Thian an intih ang ngei a Mizoram tana hnathawk tur leh tunhnaia Sesih leh Vairengte khua a an chetdan avanga Mizo mipui rilru an tihnatnaah thupha chawi turin a phut thu an sawi a. Covid 19 dona kawnga Mizoram sawrkar dan zamte chu zawm hram tur leh an mite chu mipui rilru hliam zawnga awm tawh lo turin an duh tih an hrilh a.
Brig. Vinod S chuan Mizo mipui rilru tihnat an duh loh thu leh Social media a thu a darh vak mai chu tha a tih loh thu sawiin, Mizote rilru an lo tina palh anih chuan ngaidam a dil tih a sawi a. Mizote tan a inhawn thu leh harsatna hrang hrang chinfel a inpeih reng thu a sawi a. Assam Rifle mi leh sa Mizo mipui laka pawisawi an awm a, finfiah a nih phawt chuan a na thei ang bera hrem an nih tur thu MSU hruaitute chu a hrilh a. Covid-19 hrileng dona kawngah Mizo mipuite himnan Mizoram sawrkar nena thawhho zel a duh thu a sawi a ni.
/////////////////
MZP meeting on AR, Online Exam and setting up of Chakma VC:
Vawiina Mizo Zirlai Pawl General Headquarters executive meeting chuan tun hnaia Assam Rifles chet dan chungchang, School Education Department hnuaia online exam leh Pukzing,Mamit District ram chhunga Chakma khua VC pek annih chungchang an sawiho.
MZP General Headquarters executive meeting chuan Sesih,Champhai district-a Mizo hmeichhia pahnih(2) te laka Assam Rifles duty te’n Mizo nula zahlo leh thamlo taka sum hmanga lei theih anga ngaia, hmeichhe zahawmna tihbawrhban tuma a chetna chu an dem thu leh , Tunhnaia Assam rifles te’n Mizoram chhunga cheng a ram neitute tithlabar zawnga an chetna chungchangah hetianga thil titute chu hremna pek bakah Mizoram chhuahsan tura an phut thu an sawi .
Hei bakah hian School Education Department hnuaia School thenkhatah online exam kalpui tumna a awm nia an hriat chu, Mumal taka zirna kalpui anih hma leh zirtur chin ruahmanna siam anih hma a, online exam kalpui tumna awm chu tha an tih loh thu an sawi bawk .
Meeting chuan Pukzing, Mamit District ramchhungah Chakma te khaw din Mizoram sorkarin Village Council hran a pe leh a pawmpui chu pawi a ti hle tih sawiin Kan ram leh hnam himna zelna atan leh thang leh thar lo awm zel tur te tan, kan ram neih chhun Mizoram zimte hi hnamdang tan phalrai tawh lo turin leh pe tawh lo turin sorkar a ngen nghal a. He khawdin pawh hi MZP chuan a zirchiang dawn a, thil diklo leh fello hmuhchhuah anih chuan MZP in na taka hmalak chhunzawm an rel a ni.
///////////////////
Zodintluanga visits Lunglei to check status of RT-PCR :
Thorang bialtu MLA Pu Zodintluanga Ralte chuan kumin July thla tir lama RT-PCR khawl a lei Lunglei Civil Hospitala dah mek chu hman tangkai a nih leh nihloh a en.
Pu Zodintluanga'n RT-PCR khawl a lei chu engting nge sawrkarin a hman tangkai zui dan tih tukin zinga a en lai hian khawl hi Hospital Psychiatry Room ah dahthat a ni a, Medical Supdt Dr.SR.Ngurchamliana chuan Health Deptt Secretary lam atangin khawl chu tha taka lo dah rih tur leh an thu leh hla ngaichang tura hriattir an nih thu a lo hrilh a ni.
