AIR
*ALL INDIA RADIO AIZAWL REGIONAL NEWS UNIT*
REGIONAL NEWS BULLETIN
HEADLINES (EVENING) - 10.9.2020
1. Health Minister Dr R Lalthangliana hova vawiina sorkar mi pawimawh thukhawm chuan COVID19 hri kai chhui hna leh a test hna rang taka tih a nih theih nan ruahmanna siam ni se an ti.
2. LAD Minister Pu K. Lalrinliana’n VC te hnathawhna tur Mizoram Finance Commission sum chu a hlawmin Finance Dept.-in naktukah LAD hnenah a pe chhuak dawn, a ti.
3. Vawiin Aizawl Ramhlun South Local Council inthlan vote thlak ah vote zaa 63.58 a tla.
4. Ramchhungah COVID-19 hri vei enkawl dam an pung zel
<><><>
HEALTH
Tun hnaiah COVID-19 positive hmuhchhuah an tam avanga hmalak dan tur ngaihtuahin vawiin khan Health & Family Welfare Minister Dr. R. Lalthangliana hovin thutkhawm hmanhmawh koh a ni a,
COVID-19 pung zel tur ven nan leh tun dinhmun thlirin COVID-19 frontliner ten an hna tha tak leh chak taka an thawh theih nan hmalak a tula hriat a ni a. Contact tracing, surveillance leh sample testing rang taka tih a nih theih nan ruahmanna mumal tak siam ni se an ti a, sawrkar laipuia Ministry of Home Affairs in inkharkhip thlahdulna tur dan, Unlock 4.0 guidelines a siam thlir chungin leh a tul anga Ministry of Home Affairs rawn chung zelin thuneitu pawimawhten ruahmanna siamin hma lo la se tih a ni.
COVID-19 positive te enkawlna tur Covid Care Centre (CCC) dinhmun tarlan niin tun dinhmunah Civil mi COVID-19 positive 1737 enkawl theihna tur CCC neih a ni a, Para-military Forces COVID-19 positive 303 enkawl theihna tur CCC 6 a awm a ni. Aizawl khawpui leh a chheh velah CCC mamawh belh a ni dawn a, tunhnaiah Tuikhuahtlang Presbyterian kohhran in an kohhran hall a tul chuan CCC atan hman an remtih thu leh Tuikhuahtlang YMA in an veng YMA Hall CCC atan hman an remtih thu dawn a ni a, heng hmun hnih ah hian COVID-19 positive 70 enkawl theih beisei a ni.
COVID-19 a darh nasat avangin dinhmun derthawnga awm sa te, a bik takin kum upate, natna benvawn neite leh naupangte dinhmun ngaihtuah a pawimawh hle tih tarlan a ni a, chhungtinte tangrualin a theih ang anga an fimkhur a pawimawh takzet thu tarlan a ni.
He meetingah hian Home Minister Pu Lalchamliana, I&PR Minister Pu Lalruatkima, Medical Operational Team on COVID-19 Leader Dr. ZR Thiamsanga, MLA bakah Chief Secretary Pu Lalnunmawia Chuaungo leh sawrkar official pawimawhte an tel a. NGO Co-ordination Committee hotute leh Mizoram Kohhran Hruaitu Committee (MKHC) aiawhte pawh he thutkhawmah hian an tel a, NGO Coordination Committee leh MKHC hruaitute chuan sawrkarin harsatna a tawh emaw, mamawhna a neih ah chuan theihtawp chhuahpui an tum thu an sawi a ni.
Meetingah hian COVID-19 positive thar 141 zinga 138 chu ZMC RT-PCR laboratory-a sample test 178 zing ami a nih thu leh test zawng zawng atanga zaa 77.52 a nih thu tarlan a ni a. Aizawl khawpui chhunga veng 83 zinga veng 34 ah COVID-19 positive hmuhchhuah an nih tawh thu tarlan a ni.
(DIPR)
<><><>
SERCHHIP & HNAHTHIAL TRUENAT COMMISSIONED
Serchhip Hospital-a bun thar Covid19 hri kai leh kai lo ernfiahna khawl TrueNat Laboratory chu vawiin khan Dist. DC, Kumar Abhishek-a’n a hawng a, sample pakua endik zui nghal a ni.
Serchhip TrueNat enkawltu tur bik trained Technician hi pahnih an awm mek a ni.
Hawnna hun hman zawh hian hri kaiin tunhnaia a hnimhnaihte chhui zuinaa ‘sample’ lak thenkhat leh Quarantine Centre a awm mi pakua te sample endik zui a ni.
Lawngtlai Dist. Hospitala tunhnaia bun thar Covid19 hri kai leh kai lo enfiahna, TrueNAT Laboratory chu vawiin khan Lawngtlai DC, Dr. Andrew H. Vanlaldika’n tlawhin a enfiah a. Lawngtlaia TrueNAT khawl hi Thawhtanni liam ta khan hman tan a ni a, vawiin thleng khan ‘sample’ 10 endik a ni tawh a. Endik tawh chinah Covid19 hri kai an la awm lo a ni.
