Ьбб

Туман халқ таълим бўлимининг уносабатига муносабат

     Оғриқ нуқта!

Сўнгги вақтларда юртимизда ўқитувчининг нуфузи, унинг обрў-эътбори, қадр -қиммати, шаъни юксакка кўтарилди. Ҳамон кўтариляпти. Таълимга бўлган эътибор сиёсат даражасида, омма миқёсида муҳимлик касб этмоқда. Бугун мазкур тизимдаги ўзгаришларни мамлакатимиз таълим тизимидаги ислоҳот, десак адашмаймиз... 

Бироқ ушбу тизим вакиллари уларга билдирилган юксак ишончни қай даражада ҳис қиляпти? Бу эса оғриқли масала. Бунга қуйидаги ҳолатда ўзингиз амин бўласиз. 

Яқинда, «Бектемир ҳақиқати» газетасини туман Халқ таълими бўлими ходимларига улашиш учун олиб бордик... Яна ҳам аниқроғи, бепул ва чин кўнгилдан улашмоқлик учун...

Бирор манфаат кўзлаб эмас. Ё моддий, ё маънавий эҳтиёж учун эмас. Шунчаки, Бектемирда илк бор нашр этилаётган, илк туман нашри ҳисобланган газетани тақдим қилмоқ учун. 

Бироқ, Халқ таълим бўлимида матбуотнинг устидан кулинишини, газетанинг қадри чақадан ҳам паст тутилишини, минг афсуски, ушбу муассаса ходимлари ўртасида газета, маърифат улашувчи эмас, «керакли» қоғоз тариқасида тавсифланишини ва таърифланишини кузатдик. Бу ҳам камдай, бир ходим унга тортиқ қилган газетамизни эътиборсиз ҳолатда муассасада пол ювиб турган фаррошга бериб юборди. Гап унинг фаррошга газетани ташлаб кетганида эмас, гап унинг газетага бефарқлигида ҳам эмас. Гап ўқитувчи, деган номни зиммасида кўтариб юрган шахснинг, зиё улашувчи матбуотга бўлган муносабатининг қай даражада қуйи эканлигида!

Ўзбек педагогикасининг асосчиси, буюк ўқитувчи, жадидчи - Абдулла Авлоний, ўз даврида ёш авлодга таълим бериш билан бирга газетани миллатга кенг танитган эди... Ўша оғир тахликали йилларда ҳам босмахоналарда тунлари газета чоп этган, халқни кўзини очишга, миллат фидойиларини уйғотишга тиришган эди! Чунки Авлоний матбуотнинг халқ маънавиятидаги ўрнини, матбуотнинг ёш авлод онгидаги аҳамиятини чуқур англаганди! Аммо бугунги айрим педагог, деб ўзини баҳолаётган шахсларда Авлонийнинг сийратини, буюк устознинг қиёфасини кўра олмадик...

Сўз якунида бир ҳақиқатни айтиб ўтиш зарур: газета айрим кимсалар томонидан хўрлангани билан ҳам яшайверади, ўлмайди. Аммо уни хўрлаган соҳанинг маънавияти яшай олмайди!

Мафтуна Каримова,

 мухбир.