Pu Zodintluanga chuan tun dinhmunah Covid-19 hri chu Aizawl lamah chuan vantlang ah inkai chhawn a awm tawh tih sawiin, Lunglei lam chu vantlang inkaidarh kawngah himin la lang rih mahse fimkhur a tul thu leh, khawl tha zawk hman tur a awm reng hman nachang kan hre har lutuk ang tih a hlauhawm thu a sawi a. Lunglei Civil Hospital a awm mek RTPCR khawl chu MNF Sub Hqrs Lunglei hruaitu ten Media te hnenah hman tangkai thuai a nih theih nan hmalak an tum thu an sawi angin an thusawi ang ngei hian chak taka hma an lak a beisei thu a sawi a ni.
//////////////////////
Lok Sabha MP assures rapid development for Muallungthu:
Lok Sabha MP chuan, Muallungthu khua chu khaw thleng rem tak leh khaw vannei tak an ni tih sawiin, hmasawnna hna pawh chak taka kalpui theihna tur hmun a ni a ti.
Tukin khan Lok sabha M.P. Pu C.Lalrosanga chuan Model Village-a, a thlan Muallungthu khua a tlawh a, khawchhung fang kualin, Muallungthu khua chu Central Scheme leh Mizoram sorkar \angkawpin theih ang tawka tihhmasawn leh tihchangtlunna turin hma lak mek a nih thu a sawi.
///////////////////
Champhai DEO inspection of election preparedness:
Champhai District chhunga VC Election 2020 felfai taka kalpui a nih theih nân District Election Observer Pi Zosangzuali Pachuau chuan khaw hrang hranga Polling Station-te a enfiah.
Champhai District Election Observer Pi Zosangchuali Pachuau chuan vawiin khan Samthang, Vaphai, Farkawn, Khankawn, Thekte leh Thekpuia VC thlanna tur Polling station-te a enfiah a. Polling Station a felfai taka inthlanna kalpui dan tur leh hripui laka a him thei ang bera ruahmanna an siam tawh sa leh tibelh ngaite chu inthlan buaipuitu turte a hrilh fiah a. Inthlanna tur hmunhma an buatsaihte a tha thawkhat niin a sawi.
///////////////////////
Serchhip DC request citizens to vote:
Tunkar Ni 27 a VC Inthlan lo awm tur atan Serchhip District Bawrhsap Kumar Abhisek chuan District mipuie Vote thlak vek turin a sawm.
Serchhip District Bawrhsap Kumar Abhisek chuan tunkar
Ningani a VC Inthlan lo awm turah, hri leng laka mipui him nan District Election Office chuan NGO
te nen tangkawpin , State Sawrkar leh State Election Commisssion-
in Voter te himna tur a ruahmanna a siam te chu khauh taka kenkawh a nih tur thu sawiin , Hmaituamna leh Kut tih thianghlimna tha taka hmanga , vote thlak vek turin mipuite a sawm a ni.
////////////////
Training on POCSO Rules/Act in Champhai:
Vawiin khan Champhai I&PR Auditorium CHANEM Building-ah District Child Protection unit leh Women and Child Development, buatsaihin Champhai District chhunga Child Protection Service Providers te tan Hursualna laka Naupangte Venhimna Dan (POCSO Rules 2020 and POCSO Act 2012 ) inzirtirna neih a ni.
He hun hi District Child Protection Unit Champhai Chairman, Pi Maria CT Zuali Champhai Bawrhsap chuan khuallian niin a hmanpui a, Naupangte pawimawhna leh naupangte venhim kawnga hnam anga \anho pawimawh zia sawiin rilru lama piansualna neihin mi chunga harsatna an thlen thui thin zia leh a bikin hursualna rawngkaia Naupangin khuaikhem an tawk thin chu hnam ang pawh a thil pawi tak anih thu a sawi a, State te reuhte ni chunga hetiang khawpa home hrang hranga fahrah enkawl tur an tam danah hian kan Kristianna ah inenchian a ngaih thu a sawi a , He hunah hian Child care Institution a thawktute, Child Welfare Committee Members, Juvenile Justice Board member leh Special Juvenile Police Unit, Champhai aiawhte telin Pu Lalchhuansanga Sailo, Assistant Public Prosecutor, District Court Champhai hnen atangin Hursualna laka Naupangte Venhimna dan ngaihtlah a ni.
