Спортнинг футбол тури бўйича “Фарҳод-2 кубоги”га старт берилди

Боёвут шаҳарчасида жойлашган “Фарҳод” ва “Наврўз” маҳаллалари ёшлари ўртасида спортнинг футбол тури бўйича “Фарҳод-2 кубоги”га старт бериш мақсадида қуръа ташлаш маросими ўтказилди.

Қуръа ташлаш маросими давомида гуруҳлар аниқланиб, мусобақа расман 9 ноябрь куни бошланиши келишиб олинди.

Шу ўринда алоҳида таъкидлаш керакки, мазкур кубог мусобақаси кўп йиллардан буён ўтказилиб келинади ва у деярли анъанага айланишга улгурган мусобақалардан бири.

Шунингдек, мазкур маҳалла кубогини анъанавий тарзда ўтказилишида 1983 йилда шу маҳаллада туғилган Бекзод Қодирқуловнинг ҳиссаси катта.

Бекзод Қодирқулов 2000-2004 йиллларда вилоятимизнинг “Гулистон” жамоасида, 2005-йилда Тошкентнинг “Локомотив” клубида Олий Лигада иштирок этган бўлса, 2006-йилда Сурҳандарёнинг “Тўплаган” клуби таркибида Олий Лигада, 2007-2008 йилларда Чирчиқнинг “Кимёгар” клуби билан Биринчи Лигада тўп сурган. 2009-йилда олийгоҳни тамомлаб шу йилдан мураббийлик фаолиятини бошлаган. Ҳозирги кунда “Янгиер” клубининг бош мураббийи вазифасида фаолият юритмоқда.

Бекзод Қодирқулов мусобақанинг ташкилий қисмлари билан шуғулланаётган бўлса, қолганлар қараб тургани йўқ, албатта.

Кўплаб саҳоватпеша тадбиркорлар ҳомийлик маблағлари билан ҳам ҳиссасини қўшишмоқда.

Мазкур ўтказиладиган спорт мусобақасидан яна бир кўзланган мақсад бу - ёш, иқтидорли ёшларни танлаб олиш (селекция)дан иборат.

Маълумот ўрнида айтиш керакки, эртанги мусобақада ҳам анъанага хос тарзда 10 та жамоа қатнашади. Улар ҳар бири 5 та жамоадан иборат икки гуруҳга бўлинган ҳолда куч синашишади. Ҳар бир гуруҳда иккитадан жамоа кейинги босқич, яъни ярим финалга чиқади. Биринчи, иккинчи, учинчи ўринни эгаллаган жамоалар қимматбаҳо совғалар билан тақдирланади. Ўз-ўзидан аёнки биринчи ўринни эгаллаган жамоа маҳалла кубоги соҳибига айланади.

Боёвут тумани ҳокимлиги ахборот хизмати