Ижтимоий тармоқларда “Энг илғор фермер хўжалигига аталган “Дамас” автомобили мундайроқ хўжаликка пешкаш қилинди” сарлавҳа билан эълон қилинган хабар юзасидан

Ижтимоий тармоқларда “Энг илғор фермер хўжалигига аталган “Дамас” автомобили мундайроқ хўжаликка пешкаш қилинди” сарлавҳа билан эълон қилинган хабар туман ҳокимлиги томонидан атрофлича ўрганиб чиқилди, шунингдек, хабарда тилга олинган фермер хўжаликларининг раҳбарлари билан суҳбат ўтказилди.

Ҳақиқатдан ҳам Сирдарё вилояти ҳокими томонидан жорий йилнинг ҳосили учун пахта хомашёси етиштириб, гектаридан 40 центнер ҳосил олган фермер хўжаликлари “Дамас” русумли автомашина билан тақдирланиши белглиланган эди.

Мазкур мукофотларни ҳақиқий эгаларига топшириш мақсадида ташкил этилган ишчи гуруҳи томонидан тумандаги мавсумни юқори ҳосилдорлик билан якунлаган фермер хўжаликларининг кўрсаткичлари таҳлил қилинган.

Мавсум охирида жами вилоят бўйича 64 нафар фермер хўжаликлари 40 центнердан юқори ҳосилдорлика эришганлиги аниқланган бўлиб, шундан 19 та фермер хўжалигининг пахта майдони 40 гектардан юқори.

Ҳар бир тумандан олинган номзод фермер хўжаликлари туман ишчи гуруҳлари томонидан вилоят ишчи гуруҳига тақдим этилган.

Хабарда 40 центнердан юқори ҳосил олган деб кўрсатилган фермер хўжаликларини етиштирган ҳосилининг салмоғи, яъни етиштирган пахта хомашёсининг тоннаси ҳам алоҳида эътиборга олинган.

Таҳлилга назар соладиган бўлсак, у қуйидагича кўриниш касб этади.

Жумладан, “Болғали Қилич ака” фермер хўжалиги 2019 йил ҳосили учун 36 гектар майдондан 134,5 тонна пахта топшириб, ҳосилдорлик 37 центнерни;

“Темур Жамшид ҳамкор” фермер хўжалиги 2019 йил ҳосили учун 30 гектар майдондан 120,4 тонна пахта топшириб, ҳосилдорлик 40 центнерни;

“Санжарбек Жўраев” фермер хўжалиги 2019 йил ҳосили учун 19,5 гектар майдондан 82 тонна пахта топшириб, ҳосилдорлик 42 центнерни ташкил этган.

Амалда “Дамас” автомобили билан тақдирланган “Содиқ ота” фермер хўжалиги эса жорий йилда 67 гектар майдонда пахта парваришлаб, 255 тонна пахта топширган. Ҳосилдорлиги эса 38,5 центнерни ташкил этмоқда.

Янада аниқроқ тушунтирадиган бўлсак,

“Болғали Қилич ака” - 134,5 тонна;

“Темур Жамшид ҳамкор” - 120,4 тонна;

“Санжарбек Жўраев” - 82 тонна;

“Содиқ ота” фермер хўжалиги эса 255 тонна.

Бундан кўриниб турибдики, вилоятимиз пахтакорлари томонидан яратилган пахта хирмонида “Содиқ ота” фермер хўжалиги етиштирган пахтанинг салмоғи қолган 3 та фермер хўжаликларининг салмоғидан кўп. Шу сабабли тақдирлаш учун вилоят ишчи гуруҳига тавсия этилган.

Ўйлашимизча бу тавсия рағбатлантириш учун энг адолатли, деб ҳисобласа бўлади.

Бунда асосий мезон фақатгина ҳосилдорликда эмас, балки фермерларимизнинг пахта хирмонига қўшган хиссалари ҳам алоҳида эътиборга олинган.

Якуний хулоса чиқаришни эса мурожаатчиларнинг ўзига қолдирамиз!

Боёвут тумани ҳокимлиги ахборот хизмати