///////////////////////
Kolasib YMA donates 71 unit blood:
Kolasib Civil Hospital hman atan vawiin khan Kolasib Venglai Branch YMA ten thisen Unit 71 an pe.
Hri pui leng karah Civil Hospital thawktu te nena ruahmanna an siam angin Kolasib a YMA Section hrang hrang ten a inchhawk in tun thla ni 20 atang khan an pe a, a thlawna thisen peka kal zelah vawiin khan Venglai Branch YMA te hian Unit 71 an pe a ni
//////////////
DIET commence B.Ed Exam via Online & Offline:
District Institute of Education & Training (DIET) Aizawl-a Bachelor of Education (B.Ed) II Semester leh IV Semester te tan Exam buatsaih tan a ni.
Mizoram University in Mizoram sorkar hnena exam phalna a pek ang leh UGC/MZU- in Covid-19 laka invenna tura dan a duan te zawm chungain Nimin atang khan Exam hi neih tan a ni. MZU-in a duanlawk ang chuan he exam hi June 16, 2020-a tan tur a nih laiin, hri leng avangin nimin khan tan theih chauh a ni a, September ni 6 ah zawh fel beisei niin , zirlai te hian Online leh offline in, hotute vilna hnuai ah an exam a ni.
/////////////////
Lockdown violators fine amounts to 3.9 lakhs in Lawngtlai:
Hri leng laka mipui himna atana Sorkarin inkhuahkhirhna dan a siam te kengkawhin Lawngtlai Polite te chu ngawrh takin an thawk chhunzawm reng a, inkhuahkhirhna dan bawhchhia an man atanga sum tling khawm chu Cheng Nuai 3 Sing 9 a tling tawh.
Lawngtlai khawpui ah hian zan dar 8:30 atanga zing dar 4:30 thleng curfew puan chhunzawm a la ni a, Inkharkhip tir lam aiin tun dinhmuna dan bawhchhia an tlem tawh thu sawiin , May thla atanga nimin thleng a Lawngtlai Police ten pawisa an chawitir tlingkhawm hi Cheng 3,90,000 a tling tawh a ni.Lawngtlai Police,.SDPO Pu Beimosia Lapi chuan, an pawisa chawitir te chu, State Sorkar sumbawm a lutturin feltakin thlatawp ah Deputy Commissioner hnen ah an thehluh thin thu Lawngtlai a Doordarshan Palai a hrilh a ni.
////////////////
ADB Vice Chairman/ MLA visits Phawngpui area:
Agriculture Development Board Vice Chairman leh Lawngtlai East Bialtu MLA Pu H.Biakzaua chuan Hripui lengmek lak ah Myanmar ramrti dep a awm te chu fimkhur zual turin a chah.
Nimina bial chhung Phawngpui tlang bulthut khua te a tlawh naah he thu hi sawiin , Myanmar nen ramrti intawm thuitak nei a nih vangin, mipuite chu hrileng lak ah fimkhur zual a ngaih thu a sawi a, hri lak a mipuite an himtheih nan a sorkar leh tlawmngaipawl ten theihtawp an chhuah thinna chu lawmawm a tih a sawi. Pu H.Biakzaua chuan, hrileng kar ah mipuite ei leh bara an intodelh theih nan sorkar chuan ruahmanna hrang hrang a kalpui zel tur thu a sawi a, chhung tinte chu a theih ang anga mahni intodelh tur a tanla turin a chah bawk a ni.
