Тошкентга келган Human Rights Watch тадқиқотчисига Ўзбекистондан тезроқ «суришини» айтиб таҳдид қилинди

Human Rights Watch тадқиқотчиси Стив Свердлов Ўзбекистонга инсон ҳуқуқларининг бузилганлик даражасини ўрганиш учун келганида агрессив таҳдидларга нишон бўлди. Бу ҳақда Human Rights Watch хабар берди, деб ёзмоқда "Дарё" нашри.

Ташкилот Human Rights Watch ташкилотига, бошқа ҳуқуқ ҳимоячиларига ва Ўзбекистондаги журналистларга қарши кенг кўламли танқидий кампаниянинг бир кўриниши бўлган, 2019 йилнинг 13 июнида Тошкентда содир этилган ушбу ҳужумни қоралади.

13 июнь куни эрталаб видео блоггер Сардор Комилов ва яна тўрт киши Свердлов Тошкентда яшаётган меҳмонхонага борган. Комилов қабулхона ходимига ўзини Свердловнинг меҳмони деб таништирган, унинг хонасига қўнғироқ қилиб, Human Rights Watch’нинг ёрдамига муҳтож бўлган қурбондек кўрсатган.

Свердлов пастга тушганда, Комилов ва бошқалар уни ҳар томондан ўраб олган. Унинг ҳаракатланишига йўл қўймай, таъқиб қилишган ва 20 дақиқа видеога олишган. Комилов Свердловга бир неча асоссиз айбловлар билан, сўнгги ҳафталарда интернетда пайдо бўлган хабарлар билан таҳдид қилган. Кетишдан олдин эса Свердловга Ўзбекистондан тезроқ «суришини» айтган.

«Human Rights Watch бизнинг мутахассисимиз Стив Свердловни ҳамда унинг инсон ҳуқуқларини бузаётган ўзбек амалдорларининг ишини ўрганишдаги ҳаракатларини тўлиқ қўллаб-қувватлайди. Тошкентда унга нисбатан қилинган жирканч ҳужумни қоралаймиз, — дейди Human Rights Watch ташкилотининг ижрочи директори Кеннет Рос.

— Бу аниқ Стивни қўрқитишга уриниш ва Ўзбекистондаги ҳуқуқни ҳимоя қилиш ташкилотлари ва ҳуқуқ ҳимоячиларининг ишини обрўсизлантиришга қаратилган онлайн-кампаниянинг бир қисми бўлиб туюлмоқда. Ҳуқуқ ҳимоячиларининг обрўсини тўкиш учун қилинган бу уриниш иш бермайди».

Human Rights Watch бир неча йиллик чекловдан кейин 2017 йил август ойида Ўзбекистондаги ўз фаолиятини қайта тиклаган. Бўлиб ўтган ҳодиса 2017 йилдан буён инсон ҳуқуқларини ҳимоя қилиш ташкилотининг бошқа ташрифларидан кескин фарқ қилади.

Бир неча юқори лавозимли амалдорлар воқеа содир бўлганидан кейин Свердлов билан алоқага чиқди ва ундан ташвишланаётганини айтди.