Current

मलिंगा निवृत्त: शर्मा, बुमराहच्या खास शुभेच्छा

मुंबई:

श्रीलंकेचा वेगवान गोलंदाज लसिथ मलिंगाने एकदिवसीय क्रिकेटमधून निवृत्ती घेतली आहे. जगभरातून मलिंगावर शुभेच्छांचा वर्षाव होत असून रोहित शर्मा आणि जसप्रीत बुमराहने देखील मलिंगाच्या खेळाची वाहवाही केली आहे.

 लसिथ मलिंगाने शेवटचा एकदिवसीय सामना बांगलादेश विरोधात खेळला. या सामन्यातही ३८ धावा देत मलिंगाने तीन विकेट घेतल्या. एकूण २२५ सामन्यांमध्ये मलिंगाने ३३८ विकेट्स घेतल्या आहेत. बांगलादेश संघातर्फेही त्याला पुढील वाटचालीसाठी शुभेच्छा देण्यात आल्या आहेत. रोहित शर्मानेही मलिंगासाठी खास ट्विट केलं आहे.'गेल्या १० वर्षांत मुंबई इंडियन्ससाठी एक सामनावीर निवडायला सांगितला तर माझ्या डोळ्यासमोर पहिलं नाव लसिथ मलिंगाचेच येईल. कर्णधार असताना मलिंगानी कायम माझ्यावरचा ताण कमी केला आणि अपेक्षांची पूर्तता केली आहे. संघामध्ये त्याने अत्यंत महत्त्वाची भूमिका बजावली. मलिंगा तुला पुढील वाटचालीसाठी शुभेच्छा'.

तर जसप्रीत बुमराहनेही मलिंगाच्या कामगिरीचं कौतुक केलं आहे.' मलिंगा! तू क्रिकेटसाठी जे काही केलं आहे त्यासाठी धन्यवाद. मी कायम तुझ्याचकडून शिकत आलो आहे आणि येत्या काळातही शिकत राहीन'.याशिवाय क्रिकेटमधील इतर दिग्गजांनीही मलिंगाला शुभेच्छा दिल्या आहेत.