DD
*21st August,2020 (Zirtawpni)-Chanchinthar DD News*
22 samples tested positive during the past 24 hrs / All Samples collected from Rangvamual tested Negative
Mizoram chhungah darkar 24 chhungin Covid 19 hri vei 22 hmuhbelh a ni a, Rangvamual a hrivei hmuhchhuah in a tlawhpawhte result hriat chinah hrivei hmuhthar an awmlo thung.
Nimin khan ZMC Laboratory a RT-PCR khawl hmanga swab sample endik 496 zingah COVID-19 vei 13 hmuhchhuah thar a ni a. Rapid Antigen Test hmanga mi 1248 endik zingah hrileng vei mi 8 hnuh anni a. Lunglei Civil Hospital TrueNAT laboratory-a sample endik 33 zingah COVID-19 vei hmuhchhuah thar 1 a awm bawk.
Hetih lai hian Aizawl khawpuia ni nawlpui sample endik ah hrivei hmuhchhuah a ni lo a, Rangvamuala Covid 19 hrivei in a tlawhpawhte zingah pawh hriven hmuhbelh an awmlo a. Rangvamual LLTF te chuan hemi chungchangah hian thuchhuah siamin an huamchhunga hrivei hmuhbelh an awmlo chu lawmawm an tih thu an tarlang.
Aizawl district-a Covid 19 hrivei hmuh chhuah thar zinga 9 hi Covid 19 hriveiin a tlawhpawh atanga kai, Chaltlang Lily Veng atangin mi 3,Sawleng atangin mi 3, Darlawn atangin mi 2 leh Durtlang North atangin mi 1 an ni a, abak zawng hi state dang atanga lo haw khunghran mek an ni.
Rapid Antigen Test hmanga COVID-19 hrivei hmuhchhuahte hi Kolasib district hnamdang lirthei khalhtute an ni a, anni bakah Zangena Petrol pump-a thawk, Zemabawk North a cheng hrivei hmuhthar a awm bawk.
/////
Member of Medical team for COVID 19 tested Positive at Vairengte
Vairengte COVID 19 test na hmuna duty zingah COVID 19 hrivei pakhat hmuhchhuah a ni a. Mualkhang a hnamdang lirthei khalhtu kawngsira damlo mu thuneituten an buaipui tak chuan Covid 19 a vei ngei tih finfiah a ni bawk.
Doordarshan Palai zawhna chhangin Kolasib District Magistrate Dr.H.Lalthlangliana chuan nizan khan hrivei hmuhchhuah chungchang hi a sawi a, a bika dah hran sa a nih tawh avang leh a thawhpui mi tlem te bak tlawhpawh a neih loh avangin chhuizui a buaithlak lo a ni a ti a, a thawhpui medical team te pawh sample laksak niin tun dinhmunah hrivei dang an awmlo a ni.
Hei bakah hian District Magistrate chuan Mualkhang a hnamdang lirthei khalhtu kawngsira damlo mu, thuneituten an buaipui tak chuan Covid 19 a vei ngei tih finfiah a ni ati a, a hriselna dinhmun Doctor ten an enfiahna ah BP sang nei a lo nih avang leh handyman pawh nei lo, mahni chauha zinkawng zawh, chaw mumal pawh ei lo, BP sang lutuk avanga chau zawk ni a a lan thu sawiin, natna dang lo neisa enkawl ngai anih avangin ZMC lamah an thawn thu a sawi bawk.
Hetih rual hian Kawnpui Quarry bula Mandir chu Driver veivak ten an tlawh thin avangin nizan dar 6 atang khan tlawhpawh phal loh (Containment Zone) ah puan ani a, mandir a Puithiam pawh hri lakah a fihlim tih finfiah a ni.
/////
Cueless Polling System proposed for upcoming VC/LC election- SEC
Local Council leh Village Council Inthlan lo awm turah mipuite intlar ngai lova vote thlaktir tum a ni.
Nimin khan State Election Commission (SEC) hruaitute chuan Mizoram People Forum, MPF te leh Central YMA hruaitute chu inthlan lo awm tur chungchang an sawipui a. Hrileng mek karah himtak leh felfai taka inthlan neih a nih theih nan intlar ngai lova vote thlak theih beisei anih thu an sawiho a ni. SEC hruaitute chuan MPF leh CYMA chu thawhhopuiah sawm nghalin, tan tlan chuan intlar ngai lova vote thlak hi an tihhlawhtlin theih ngei an beisei thu an sawi.
