رح أحجي اليوم عن شيء رح نطلق عليه "نظام المشاركة"

اليوم حبيت أشارك فكرة او مثال وتجربة شلون تحصل على خدمات قانونية ورسمية باقل الخسائر المادية.

بالبداية قبل لا ندخل بالموضوع والطرق شايفين احنا الشباب العراقي بينا مثل الانفصام وعدم العدالة بالمبادئ مالتنا على سبيل المثال لما انت تدرس وتصير مهندس او مبرمج او مدرس او اي مهنة لما تتعب وتصير وتنشئ شغل وإنجاز ويجي واحد ثاني تشوفه ديسرق تعبك سواء كودك البرمجي او تصاميمك الهندسية او كورساتك اي شي تعبت يلة سويته رح تضوج وتدور حقوق ومبادئ وتصير عصبي جداً لدرجة تنتقد المجتمع العراقي على سكوته لهل شي ووو فقط لآنه موضوع اصابك انت (وهالشي حقك تماماً) بينما لما تشوف ناس تنتقد أي شيء ثاني مو اختصاصك مثل سينمانا او شير او مواقع تورنت او منتديات nulled مارح تهتم ابداً بالعكس رح تغلس احياناً وممكن توصل تدافع عن سينمانا بل تستحقر حتى اللي ديفكر انه يكون ضد هالشيء ورح تكَول (هذه اكيد شخص مدفوع ديسقط لا اكثر وثانياً اعمال بسينمانا اجنبية واكيد ديربحون فلوس هواية همه ما بحاجة لل4 مليون مشاهد اللي بسينمانا). نفس الشي رح يكَوله ابو تورنت ونفس شيء رح يكَوله الشخص اللي سرق تعبك رح يكَول تماما انت رابح فلوس كافية ماكو مشكلة اذا سرقت تعبك وبعته لجماعتي.. نفس الشي يصير ويه المشتريات الماركة والتقليد لما شغلها سعرها يكون 100$ ويكون اكو تقليد الها ب 1$ لما مليون شخص يشتري ابو 1$ التقليد لعمل مصمم الاصلية الشخص المتمكن مارح يتقبل اصلاً يشتري ام 100$ سواء ساعات او ملابس او او او التناقض بالموضوع انو انت او اني ما ندافع عن الحق ندافع عن مصالحنا فقط.

‌اليوم انت من تريد تبني مشروعك او تفكر بمستقبلك رح تشوف عقبات كدامك اكثر من طاقتك بهواية رح تلاحظ ان دول اللي تحلم بخدمات شركاتها ماتعبرك ابداً ولا تحترمك والسبب بسيط انوا انت اذا ماتغير من فكرك وتصرفاتك محد رح يحب يتعاون وياك. بلد من ساسة لراسة متهم بغسيل الأموال وتريد بايبال تجي تشتغل يمك ؟ بلد تجارة كلهم عبارة عن ناس بدون مبادئ تارسين السوك كله بضاعة صينية من اردئ المنتجات التقليدية فقط حتى يربحون براس الناس وفوكَاها نزعل لما يصفونا بدول العالم الثالث او ميحترمون جنسيتنا. جربة فديوم تفتح كوكل اميركا وتكتب كلمة IRAQ بالبحث وتلكَه شيء سلبي غير تهديدات مليشيات وجماعتها؟

زين شنو هي الحلول ؟ أوك هو هذا هدف البوست هسه رح نبدي بالحلول النفسية والعملية كشباب حالتنا المادية على كَد الحال وبنفس وقت نريد نغير جزء كبير من حياتنا

اولاً وبصراحة اذا جنت مؤيد 100% للكلام الفوكَ ف من دون أي مجاملة انت مكانك مو بالعراق خلال ال10 سنوات القادمة الحل الأمثل الك انك تسعى بالدرجة الأولى للخروج من العراق الحبيب لآنه وبكل صراحة مارح تكَدر تطبق كل الفوكَ بسبب عوامل كثيرة مارح تساعدك. (لكن) حتى لا تكون متناقض دائما اذكر انك دتستخدم هاي أمور وهالشي غلط حتى تكون صادق ويه نفسك ولا تطلع اعذار امام ناس لآن انت رح تتأثر بالنهاية.

لو انت عندك على الأقل 3-4 اصدقائك نفس تفكيرك ومؤيدين للفكرة رح تكَدر تماماً أنك تستخدم 60% من حياتك بشكل قانوني ورخيص. ورح نبديها من سوالف حاسبة لحد اخر شغلة ممكن تشتريها من النت (عن طريق Tricks).

بالبداية رح نبدي بسوالف أمازون ومواقع المشتريات أونلاين.

