COVID-19
Контактда бўлган кунимдан бошлаб, то касалликнинг биринчи аломатлари юзага чиққунча тахминан бир хафта(балким ундан сал кўпроқ) чамаси ўтди.
Биринчи асоратлар оддий шамоллаш, бўғинларда оғриқ, 37-37,3 иситма ва томоғимнинг ўнг тарафида нўхатдек келадиган жойида оғриқ билан бошланди.
Бир неча кундан сўнг(тахминан 3-4 кун) иситмам 37,5 дан 38-38,5 гача кўтарила бошлади. Томоқдаги оғриқ кетиб, қуруқ ва калта йўтал бошланди. Айни шу кундан бошлаб холсизлик, нафас қисиш симптомлари пайдо бўлди. Зотилжам(пневмония шунда бошланган экан)
СЭС га қўнғироқ қилиб, анализ олишга чақиртирдик.
Келиб бурун ва томоқдан анализ олишди. Жавоби 2 кунда чиқди. (Қарангки ўша пайтларда буни қилишни иложи бўлган экан) Анализим менда COVID борлигини кўрсатди, СЭС ходимлари дархол телефон орқали мен билан боғланиб, 20-30 минутда тайёр бўлиб туришимни айтишди. 30 минутда тез ёрдам машинаси келиб, мени уйдан олиб кетди ва Тошкент тиббиёт академияси клиникаси (Янги ТошМИ)га ётқизишди.
Бу вақтга келиб ахволим янада ёмонлашиб, иситмам 39-39,5 чиқиб кетганди. Эртасига керакли анализлар олинди, лекин нимагадир рентген қилиш чўзилди. Унгача хеч қандай дори ва бошқа муолажалар қилинмади.
Ахволим тобора ёмонлашиб борарди.
Врачни чақиртириб, мени тезда рентген қилишларини талаб қилдим. Рентген менда икки томонлама пневмония борлигини кўрсатди. Пульмонолог Музаффар деган йигит, барака топсин тезда керакли муолажаларни ёзиб берди. Хамширалар хам муолажаларни бошлагач, сал енгиллик сезгандай бўлдим. Аммо бу вақтинча экан....
3-4 кун утиб ахволим яна оғирлашди, иситмам 40,5 га чиқиб кетиб, юрак уриши 120-130, қондаги кислород миқдори (сатурация) 87-88% га тушиб кетгач, мени реанимацияга олишди.
Камида 8 кун ухламадим, 2 қошиқ ичимга овқат кирса, гўё бир қозон овқат егандай ўзингизни хис қиласиз.
Холсизлик, уйқусизлик, иситма...
Реанимацияда 3-4 кун деганда ўзимга келдим. Шифокор укамиз Муҳаммадга алохида миннатдорчилигим.
Ҳамшира ва санитарка сингилларимиздан хам Аллоҳ рози бўлсин. Барча мед. персоналларни хозирги куннинг қахрамонлари деб биламан.
Шу ўринда бир нарсага эътиборингизни қаратмоқчиман:
Касалликнинг илк аломатлари бошлангандан, то реанимацияда ўзимга келишни бошлаган кунимгача тахминан 10-12 кун ўтди. Бу қисқа вақтми, ёки кўпми ўзингизга хавола, аммо бир нарсани аниқ билдимки хар бир касалликнинг оғир стадиясига ўтган вақтдан бошлаб, унинг тирик қолишига бўлган шанси кун билан эмас, балким соат билан ўлчанар экан.
Вақтида ва тез қилинмаган харакат, ўта аянчли оқибатларга олиб келиши аниқ. Минг афсуски хозирда ўлим кўпайиб бориши ва ўлаётганларнинг ичида ёшларнинг борлигининг сабаби хам худди шунда. Тасаввур қилинг: бошланиши эътибор бермаса хам бўладиган симптомлар, арзимаган 4-5 кунда беморнинг ахволи ўта оғирлашишига олиб келяпти. Албатта оддий инсон бошланғич арзимас симптомларга чидайди ёки эътибор бермайди. Аммо ахволи оғирлашгач то тест топширгунча яна қанча вақт йўқотади? Тест жавоби чиққунча қанча, ва нихоят шифохонага ётиб биринчи шошилинч ёрдам кўрсатилгунча қанча вақт йўқотади?
Минг афсус билан шуни айтаманки: хозирда касалликни оғир ўтказувчи инсонларнинг шанси, бир ой олдинги худди шу тоифадаги инсонларга қараганда бир неча баробар кам!
Энди муолажага келсак, палатамизда мен билан бирга яна икки киши бор эди. Уларда касаллик деярли симптомсиз енгил формада кечгани сабаб, айнан уларга берилган дорилар қуйидагилардан иборат эди:
- "Кагоцел" жуда яхши антивирус воситаси (ёки "Арбидол", "Арпифлю", топсангиз "Тамифлю");
- "Ундевид" дражеси, (витамин) ёки бошқа мултивитаминлар;
- "Плаквенил" (малярияга қарши дори, бу вирусга хам қарши ишлар экан);
- "Азитромицин" (антибиотик, буни нимага уларга беришганини тушунмадим);
- Қон суюлтириш учун "Аспирин";
- Цинк (аптекада таблетка холатида сотилади) бу модда хам организмда вирусга қарши курашувчи самарали восита ҳисобланади.
Кунига энг камида 2-3 л суюқлик ичиш, Асал, Қора смородина, малина чой, лимон, наматак дамламаси(шиповник), Облепиха мураббоси ёки сиропи, қизил болгарский, петрушка, брокколи, укроп хам зўр ёрдам беради. Санаб ўтилган мевалар, таркибида витамин "С" моддаси бўйича чемпионлар хисобланади. Хатто оддий карам таркибидаги витамин "С" миқдори, лимондан кўп!
Зинҳор иситма тушуриш учун таркибида ибупрофени бор препаратлардан фойдаланманг, касалликни кучайтириб юборади. Фақат "парацетамол", уни хам агар иситма 38,5 дан ошган тақдирда.
Хар қанча гапирилмасин, аммо минг хижолат билан айтишим керак: Бу касални енгиш учун қувват керак, демак яхши овқатланиш керак.
Ўзингизни ва оилангизни асранг, эҳтиётингизни қилинг!
Аллоҳ барчамизни бу балодан ўзи эмин қилиб, касалларга комил шифо берсин!