ba

安達和也發現大佬最近有啲唔同咗。勤力咗讀書啦成日都去同學屋企溫書，返黎又有時連機都唔打同同學傾電話學術討論，平時唔捨得買既靚靚文具嘅收藏又不知不覺增加咗堆到一枱都係。床上面又多左隻畫家Hello Kitty公仔喎，乜阿哥唔係鍾意鹿仔既咩？

於是好耐無同阿哥雙打覺得好寂寞既和也，有一日襯得兩個人食飯果陣忍唔住問阿媽：「媽咪呀，哥哥係咪拍拖呀？」

「傻啦你阿哥咁木獨，邊識氹女仔呀？不過細佬你就……」安達媽咪上下掃視和也，比起呆呆地又太認真既大仔，佢反而仲擔心細細個就早熟既細仔。

「哎呀媽咪你食菜丫！」

#

最近，安達同黑澤既狀態有啲微妙。佢哋幾乎日日都一齊放學，之後一個禮拜一兩日變到三四日會去黑澤屋企做功課，有時仲會食埋飯先走添。

因為，本來好快就做得曬既功課總會比唔同既野打斷。黑澤唔知係邊到變出黎既最新一期漫畫附送茶點啦，新出既遊戲啦，有時仲會係安達昏昏欲睡嗰陣借黑澤張鬆軟大床恰一陣，成身汗不如沖個涼先返屋企之類……

玩賽車玩到膊頭貼膊頭，黑澤一個掟彎成個人貼實曬安達，隔著件恤衫都feel到黑澤有啲熱既體溫，安達眨眨眼唔知點好。

之後可能係黑澤間房啲冷氣開得勁，佢哋就一直貼實對方繼續打機咁。

硬係呢，覺得好似有啲怪咁。又講唔出有啲咩怪。

如是者拖下拖下。

抱住膝頭坐係石壆聽著海浪聲，比毛氈包到成個波咁既安達擰轉面，透過黑暗中微弱既光觀察抬頭望住滿天星斗既黑澤，其實大尾督暗到伸手不見五指，佢只係感覺到寒風中既另一舊體溫。不過，黑澤好似好開心咁。

點解佢地會係呢度嘅呢。安達都唔知，可能係上個禮拜煩惱緊點畫美術科要教既梵高仿作嗰陣，電視啱啱播新聞話今晚就係觀賞獅子座流星雨最好既時機。

於是黑澤單一單眼，話未睇過真正既星空點畫starry sky呢阿清你話係唔係呀？

可能就係咁樣應承左，安達媽咪一聽到係黑澤就批准咗達仔十幾歲人既第一次去夜街。佢哋孭住兩大個背囊就一早黎到堤壩霸位，安達一路咬住個包寫生一路睇住夕陽慢慢消失係閃閃發光既海平面。雖然比寒風吹一吹安達就諗，可能係咪要take埋野先會見到啲星星扭麻花咁樣……

「阿清你快啲睇下！」黑澤興奮又激動把聲將安達嗌返黎現實，周圍既人都紛紛發出嘩嘩聲望住個天。

一粒兩粒、跟住一堆流星劃破夜空，隔一段時間就會有一條條銀線係隱約既銀河之下劃過，佢哋一直比星空迷住岳高頭望住個天，直到黑澤開始有啲攰扭下條頸打左個乞痴。

「唉呀你有冇事呀？」

「乞、乞痴！無事，個鼻有啲痕啫。」

聽到黑澤鼻索下索下咁仲喺度死頂，安達學阿媽個招摸下黑澤個鼻尖又摸下佢啲手指，都係凍冰冰咁嘅！唔得，比晒兩條毛氈自己用梗係會凍親架嘛！

黑澤好似呆咗咁，唔知係咪凍到冇反應，安達快快手塞咗袋入面既暖暖包比黑澤，再搵條氈包住兩個人，靠得好埋個陣先發現黑澤好似連頭髮都好凍咁又係咁打喊露，如果搞到人地個仔病點同黑澤阿媽交代呢……

「不、不如你恰一陣先？」

「唔好啦，話左要陪你架嘛。」

「好啦，你係咁打喊露喎…」

安達諗咗諗，跟住就細細聲話咁陣間我眼訓嗰陣都可以恰陣丫嘛，黑澤先至不情不願咁搵張氈笠過頭，縮埋訓咗係安達暖笠笠嘅膊頭上面。