//////////////
Siaha all set for North-I MDC By Election :
MADC hnuaia MDC seat khat Siaha North-I bial ruak hnawh khat tura By Election naktuka neih turah engkim ruahmanna peih tawhin, camapign boruak pawhin a vawrtawp a thleng tawh a, nimin tlai dar 5 khan Campaign hun hi khar a ni.
He by election ah hian Party pathum, BJP,, INC leh MNF te inbeiin Party hrang hrang te hian nimin tlai dar 5 thleng khan campaing an kalpui a. Natuk zing dar 7 atangin Vote thlak tan tur niin , tluang taka Inthlanna neih a nih theih nan inbuatsaihna te peihfel vek tawh a ni.
/////////////////
Dy CM asks party members to uphold free/ fair election and follow SEC guidelines:
Deputy Chief Minister Pu Tawnluia chuan Party mi leh sa te chu State Election Commission leh Sawrkarin ruahmanna a siam te tihlawhtlingtu nih tum theuh turin a chah .
Vawiina Khawzawl khawpui chhunga MNF Party Unit hrang hrangte leh VC Candidate te a tlawh naah Dy. CM chuan Khawzawl khawpui chhung veng 10 a Party Candidate te leh an Party mi leh sa te chu inthlanna lo awm turah an tlin ngei theihna turin duhsakna a hlan a, an Party mi leh sa te pawh inthlanna neih turah dik tak leh fel taka thil ti zel tura chahin, State Election Commission leh Sawrkarin ruahmanna a siam te tihlawhtlingtu nih tum theuh turin a chah a ni.
/////////////////////
Covid-19: Tripura health directorate to remain shut from Monday
Tripura Health Directorate chu nimin atang khan tiam chin awm loa khar a ni.
Health thuneitute zingah COVID-19 kai hmuh chhuah mi 22 an awm avangin Agartala-a Tripura Health Directorate chu nimin atang khan tiam chin awm loin state sawrkarin a khar a, thawktute chu in lam atanga hna thawk tura tih an ni. Tripura-ah hian COVID-19 kai mi 9195 awm tawhin, mi 6414 enkawl dam an ni tawh a, mi 78 an thi tawh bawk. Tun dinhmunah hrikai mek mi 2781 an awm a ni.
/////////
US Republican Party re-nominates Donald Trump and Mike Pence as Presidential, Vice Presidential candidates
US Republican Party-in Presidential leh Vice Presidential candidate turin Donald Trump leh Mike Pence a rawt nawn.
Republican Party hian kumin November ni 3-a US President thlanna neih turah an party Presidential candidate atan President Donald Trump, Vice Presidential candidate atan Mike Pence-te a rawt nawn leh a ni. Hetihlai hian Democratic Party lamah chuan Presidential candidate atan Joe Biden, Vice Presidential candidate atan Kamala Harris-te rawt an ni bawk.
/////////////
COVID-19 cases in India
India ramah darkar 24 kalta chhungin COVID-19 kai hmuh chhuah thar mi sing 6 chuang an awm.
Health and Family Welfare Ministry-in a tarlan danin, India ramah COVID-19 kai mi nuai 31 sing 6 sang 7323 an awm tawh a, a kai zinga mi nuai 24 sang 4585 chu enkawl dam ni tawhin, mi sing 5 sang 8390 an thi tawh. Tun dinhmunah hri kai mek mi nuai 7 sang 4348 an awm a ni. Darkar 24 kalta chhungin COVID-19 kai enkawl dam mi sing 6 sang 6 chuang an awm a, mi 848 an thih belh bawk.
////////////
Assam Higher Secondary Education Council to reduce 30 pct syllabus for current academic year due to COVID-19 pandemic
Hri leng vangin Assam Higher Secondary Education Council-in kumin atana lehkha zir tur riruat, zaa 30 a ti tlem dawn.