بقانون مواقع الاونلاين بزنز مالتهم يعتمد على برنامجين ( الأول Refferal Program) و (الثاني Affilaites Program) هذني برنامجين تسويق للشركة ينطلق ضمن البزنز B2C.. شنو يعني ؟ يعني باختصار انت اليوم تعرف 3-4 أصدقاء يشترون من انترنت وامزون تجي لصاحب امزون جيف بيزوس تكله حمبي ابو جيفة اني اخوك فلان من الميزوبوتاميا اريد اشترك ضمن البرنامج مال شركتكم ابو Amazon Affilates واخذ من كل مشتريات أجيبلك ياهن فد 10-25% نسبة الي. رح يكلك تدلل انت والميزو مالتكم هاك هذه رابط affiliate-program.amazon.com سجل بيه وانطينا فد يومين نراجع معلومات ونوافقلك وتدلل وراها يصير عندك شيء اسمه Partner ID او Affilate ID هذه توزعه على اصدقائك وجماعتك واي واحد يشتري شي الك نسبة مسبقاً من منتج يشتري وبشرط نفس السعر نسبة من عدنا ومو بس هيج الك وعد شرف مني بصفتي أبو الجيف أكلك على تقنيتنا بنظام الماركيتنك اي واحد رح يستخدم لنك مالتك رح نحفظ شي اسمه كوكيز بداخل حاسبته بيها اي دي مال بارتنر مالتك اي شي يشتري خلال 30 يوم همين تجيك نسبة من مشترياته بس قبلها حتى اقبل اشغلك ويانة اريد منك بالفورما مال تقديم تحدد فقط اختصاصات اللي رح تبيعها مثلا انت تقني تختار سوالف تقنية واجهزة الخ.. وتدلل.

هنا بأول خطوة انت تسويها رح تضمن فلوس توصل ل25% من مشترياتك ومشتريات جماعتك اذا سويتوا بارتنر اي دي واستخدمتوه انتو بالحالتين رح تدفعون نفس الفلوس واكو بعض مكاتب العراق يستخدمون بارتنر ايدي في سبيل يربحون براسكم إضافة لفلوس شحن وانت اكيد كمستخدم عادي تشوف سعر بامزون شكل وهو رح يأخذه عن طريق دعوة بارتنر شكل ثاني.. هنا انت اذا حالتك مادية مو زينة او تحب تجمع فلوس تكدر انت واصدقائك البست فرند او بشغلك او أي تجمع انت يثقون بيك تستخدمون بارتنر اي دي واحد وتخلون اتفاق انكم تصرفون الأرباح على مشتريات او أمور ثانية وهنا صار مبداء المشاركة باستخدام نظام الإحالة التجارية Affiliate Business to Customer .. اذا الفكرة مو بعينك ف هذه الطريقة يستخدموها اليوتيوبرز والببلك فيكرز يشرحولك عن منتج بلنهاية يخلون رابط احالة مالتهم وتجيهم نسب ارباح جاهزة بدون ما احد يحس. بالجديد شركات VPN مجانية مثل Adguard بدت تستخدم شي اسمه Rewrite حتى يحولك لرابط احالة مالتهم لما تستخدم في بي ان.

ثانياً. نظام المشاركة بوسيلة الدفع انت اليوم لما انت واصدقائك تحجون عن سعر نتفلكس أو سبوتفاي رح يكَولون ( عااا عمي غالي كلش ومابيه محتوى زين ماكدر ادفع 12$ بالشهر على خدمة رسمية). زين انت مارح أكلك صير بارتنر ويه نتفلكس حتى تشتري رخيص لكن بكل شركة اكو الFamily Plan هذه اللي يخليك تفتح اكثر من جهاز باشتراك واحد رخيص وهو رخيص لسبب واحد انه شركة رح تستلم فلوس من شخص واحد رح يقلل من Transaction fees لذلك يكون ارخص الك والهم. والارخص من هذه كله لما يكون النتفلكس تشتري من وكيل او موزع رح تلكاه فاملي بلان ب 10$ يشغلك 4 شاشات بدقة 4K بنفس الوقت ويطيك 5 بروفايلات (حسابات ثانوية بداخل حساب) حتى كلواحد يكون خصوصية اله وفوك هذه كله يخليك تسجل دخول ب 50 جهاز يعني لو انت واصدقائك ال4 اشتركتوا بنتفلكس رح تدفع 2$ فقط مقابل خدمة رسمية قانونية وسريعة. نفس الشي بالنسبة لسبوتفاي رح تدفع 1.3$ بالشهر أنت هنا رح تساهم انك تكون شخص يدعم المحتوى القانوني للصوتيات والمرئيات مقابل 3.3$ فقط بالشهر فقط تحتاج روح الفريق اللي همه اصدقائك وصدكَني مشاركة هيج امور رح تقربك من اصدقائك ومن ثقتك بنفسك انك دتحاول تكون شخص قانوني ببلد بيه اكبر ميليشيات العالم واكثر الصفقات فساداً. (ماكدر ادرج روابط ومصادر بخصوص هالسكشن حتى ليكون اعلان).

اكو بعد طرق وافكار كلش هواية لكل مجالات ولله العظيم لكن لهنا ورح نكتفي لان صار البوست كلش هواية أني اشكرك/م اذا كملتُ قرايته كله وسمعتني. ممكن مستقبلاً ارجع احدثة بنقاط الباقية مع شرح صورة والفيديو علماً اني من جنت بالعراق حاولت قدر الامكان اسوي تغيير كشخص واحد من دون جانب الطشة لكن فعلياً اساس العراق الحالي مامبني على العدالة لذلك محد رح يكدر يغير من المجتمع يحاول قدر الامكان يغير من نفسه فقط ومن احبابه او يهاجر. اني حاليا برة العراق وبعدني استخدم نظام مشاركة هذه بالمنتديات الاجنبية خلاني حتى اتعرف على اصدقاء جدد من خلال مشاركة بالخدمات داكدر اشتري كلشي بالعالم السيبراني فعلياً كلشي فقط ابحث دائما عن شي جملة اشاركه ويه شخص ثقة بالدفع وثنينه نستفيد بنفس القدر تماماً.