COVID 19

Олимлар коронавирус касаллигининг олтита формаси мавжудлигини таъкидлашмоқда, деб хабар қилади Sky News телеканали Лондондаги Қироллик коллежи тадқиқотчилари олиб борган изланишлар натижасига таяниб.

Мутахассислар АҚШ ва Буюк Британияда 1600 беморни кузатиб, уларда кечган касаллик симптомларини таҳлил қилишди. Аниқланишича, маълум бир клиник кўринишнинг намоён бўлиши уларда касаллик қандай кечиши мумкинлигини билдирар экан. Касаллик ривожланиши кўрсаткичларининг натижаларига қараб унинг олтита гуруҳга бўлиниши аниқланди.

Коронавирус касаллигининг дастлабки учта формасини олимлар нисбатан енгил, деб баҳолаган. Чунки мазкур ҳолатда фақат 1,5 фоиздан 4,4 фоизгача бўлган беморларга респираторли мадад зарур бўлган. Дастлабки иккита «гриппга ўхшаш» формасидаги симптомлар бош оғриғи, йўтал, томоқдаги оғриқ ва эҳтимол ҳидни сезмаслик кўринишида бошланади. Биринчи формасида эса бемор мушаклар ва кўкракларида оғриқни ҳис қилиши мумкин. Иккинчи формасида беморда тана ҳарорати кўтарилади, хириллайди ва иштаҳаси йўқолади. Дастлабки учтасида коронавируснинг «ошқозон-ичак» формаси асосан диарея ва иштаҳанинг йўқолиши билан намоён бўлади.

Кейингилари олимлар томонидан касалликнинг оғир формаси сифатида баҳоланмоқда. Коронавирус хасталигининг тўртинчи формаси доимий дармонсизлик, чарчоқ, тана ҳароратининг кўтарилиб кетиши, бош оғриғи ва кўкракда оғриқ туриши, ҳид сезгисини йўқотиш, йўтал ва хириллаш билан намоён бўлади. Бешинчи формасида ҳам олдингисидаги симптомларни такрорлайди, фақат уларга энди ҳушини йўқотиш, иштаҳа йўқолиши, томоқдаги оғриқ, мушаклар оғриғи қўшилади.

Коронавируснинг энг оғир формаси олтинчиси ҳисобланади. Мазкур форма кўплаб симптомларни ўзида бирлаштиради. Бош оғриғи, ҳид сезгисини ва иштаҳани йўқотиш, йўтал, тана ҳароратининг ошиб кетиши, хириллаш, томоқда ва кўкракдаги оғриқ, чарчоқ, ҳушни йўқотиш, мушаклар оғриғи, нафас сиқилиши, харсиллаши, диарея ва қоринда оғриқнинг пайдо бўлиши шулар жумласидандир.

Хабарда таъкидланишича, касалликнинг олтинчи формаси билан хасталанган беморларнинг ярмидан кўпини касалхонага ётқизишга тўғри келади. Биринчи гуруҳдаги касалларнинг эса атиги 16 фоизи касалхонага тушган.

Мутахассисларнинг фикрича, коронавируснинг аниқ формасини топиш эпидемияга қарши курашда бурилиш ясаши мумкин ва беморнинг аҳволи қай даражада ёмонлашишини олдиндан аниқлашда ҳам қўл келади.