(PTC Serchhhip & Lawngtlai)
<><><>
MPCC
Sorkarin Village Council leh Local Council inthlan a buatsaih luih avangin mipuiah Covid19 nasa takin a darh mek nia sawiin Congress party chuan Chief Minister Relief Fund hmangin a thlawnin ‘test’ kalpui ni rawh se, an ti.
MPCC Media Dept. chuan vawiin khan Aizawl Press Club-ah chanchinbumite kawmin hetah hian an Chairman Dr. Lallianchhunga chuan thla 5 chuang Covid-19 hrilengin Mizoram a tihbuai hnuah hri kai mi 1,333 an tling ta a. Mizoram sorkarin eptu party-te leh mithiamte rawtna ngai pawimawh lo va Village Council leh Local Council inthlan a buatsaih luih avangin mipuiin hri an inkai darh mek, a ti a. Tun thlengin inthlan avanga Covid-19 inkaidarh mi 50 chuang an awm tawh a, mipuiah khawi atanga kai nge an ni tih hriat loh tam tak awmin Covid Care Centre-a awm positive an chhuah tirten an kaidarh nasa hle, a ti bawk a.
Chief Minister’s Relief Fund For COVID-19-ah, COVID-19 vanga harsatna tawkte tanpui nan MLA rualte, mimal, pawl leh Kohhran atangin Cheng vaibelchhe 20 leh Nuai 90 chhun luh a ni tawh a, CM Relief Fund-ah hian Mizoram mipui sample test-na senso tur pawisa a tam tawk a, a thlawhin test kalpui se an phut tih a sawi a ni.
Mizoram dinhmun tichhe zual lo tur chuan kumin March ni 31-a MP Pu C.Lalrosanga’n MP Fund Cheng Nuai 100 a pek tawh, tun thlenga CM Relief Fund-a la lut lo chu dil chhuah ni se; BJP, MNF leh ZPM MLA-te’n MLA Fund Nuai 25 theuh an la thawh turte a rang lamin thawh thuai se; sorkarin CM Relief Fund atanga sorkar insensona tur ni ngeia ngaih a lo hman tawh Cheng vaibelchhe 6 rul bawk se, tih chu Congress party duh dan a nih thu MPCC Media Dept. Chairman chuan a sawi a ni.
(Corr)
<><><>
LAD MINISTER
LAD Minister Pu K. Lalrinliana’n VC ten an khawtlang tana hmasawnna tura an ruahmante thawhna tur Mizoram Finance Commission sum chu a hlawmin Finance Dept.-in naktukah LAD hnenah a pe chhuak dawn, a ti.
Vawiina Kolasib Diakkawn YMA Hall-a Covid-19 hrileng do nana thawktu Village Level Task Force (VLTF) hruaitu mawhphurhna inhlanna a hmanpuinaah he thu hi sawiin Minister chuan VC member atana thlan thar zawng zawngte a lawmpui thu sawiin, khawtlang tana an mawhphurhna te tha leh huaisen taka hlen chhuak turin a chah a. VC-te chu khawtlang tana hna an thawh reng rengah mit tlung leh chhawr tlaka thawk thin turin a chah a. VC-te hnathawh chu ‘online’ hmanga endik a nih dawn avangin VC Secretary te pawhin Computer an thiam a tul dawn a ni, a ti.
Minister chuan, chinchang hria ten kumin December thla ah Mizoram ah Covid-19 vei mi 5000 an awm tlin an ring a, he rin dan hi a dik lohna turin mi tin fimkhur turin a chah a ni
Vawiin Kolasib VLTF charge inhlannaah hian Kolasib District chhunga VC aiawh 57 leh Branch YMA aiawh mi 56 an tel a ni.
Mawhphurhna inhlannaah hian Kolasib DC, Dr. H. Lalthlangliana pawhin thu sawiin, naktuk atangin Bairabi-ah Rapid Antigen Test kalpui tan a ni dawn a, ruahman dan chuan Truck driver leh puitute chauh RAT test neihsak an ni rih ang, a ti.
(Andrew Vanlalauva PTC Kolasib)
<><><>
COVID19
Vawiin Aizawl Ramhlun South Local Council inthlan vote thlak tluang taka zawh fel a ni a.
Tun tum inthlanah hian Hmeichhia 2473, Mipa 2115, an vaiin vote nei 4588 an awm a, heng zingah hian hmeichhia 1564 leh mipa 1353, an vaiin mi 2917-in vote an thlak a, vote hi zaa 63.58 a tla a ni.
