Коллекторнинг техник ҳолати қониқарсиз аҳволда бўлганлиги боис таъмирлаш-тиклаш тадбирлари амалга оширилди
Buxoro.uz
Ижтимоий тармоқларда эълон қилинган Бухоро тумани “Гулшанобод” МФЙ Удурғи қишлоғидаги коллекторни тозалаш ишларидан кейин чиққан тупроқ ва лой уюмларини шу ернинг ўзига ташлаб кетилаётгани, бу эса шу ҳудудга яқин жойлашган аҳоли хонадонларига қатор ноқулайликлар келтириб чиқараётгани акс эттирилган видеолавҳа юзасидан қуйидагиларни маълум қиламиз.
Ўзбекистон Республикаси Президентининг 2017 йил 27-ноябрдаги “2018-2019 йилларда ирригацияни ривожлантириш ва суғориладиган ерларнинг мелиоратив ҳолатини яхшилаш Давлат дастури тўғрисида”ги қарорига асосан 2019 йилда “Марказий Бухоро ва “Параллел” туманлараро коллекторини тизимли таъмирлаш-тиклаш” лойиҳаси доирасида Бухоро тумани “Гулшанобод” МФЙ Удурғи қишлоғи ҳудудидаги намунавий уй-жойлар олдидан ўтган “Лоша” хўжаликлараро коллекторининг техник ҳолати қониқарсиз аҳволда бўлганлиги боис “Бухородавсувмахсуспудрат” ДУК томонидан ушбу коллекторда эксковатор билан таъмирлаш-тиклаш тадбирлари амалга оширилди.
Таъмирлаш-тиклаш тадбирлари лойиҳа-смета ҳужжатлари амалдаги қурилиш нормаларига асосан тайёрланган бўлиб, лойиҳа белгиланган тартибда экспертиза кўригидан ўтказилган. Тасдиқланган лойиҳага асосан тозалаш ишларидан чиққан тупроқ ва лой уюмлари коллекторнинг муҳофаза зонасига ташланган бўлиб, тупроқ уюмлари қуригач, коллекторнинг муҳофаза зонасигача бўлган ҳудудга олиб чиқилади.
Келтирилган ноқулайликлар учун фуқаролардан узр сўраймиз.
“Бухородавсувмахсуспудрат” ДУК маъмурияти