Hri leng laka zirlaite him zawk nan, zirna inte khar a nih avangin Assam-a zirna in thenkhat chuan online kaltlangin zirtirna a pe chhuak thin a, hengte a nih avang hian Assam Higher Secondary Education Council chuan kumin atan lehkha zir tur riruat zaa 30-a ti tlem turin thutlukna a siam a ni. Assam-ah hian COVID-19 kai an pung chak hle a, mi sing 9 sang 2619-in kai tawhin, a kai zinga mi sing 7 sang 3090 chu enkawl dam an ni tawh a, hetihlai hian mi 252 an thi tawh. Tun dinhmunah hri kai mek mi sing 1 sang 9529 an awm a ni.
//////////
Massive relief & rescue operations underway after Raigad building collapse mishap; 22 people rescued so far
Maharashtra-a In chhawng chimah ruang 10 hmuh a ni tawh.
Nizan zantir khan Maharashtra-a Raigad district-ah chenna-In, chhawng nga a sang a chim a, In chimah hian hian mi 70 atanga 80 vel an tang a, chhanchhuah hna thawh nghal niin, hriattheih chinah mi 30 vel chhanchhuah an ni tawh a, midang chin hriat loha awmte zawn mek an ni. He In hi kum 10 kaltaa sak niin, chhungkaw 50 vel an cheng a, a chim chhan chhui chiang tura tih nghal a ni.
///////////
COVID-19 cases in Delhi
Ram khawpui Delhi-ah COVID-19 kai mek mi sing 1 sang 5939 an awm.
Delhi-ah hian hri kai enkawl dam an pung chak hle a, mi nuai 1 sing 6 sang 2527-in kai tawhin, a kai zinga mi nuai 1 sing 4 sang 6588 chu enkawl dam an ni tawh a, mi 4313 an thi tawh bawk.
//////////
Kim Jong Un likely neither dead nor in a coma
North Korea hotupa Kim Jong-Un chu nikhaw hre loa a awm avangin a farnu Kim Yo-jong chuan ram inrelbawl hna a kengkawh mek nia sawi a ni.
South Korea President hlui Kim Dae-ung hnuaia Political Affairs Secretary hna thawk thin, Chang Song-min chuan social media lamah Kim Jong-Un hi nikhaw hre loa a awm thu a sawi a, hemi rual hian a thih mai erawh a rinawm loh niin a sawi. Kumin kum tir lam atang tawh khan Kim Jong-Un hi a hriselna dinhmun a tha lo hle a, amaherawhchu North Korea lam hian a hriselna chungchangah thuchhuah engmah an neih ngai loh avangin Kim Jong-Un hi a dam that leh that loh chungchangah thu chiang engmah hriat theih a ni lo a ni.
/////////////
Nitin Gadkari inaugurates 45 Highway projects of over Rs 11,000 cr in Madhya Pradesh
Union Minister Nitin Gadkari-a'n Madhya Pradesh-ah Highway project 45 a hawng.
He Highway Project-ah hian kawngpui kilometre 1361-a thui, Lei lian pahnih leh Lei pangai paruk cheng vaibelchhe sing 1 sang 1 hu a tel a, Nitin Gadkari chuan kumtin ram chhunga lirthei chetsualna avanga mi nuai 1 leh sing 5 thihna thleng thin tih ziaawm nan he project hi a tangkai hle dawn niin a sawi.
///////////
COVID-19: Worldwide latest info.
Khawvelah COVID-19 kai mi nuai 238 sing 2 sang 6,792 an awm tawh.
Johns Hopkins University-in a tarlan dain, khawvela COVID-19 kai zinga mi nuai 163 sing 7 sang 1,053 chu enkawl dam an ni tawh a, hetihlai hian mi nuai 8 sing 1 sang 7,243 an thi tawh. Tun dinhmunah hri kai mek mi nuai 66 sing 3 sang 8,496 an awm a ni. Hri leng intanna China-ah chuan hri kai mek mi 386 an awm a, heng zinga mi 11 chu dinhmun ngaihtuahawm an ni.
///////////