Хитой 10 кун ичида вирусга чалинганлар учун минг кишилик шифохона қурмоқчи

Хитойнинг Ухань шаҳрида янги турдаги коронавирус билан зарарланган беморлар учун вақтинчалик шифохона қурилиши бошланди, деб ёзмоқда “Sinxua”.

Daryo.uz'нинг ёзишича, минг ўринга мўлжалланган шифохона қурилиши ўн кун ичида якунланиши ва 3 февралда фойдаланишга топширилиши мумкин.

Шифохона модуллашган конструкцияга эга бўлади ва катта бўлмаган тайёр блоклардан қурилади.

2003 йилда ҳам Пекинда кузатилган пневмония эпидемияси туфайли худди шундай “Сяотяншан” номли шифохона етти кун ичида қуриб битказилган. Кейинчалик ушбу бинода мингдан ортиқ хитойликлар даволанганди.

Янги турдаги коронавирус туфайли ҳалок бўлганлар сони 25 нафарга етган. Касални юқтириб олганлар эса 800 нафардан ошган. Хитойнинг Хубэй вилоятида 13 та шаҳар, жумладан вирус ўчоғига айланган Ухань шаҳри ёпилган. Ушбу чора-тадбирларда 30 миллион аҳолининг ҳолати назоратга олинган. Пекинда энг юқори даражадаги фавқулодда ҳолат эълон қилинган.