Оғуфурушлар қўлга олинди
@Jinoyatlar
Ҳаётда ўз ўрнини топишга бел боғлаган Сулаймон мўмай даромад топиш илинжида йўлдан адашди. Туппа-тузук касб-кори бўла туриб, эски таниши Намоз билан тил бириктириб, гиёҳванд моддасининг олди-сотдиси билан шуғулланади. Олтинсой туманидаги “Сувоқова” давлат унитар корхонасининг сантехниги, 4 фарзанднинг отаси Намоз қилаётган иши қонунга хилоф эканлигини яхши англаган бўлса-да, ҳаракатдан тўхтамайди.
Жорий йилнинг 13 январь куни яқинда танишган, ўртоғининг илтимосига кўра, тўққиз юз минг сўм эвазига “Марихуана” гиёҳвандлик воситасини сотиб олишга бел боғлаган Сулаймон Намозга танишидан олган пулларни бериб юборади.
Тўққиз юз минг сўмнинг олти юзи тўқсон сўмига эски таниши Денов туманида яшовчи Алидан уч дона “СПИЧКИ” ёзувли гугурт қутисига жойлаштирилган соф вазни 12,86 грамм бўлган “Марихуана” гиёҳвандлик воситасини сотиб олиб, Сулаймонга олиб келади.
Юмуши тез ва осонгина битган Сулаймон янги харидорга маҳсулотни етказиш мақсадида ўзининг бошқарувидаги “Нексия-1”автомашинасида келишилган манзил томон елдек учиб кетаётганида, ҳуқуқни муҳофаза қилувчи орган ходимлари томонидан тўхтатилади.
Судда Сулаймон ва Намоз ўз айбига иқрор бўлиб, енгиллик беришни сўради. Аммо Намозга гиёҳванд моддасини топиб бериб, сотган Али жиноий қилмиши учун жазоланмай қолганидан фойдаланиб, такроран жиноят содир этишга бел боғлаган.
Даставвал, уч дона “СПИЧКИ” ёзувли гугурт қутиси ичида соф вазни 12,86 грамм “Марихуана” гиёҳвандлик воситаси осонгина сотиб, сувдан қуруқ чиққан Али иккинчи маротаба унинг соф вазни 11.96 грамм бўлган “Марихуана” маҳсулотини навбатдаги харидорга сотаётганда қўлга тушди.
Бундай вақтда беихтиёр “Кўза кунда эмас, кунида синади” деган нақли ёдимизга тушади. Сулаймон Ҳасанов ва Али Жўраев 5 (беш) йил муддатга, Намоз Саматов эса 7 (етти) йил муддатга озодликдан маҳрум этилди.
Абдужаббор УРУНОВ,
Сурхондарё вилояти ИИБ Транспортда
хавфсизликни таъминлаш бошқармаси
ҳузуридаги тергов гуруҳи катта терговчиси