Ramhlun South hi tunhnaia Local Council leh Village Council inthlana, COVID19 hri inkai chhawn hlauhthawn avanga a nawlpui zinga inthlang ve lo a ni a, ti hian Mizoram pumah VC/LC inthlanna vote thlak zawh a ni ta a ni.
(Corr)
<><><>
WOMEN & CHILD DEVELOPMENT
Women & Child Development Department chuan vawiin khan Social Welfare Minister Dr. K. Beichhua Office Chamber-ah Mizoram puma Health Sub-Centre zawng zawnga hman atan, Blood Pressure (BP) enna khawl a hlan.
BP enna khawl hi Pradhan Mantri Matru Vandana Yojana (PMMVY) kaltlanga hlan a ni.
Dr. Beichhua chuan naute leh nu naupaite enkawl kawngah Women & Child Development Department leh Health & Family Welfare Department-te thawhhona tha leh chak zawk an neih zel theihna atana thilpek hi hlan an ni tih sawiin, Health Worker, ASHA leh Anganwadi Worker ten thawhhona tha leh an neih chhoh zel chuan tun aia hlawhtling zawkin PMMVY pawh hi kalpui theih a beisei thu a sawi.
Women & Child Development Department Director Pi Vanlalpianpuii chuan BP enna khawl chu Mizoram Health Sub-Centre zawng zawngah nu naupai ten a thlawna BP an en theihna atana Health Department hnena hlan an ni tih a tarlang a ni.
Women & Child Development aiawhin Deputy Director (ICDS), Zoramthangi Chhangte chuan PMMVY kalpui that lamah India ram pumah panga-na an nih thu leh India hmarchhakah a titha ber an nih thu a tarlang a, District zingah Serchhip District chu India ram district zawng zawngah PMMVY kalpui tha ber an nih thu a tarlang bawk a ni.
PMMVY hi nu naupai leh nau pawm te tana hamthatna Sorkar Laipuiin a duan a ni a, nu in nau a pawm chhungin a lo inenkawlna tur senso Rs. 5000 a thlawna dawn theih a ni a, mahni chenna veng Anganwadi Centre theuhah inziahluh tur niin, vawiin thlengin Mizoram pumah he hamthatna dawng tawh mi 19,784 an awm mek a ni.
(DIPR)
<><><>
LUNGLEI SEEDS
Sub-Mission on Agro Forestry hnuaiah vawiin khan Lunglei Agriculture Complex-ah thlai chi sem a ni a, Lunglei Addl. DC Pu R. Vanrengpuia’n a hmanpui.
District Agiculture Officer, Pu Tlangtimawia Zote kaihhruai thlai chi semnaah hian SDAO (Hqrs.) Pu Ngurrinsanga Sailo chuan Lunglei District Agriculture Office hnuaiah hian SMAF hmalaknain Nghasih ramah thlai tiak 50,000 leh Chhumkhumah thlai tiak 25,000 enkawl a ni a. Heng hmuna loneitute tan thlai tiak chi hi sem chhuah a ni a ti a. Heng hmunahte hian thlai chi hrang hrang 19 kui tiah a ni tawh a, vawiin khan thlai tiak chi 6 - Archangkawm, Khanghu, Japan Zawngtah, Phuihnam leh Tengtere bakah Zawngtah tiak te sem a ni a. Lunglei Addl. DC Pu R. Vanrengpuia leh Lunglei YMA Sub Hqrs. President Pu Lalrotluanga ten kuthnathawktute hnenah an sem chhuak a ni.
(Thanghmingliana PTC Lunglei)
<><><>
COVID
Ramchhungah COVID-19 hri vei enkawl dam an pung zel a. Tun dinhmunah hri vei hi zaa 77.74 enkawl dam an awm tawh a. Darwkar 24 kalta chhung khan hri vei 72,939 enkawl dam an awm a. Heti hian hri vei enkawl dam tawh zawng zawng hi nuai 34 sing 7 sang 1 leh 783 an awm tawh a. Hri vei mek hi zaa 20.58 an awm bawk a ni.
Hetihlai hian darkar 24 kalta chhung vek khan hri kai 95,735 hmuhchhuah a ni a. Hri kai hmuhchhuah atanga zaa 60 hi state panga ami an ni a. Hri vei tawh zawng zawng hi nuai 44 sing 6 sang 5 leh 863 an awm tawh a. Tun dinhmunah hri vei mek hi nuai kua sing khat sang 9 leh 18 an awm a. Darkar 24 kalta chhungin mi 1172 in an thihpui a. Avaia Covid thihpui tawh hi 75,062 an awm tawh a. Hei hi hri kai zawng zawng atangin zaa 1..68 a ni a.
Darkar 24 kalta chhung khan sample nuai 11 sing 2 sang 9 leh 756 test hman a ni a. Avaia sampel test tawh hi vaibelchhe 5.29 a tling tawh a. Ramchhungah lab hi 1686 a awm tawh a ni.
(Newsonair)
<><><>