Дилфуза Уралова: Боёвут тумани Белбоғли кураш спорт турининг муайян бир ҳомийси йўқ. Лекин, спортчиларни қўллаб-қувватлаётган ҳомийлар мавжуд...

Кейинги йилларда ўзбек кураши ҳам алоҳида кураш тури сифатида дунё миқёсида тан олина бошланди. Бизда кураш инсонни кучли, эпчил, чидамли ва иродали қилиб тарбиялаш воситаларидан бири ҳисобланиши билан бирга,азал-азалдан ўзбек турмуш тарзининг узвий қисми бўлиб келган.

Ўзбек халқ якка курашининг белбоғли кураш деб номланган тури ҳам бор ва ҳозир туманимизда ушбу кураш тури билан мунтазам шуғулланувчиларнинг сони 800 нафарни ташкил этади. Шундан 600 нафардан ошиғини 30 ёшгача бўлган ёшлар ташкил этса, 200 нафарини қизлар ташкил этади. Энг таҳсинга сазовор жиҳати ҳам шунда. Охирги вақтларда ушбу спорт тури билан қизлар ҳам мунтазам шуғулланиб, профессионал спортчи даражасига эришмоқда.

Хусусан Фарангиз Абдунабиева 7 карра Ўзбекистон чемпиони, 2 карра Жаҳон чемпиони бўлишга улгурди.

Фарангиз шу йилнинг 10-13 декабрь кунлари Россия Федерацисидаги Қозон шаҳрида катталар ўртасида бўлиб ўтадиган Жаҳон чемпионатига йўлланмани қўлга киритган.

Туман ҳокими Дилфуза Уралова Фарангиз Абдунабиеванинг навбатдаги Жаҳон чемпионатида иштирок этиши учун ҳомийлик маблағларини жалб қилишда ёрдам берди.

- Боёвут тумани Белбоғли кураш спорт турининг муайян бир ҳомийси йўқ. Лекин, спортчиларни қўллаб-қувватлаётган ҳомийлар мавжуд. Биз боёвутлик спортчиларни ҳар томонлама қўллаб-қувватлаймиз. Шу жумладан Фарангиз қизимизни ҳам. Негаки у миллий ғуруримизга айланиб бораётган “Белбоғли кураш” спорт тури бўйича Жаҳон чемпионатида иштирок этади. Мен эса унинг Жаҳон чемпиони бўлиб, юртимиз байроғини янада юксакроққа кўтаришига ишонаман, - деди Дилфуза Уралова.

Сўнгра Фарангизга Россия Федерацисидаги Қозон шаҳрига бориб-келиш ҳаражатлари учун ҳомийлик маблағларини топширди.

Боёвут тумани ҳокимлиги Ахборот хизмати