/////
Lockdown extended till 24.08.2020
Aizawl Municipal Corporation huamchhunga inkharkhip kalpui mek chu ni tuntla ni 24 zing dar 04:30 thleng pawh sei a ni.
Inkharkhip chhung hian Aizawl municipal huamchhungah luh leh chhuah khap a ni a, Hei hian Home department-in Mizoram luh phalna a pek te, Mizoram pawna chhuak tur te, damlohna leh chhiat tawh thil-a chhungkhat hnai zual te veivahna a huam lovang. Aizawl municipal area pawn atangin nitin mamawh chauh lak luh phal a ni a. Aizawl Bawrhsap leh LLTF te ruahmanna siam angin nitin mamawh zawrhna dawr a hawn theih ang.
Aizawl Distirct bawrhsap chuan vawiin khan thuchhuah siamin inkharkhip chhung hian bungraw phur lirthei AMC pawn lam atanga rawn lur tute chuan Aizawl DC ah bungraw neitu in dilna thlen phalsak a ni a, an bungrua hi AMC huamchhungah hlan thlak phalsak an ni a, an hlan thlak zawh veleh AMC huamchhung an chhuahsan leh nghal tur a ni.
Heng bakah hian inkharkhip hmasa lama inkaihhruaina hrang hrangte pawh hman chhunzawm tur ani bawk.
/////
Save Chite Lui Coordination Committee-te, Mizoram Pollution Control Board, SDPO Aizawl North. EF&CC proved that Hydrogen Peroxide caused foam at Chite Lui
Nimin chawhnu lam atanga Chite Lui tui phuan var chhuichiangtu, Save Chite Lui Coordination Committee-te, Mizoram Pollution Control Board-te, SDPO, Aizawl North-te leh Environment,Forest & Climate Change Department hotute chuan lui tui phawn chhan chu sahbawn siamnan a hman thin Hydrogen Peroxide luihnar lamah leihbuak vang a nih thu an sawi.
Nimin lama Chite lui tui phuan hi vawiin khan chhuichian nghal ani a. Chaltlang Nazaret Hospital chhak lawk a awm, chhungkaw pakhat ten tunhma a sahbon siamna atana an hman thin Hydrogen Peroxide litre 75 vel chu sahbon an siam tawh loh avangin nimin tlai khan an Bual In ah an leihbua a. Hydrogen Peroxide an leihbuakna hmun atang hian Taitea Luiah a lut a, chu chu a thlanga Bangla Luiah a lut leh a, Bangla Lui atangin Chite Lui a fin thla leh a ni.
Mizoram Pollution Control Board te chuan thuchhuah siamin Hydrogen Peroxide hi nungchate tan a hlauhawm a nihloh thu leh awmze neia hman anih chuan tui tihthianghlimna atan leh thil rawng thlakna atan hman thin anih thu an tarlang.
Nizan lam a ruah a sur avangin Chite Lui tui phuan hi a reh tawh a, Save Chite Lui Coordination Committee-te chuan a tul anga hmalak chhunzawm zel anih tur thu leh hetiang hi thleng nawn tawhlo se an duh tih an sawi.
/////
Job Portal Login Day - (CSC Gramin Naukri) Day witnessed
Inkharkhip kalpui mek anih laiin Rampumah hna zawng tu leh Hnathawktu tur zawngte tan Job Portal Login Day (CSC Gramin Naukri) Day hman a ni.
He Ni denchhen hian India khua leh tui hnathawh tur zawng leh hnathawka chhawrtur zawng te tan Common Service Centre (CSC) ah inziahluh runpui neih a ni a. Job Portal Login hmang hian lehkhathiam leh thiamna dang nei hna zawng mek tu ten an thiamna leh tuina ang zel a inziaklut in, he Portal atanga vek hian hna thawktu tur zawngtu ten an mamawh ang hnathawktu an lo thlang ve thung dawn a ni.
He Portal https://cscgraminnaukri.in/gn/ ah hian khua leh tui kum 18 tling chin tawhte, a duh apiang in ziahluh theih a ni a. He ni hi Mizoramah pawh hman a ni.
/////
Mizoram People Forum MPF Press Conf. regarding Cueless polling system for the upcoming LC/VC Election
Mizoram People Forum, MPF chuan Hrileng mek karah Local Council leh Village Council inthlan neih tur anih avangin inthlanna felfai neih a nih theih nan an hmalakna leh mipuite zawmtur an puangzar.
