Вобкентда ҳам меҳнат байрами бошланди

Минг чигитга минг эгилиб, минг чаноққа чандон меҳр бериб, вақт билан ҳисоблашмай, машаққат ва заҳмат билан қилинган меҳнат бир кун рўёбга чиқиши муқаррар. Зеро, “ер билан тиллашиш”нинг ҳадисини олган ва қишлоқ хўжалигининг пахтачилик агрокомплексида катта тажриба орттирган Вобкент тумани миришкорлари ҳам олдиларига қўйилган мақсадга эришиб, бугун ўзига хос яна бир меҳнат зафарини тантана қилмоқдалар. Ҳудудда давлат шартнома режасида белгиланган 34 минг 702 тонналик “оқ олтин” хирмони бунёд этилди. Қувонарлиси, саноат учун қимматбаҳо хом ашё етиштиришга ихтисослашган 370 та фермер хўжалигининг аксариятида йил бошидан кўзланган марра эгалланиб, хўжаликларнинг моддий манфаатдорлиги оишб бормоқда.

-Ҳар бир йил деҳқон-миришкорман деганни обдон синовдан ўтказиши муқаррар, -дейди туман ҳокими вазифасини вақтинча бажарувчиси Баҳодур Бафоев. -Қишлоқ хўжалигининг ғаллачилик, пиллачилик ва бошқа соҳаларида давлат шартнома режаларини уддалаб келаётган туманимизда бултур пахтачилик тармоғи ниҳоятда оғир келди. Шунга қарамай, белгиланган 33 минг 958 тонна ўрнига 32 923 тонна “оқ олтин” топшириб, режани 97 фоизга етказганда, арзимас мисқоллар туфайли кўзланган маррага етолмай қолганимиз ҳам бизга аччиқ сабоқ бўлган. Бу йил эрта баҳордан 10 минг 370 гектар ерга “Бухоро-6” ва “Бухоро-8” навли барака уруғини қадагандан бошлаб, ҳар бир контур парвариши, агротехник тадбирлар ва минерал ўғит таъминотига алоҳида эътибор қаратилди. Пайкаллар оралаб, культивация жараёни, ерни “оби ҳаёт”га қондиришдан тортиб, чеканка ва бошқа ишловни кечиктирмай, деҳқончиликда катта тажрибага эга оқсоқолларимизга таяниб, меҳнат қилганимиз натижасида бугун элимиз олдида ҳам юзимиз ёруғ бўлди.

Бу йил янгича тизим асосида “Bukhara Agro Cluster” МЧЖ Ғиждувон, Шофиркон ҳамда Вобкент туманларидаги қатор фермер хўжаликлари билан шартнома имзолаган ишлаб чиқариш субъекти сифатида вобкентлик миришкорларнинг Қоровулбозор туманида “Янги ҳаёт” СИУга бириккан 62 та фермер хўжалиги пахта ҳосилини қабул қилди. Ушбу класстерга қарашли “Когон пахта тозалаш” АЖда бунёд қилинган ялпи хирмонга ҳам вобкентлик уста миришкорларнинг 2557 тонна “оқ олтин”и қўшилгани катта ютуқдир. Бевосита туманнинг ўзида эса “Роҳкент”, “Кумушкент”, “Вобкент” ҳамда “Хайрхуш” пахта қабул қилиш масканларида қимматбаҳо саноат хом ашёси саранжомланди. Шу йил 25 сентябрдан уюшқоқлик билан бошланган йиғим-терим мавсумида 16 минг 900 нафар теримчининг 206 та отрядга бириккан ҳолда сафарбарликка жалб қилингани, қолаверса, уларга ҳудуддаги тижорат банклари томонидан умумий қиймати 30 миллиард сўмга яқин пахта пули далада, тарози бошида тарқатилгани якунда катта муваффақиятни таъминлади.

Катта хирмонга алоҳида ҳисса қўшиб, ҳам ўз хўжалиги, ҳам давлат хазинасини тўлдиришга баҳолиқудрат ҳисса қўшган фермер хўжаликларига келсак, “Хайрободча” МФЙда “Заҳро юлдузи”, “Халач” МФЙда “Нажим Тошобод”, “Сарвиноз Сожида Нигина”, “Латифсобунгар” МФЙда “Муҳсин Шахноза Шахобжон” каби фермер хўжаликлари бошқаларга ибрат сифатида давлат шартнома режаларини биринчилар қаторида уддалашган. Кези келганда, таъкидлаш ўринлики, “Ўзбакон”, “Пушмон” ва “Шанба” МФЙларидаги жами 38 та фермер хўжалигини қамраб олган “Хайриобод” ҳудудида вилоятда биринчилар қаторида давлатга шартномада белгиланган 5015 тоннадан зиёд “оқ олтин” топширилиб, йиллик режа ошиғи билан уддаланди.

Бир сўз билан айтганда, бугун Вобкент туманида ҳам катта меҳнат байрами бошланган. Бундай тантаналар эса ҳалол-пок меҳнат сурури, фаровон турмуш нашидаси, заҳмат чекиб тўкилган пешона терининг ҳузурбахш роҳати демак.

Вилоят ҳокимлиги ахборот хизмати