Тошкент шаҳри: "Ёнғин жойидан куйган кишининг жасади топилди"

2019 йилнинг 18 январь куни соат 01.43да Тошкент шаҳар ИИББ Ёнғин хавфсизлиги бошқармаси Ёнғинни ўчириш куч ва воситаларини бошқариш ва мувофиқлаштириш марказига Чилонзор тумани “Нафосат” маҳалласидаги 56-уй 62-хонадонда ёнғин содир бўлаётганлиги ҳақида хабар келиб тушган.

Бу ҳақда Ўзбекистон Республикаси ИИВ ЁХББ ОАВ билан ҳамкорлик қилиш бўлинмаси хабар бермоқда.

Хабар асосида зудликда 2 та ёнғин ўчириш экипажлари жалб этилган. Бўлинмалар соат 01.47 да воқеа жойига етиб келиб, ёнғин соат 01.53да тўлиқ бартараф этилган. Ёнғинни ўчириш жараёнида уй эгаси 1946 йилда туғилган А.И.нинг куйган ҳолда жасади топилган. Ёнғин натижасида уйнинг 5 кв.метр майдонда уй жиҳозлари ёниб зарарланган. Кўрилган тезкор ҳаракатлар натижасида ёнғин кенг майдонга тарқалиши олди олинган.

Ёнғин ҳолати юзасидан терговга қадар текширув олиб борилмоқда. Ёнғин сабаби аниқланмоқда.