MPF hotuten Aizawl Press Club a thuthar thehdarhtute an kawmnaah vote thlak tura kal mipuite chu hrileng laka invenna hrang hrang, hmaituam, inakarhlata awm leh kut silfai that te zawm tha tura an duh thu an sawi a. Candidate te leh party mi leh sa te hnena pawisa dil chu khap anih thu leh intin luhchhuah a campaign ten in neitute remtihna ngaipawimawh se an duh thu an sawi bakah, sum leh therhlo dang hmanga vote hralh chu Inthlanpui dan kalh anih thu an sawi bawk.
Hei bakah hian inthlan campaign chungchangah party tinte chu social media hmanga thudiklo thehdarh lo tur leh hetianga ti an awm hriat anih chuan thuneitute hnena thlen vat tur anih thu MPF hotute chuan an sawi a. Tihhlawhtin theih loh tur manifesto leh policy puangzar lo turin party tinte an ngen bawk ani.
/////
Seized Drugs disposed @Lunglei
Lunglei Sub Headquarters YMA buatsaihin vawiin khan Ruihhlo mankhawm halral a ni.
He hun hmanpuitu Lunglei District MJA President Pu H. Lalthansanga chuan mitlawmngai leh mi inpe ten ram leh khawtlang tana an thawhna chu ropui a tih thu sawiin ruihhlo an man takte chu man loh ni ta se, thalai tamtak leh chhungkaw engemawzatin an buai phah tur thu a sawi.
Vawiina ruihhlo hal ral takte hi No. 4 hawng 61 niin tualchhung rate ah cheng nuai 48 leh sing 8 hu a ni a, SADS report in a tarlan danin thla hmasa July ni 5 atanga vawiin thleng khan damdawi ruih chi Alprozolam mum 268 leh Rakzu um 226 bakah No. 4 hawng 107 an man tawh a ni.
/////
24 hrs Lockdown Imposed at Khawbung
Khawbunga a cheng, August ni 8 leh ni 9 a Zangena Filling Station tlawhtu te chu vawiin khan Rapid Antigent Test tih anih hnuah Covid 19 an veilo tih finfiah a ni a, hetihlai hian an tlawhpawhte chhuizui angaih avangin Khawbung VLTF te chuan darkar 24 chhung inkharkhip an puang.
Khawbungah hian tukin dar 5 atang khan darkar 24 chhung chu mipui tumah pawn chhuak lo turin VLTF ten an hriattir a.
Khawbung khawchhung inkharkhipah hian Dungtlang Police OC leh a hote chuan Khawbung VLTF puibawmin, dan bawhchhia mi pakhat an man a ni.
/////
Mamit DC meeting with Village Level Task Force (VLTF)
Mamit Bawrhsap Dr. Lalrozama hova Mamit khawpui chhunga Village Level Task Force (VLTF) thutkhawm chuan Covid 19 hnuchhui a awlsam zawk nan Mamit khawchhunga dawr leh puipunna hmuna kalte chhinchhiah zel turin an rel.
Thutkhawmah hian Mamit khawpui chhunga zin haw, zin chhuak leh mikhual nei turte pawh VLTF Secretary-te hnenah in-report zel tur a tih a ni a. MRB Mamit Manager chu Medical hotute'n Rapid Antigen Test tihsak nise, tunkar chhung chu mipui dawr theih loh turin la inkhar hrih tura thurawn pek nise an ti a. Hei bakah hian Covid-19 vei rinhlelh veivahna a mite chu an dawr hawng hrih lo tur leh pawn chhuak hrih lo tur a hriattir nise an ti bawk.
/////
Saitual DC Meeting with MPF & NGOs
Saitual Bawrhsap Pu VL Hruaizela Khiangte chuan VC inthlan lo awm tur chu District an nih hnuah inthlan an hmachhawn hmasak ber tur anih avangin MPF leh NGO hrang hrang hruaitute chu inthlanna felfai an neih theih nan thawhhopuiah a sawm.
Thutkhawmah hian Saitual District a VC inthlanna felfai leh thianghlim tak an neih theihnan thawhhona tur leh hmalakna tur hrang hrang te an sawihova, District MPF, Constituency Forum, Local Forum leh Sub. Hqrs & Grp. hnuaia Branch, Area & Unit ten sawrkarin dan leh thupek achhuah hrang hrang te vawnghima theihtawp chhuaha thawhho nise an ti a ni.
Saitual District ah hian Village Council 44 awmin Party hrang hrang atangin VC chuh tur 519 an awm a, general seat ah 400 leh reserve seat ah 119 an awm dawn a ni.
/////
COVID-19 recovery rate in country reaches 74.30 pct
India ramah darkar 24 chhungin Covid-19 vei mi 68,898 hmuhchhuah a ni a, thihpui mi 983 an awm.
Ramchhungah hri vei enkawl dam mi nuai 21 chuang an awm tawh a, darkar 24 chhungin enkawl dam mi 62,282 awmin, nikhat thil thua enkawl dam an tam ber tum a thleng leh a, dam zat hi zaah 74.30 a tling a ni. Hri vei tawh zawng zawng hi mi nuai 30 an tling dawn tawh a, thihpui 54,849 an tling tawh bawk. Sample test pawh a ni telin an pung a, Health Ministry chuan darkar 24 chhungin sample nuai 9 test a nih thu a tarlang.
/////
US Elections: Joe Biden officially accepts presidential nomination
Democratic Party Joe Biden chuan US President chuh a tum thu a puang chiang.
Joe Biden chuan US President atana nominate a ni chu lawm taka a pawm thu a sawi, Donald Trump-a kaihhruaina hnuaia US in hun thim tak a tawh mek atanga khaichhuak tura theihtawp a chhuah tur thu leh US mipuite pawh fing taka vote thlak turin a sawm a ni. US President leh Vice President thlanna hi kumin November ni 3-a neih tura ruahman a ni a, hrileng avangin inthlan hun sawn a ni dawn em tih mipuiten an ngaichang reng a ni.
/////
Assam asks teachers to undergo COVID-19 test as state mulls over resuming classes
Assam sorkarin zirtirtute Covid-19 test nei vek turin a hriattir.
Assam chu thlaleh atanga zirna In hawng tan tura a inbuatsaih avangin Education Department chuan school, college leh university zawng zawnga zirtirtute chu tun thla chhunga Covid-19 test nei vek turin a hriattir a, Education Department-a Principal Secretary B. Kalyan Chakravarthy chuan sorkarlaipui atanga zirna In hawn phalna an nghah mek thu leh phalna hi an nei thei lo a nih pawhin online class an neih chunzawm tur thu a sawi bawk.
/////
Telangana: Fire breaks out at Srisailam Project's Left bank Power House
Telangana, Srisailam Left Bank Power Station (SLBP) a kangmei chhuakah thawktu mi engemawzat an tang.
Kangmei hi tukin zing lama chhuak a ni a, Telangana leh Andhra Pradesh tangkawpten tuikawng siam hna an thawhnaa eng pek chhuahna khawl-power generation an bunna atanga kangmei hi chhuak a nih thu kangthelhtute chuan an sawi. NDRF team chuan chhanchhuah hna an thawk a, meikhu a tam avangin chhanchhuah hna thawh a har deuh niin an sawi.
/////
Dr Harsh Vardhan launches interactive first-of-its-kind video game 'Corona Fighters' to spread awareness
Covid-19 hrileng chungchang inzirtirna atan video game-Corona Fighters tih chu Union Health Minister Dr Harsh Vardhan chuan a tlangzarh.
Nimin khan Health Minister chuan video games pahnih a tlangzarh tawh bawk a, heng games te hi ramchhunga a hmasa ber niin Health Minister Vardhan chuan hrileng chungchanga mipuite hawiher a tha zawnga thlak danglam thei tura buatsaih a nih thu a sawi a, video games chuan hrileng laka mipuite invendan tur leh tih tur tulte a hrilhhre thei dawn niin a sawi bawk.
/////
No significant change in flood situation in Bihar
Bihar-ah mi nuai 81 chuangin tuilian an tuar mek.
District 16-a cheng mi nuai 81 chuangten tuilian an tuar chhunzawm zel a, Patna-a Gandhi Ghat luituite, Kahalgaon leh Munger-a Ganga luituite pawhin hlauhawm chhinchhiahna an pel tawh bawk. Hmun tam zawkah chhanchhuah hna thawh mek a ni a, tuilian tuarte tana eitur siamna hmun 443-ah mi nuai 3 chuangte tan eitur siam a ni. Mi 5,000 vel relief camp-ah dah an ni a, tun thlengin chhungkaw nuai 9 chuangte hnenah chhawmdawlna pawisa cheng 6,000 theuh pek an ni tawh bawk.
/////
- Bazle Renthlei