AI

*** මොරටුව විශ්වවිද්‍යාලයීය බුද්ධිමය යාන්ත්‍ර විද්‍යා ගෞරව උපාධිය (B.Sc Hons Artificial intelligence) ***

මෙවර විශ්වවිද්‍යාල ප්‍රවේශය සඳහා සුදුසුකම් ලද උසස් පෙළ සමතුන්ට අයදුම් කිරීම සඳහා හඳුන්වා දෙන ලද නවතම පාඨමාලාවක් ලෙස බුද්ධිමය යාන්ත්‍ර විද්‍යා, විද්‍යාවේදී ගෞරව උපාධිය (B.Sc Hons Artificial intelligence) හැඳින්විය හැක. මෙම උපාධි පාඨමාලාව හඳුන්වාදෙනු ලබන්නේ මොරටුව විශ්ව විද්‍යාලයීය තොරතුරු තාක්ෂණ පීඨයේ පරිගණකමය ගණිත විද්‍යා දෙපාර්තමේන්තුව (Department of Computational Mathematics) මගිනි. මෙය වසර හතරක පූර්ණකාලීන උපාධි පාඨමාලාවක් වන අතර ඉංග්‍රීසි මාධ්‍යයෙන් අධ්‍යයන කටයුතු පවත්වනු ලබයි. එමෙන්ම මෙවර මෙම පාඨමාලාව සඳහා යෝජිත ප්‍රවේශ සංඛ්‍යාව වන්නේ 50 දෙනෙකි.

අ. පො.ස. උසස් පෙළ විභාගයෙන් සංයුක්ත ගණිතය, භෞතික විද්‍යාව හෝ උසස් ගණිතය යන විෂයන් අතුරින් අවම වශයෙන් එක් විෂයකට C සාමාර්ථයක් සහ සංයුක්ත ගණිතය, උසස් ගණිතය, ගණිතය, භෞතික විද්‍යාව, රසායන විද්‍යාව හෝ තොරතුරු සන්නිවේදන තාක්ෂණය යන විෂයයන් අතුරින් විෂයයන් දෙකක් සඳහා අවම වශයෙන් S සාමාර්ථයක් තිබෙන අයදුම්කරුවෙකුට මේ සඳහා අයදුම් කළ හැක. 

මෙම පාඨමාලාව මගින් වසර සතරක් පුරා බුද්ධිමය යාන්ත්‍ර විද්‍යාත්මක චින්තනය සිසුන් තුල සංවර්ධනය කරවන අතර, පළමු වසරේදී Fundamentals of Machines, Introduction to Intelligent Machines සහ පරිගණක විද්‍යා ක්ෂේත්‍රයට අදාල Programming, Data structures and Algorithms, Databases, Software Engineering වැනි විෂයයන් මෙන්ම අවශ්‍ය පදනම සපයන උසස් ගණිතය හා සංඛ්‍යාන විද්‍යාව හැදැරීමට පුළුවන. 

ඉදිරි වසර තුනේදී බුද්ධිමය යාන්ත්‍ර විද්‍යාවේ එන ප්‍රධාන පරාසයන් වන Symbolic-AI හා Non-symbolic AI ආවරණය වනසේ 

Artificial Intelligence, 

Expert Systems, 

Ontological Modelling, 

Agent Technology, 

Artificial Neural Networks, 

Machine Learning, 

Robotics, 

Natural Language Processing, 

Evolutionary Computing 

වැනි විෂයයන් මෙන්ම පරිගණක විද්‍යාව, උසස් ගණිතය හා සංඛ්‍යාන විද්‍යාව, කළමනාකරණ මූල ධර්ම හා සන්නිවේදන හැකියාවන් ප්‍රවර්ධනය කරන විෂය දැනුම ද ලබා දෙනු ලැබේ. මෙම උපාධි පාඨමාලාවෙන් බිහිවන උපාධිධාරින්ට, දේශීය හා විදේශීය කර්මාන්ත ක්ෂේත්‍රය (industry), ශාස්ත්‍රීය (academia) ක්ෂේත්‍රය මෙන්ම රැකියා අවස්ථා උත්පාදනය කරන ව්‍යවසායකයන් වශයෙන් ද කටයුතු කළ හැක.

මෙම උපාධි පාඨමාලාවේ අරමුණ ලෙස උසස් ගුණාත්මක තත්ත්වයකින් යුත් බුද්ධිමය යාන්ත්‍ර විද්‍යාව (AI) හා සම්බන්ධ ශාස්ත්‍රවේදී මට්ටමේ අධ්‍යාපනයක් ලබාදීමට විශ්වවිද්‍යාලය අපේක්ෂා කරයි. මේ හරහා AI පිළිබඳ සංකල්පීය හා න්‍යායාත්මක පදනමත් (theoretical underpinning) ප්‍රායෝගික ගැටළු විසඳීමේ කුසලතාවයත් (practical problem-solving skill) බුද්ධිමය යාන්ත්‍ර විද්‍යාව ආශ්‍රිත තාක්ෂණික සැලසුම් ගොඩ නැංවීමේ හැකියාවත් (technical knowledge to design and develop intelligent solutions) වර්ධනය කිරීමට අපේක්ෂිතය. 

එමෙන්ම බුද්ධිමය යාන්ත්ර විද්යාව විෂය ක්ෂේත්රය පිළිබඳව පර්යේෂණ හා සංවර්ධන අංශයේ සිසුන්ගේ අවධානය පුළුල් කිරීමට ද මෙම පාඨමාලාව මහඟු පිටුවහලක් වනු ඇත.

මෙම උපාධි පාඨමාලාවේ පරමාර්ථ ලෙස වේගයෙන් නැගී යන ගෝලීය අවශ්‍යතා සංතෘප්ත කිරී මෙහිලා AI ක්ෂේත්‍රයේ ඉහළ රැකියාවක නිරත විය හැකි උපාධිධරයෙක් බිහිකිරීමට මෙන්ම එකී ගෝලීය මෘදුකාංග ඉංජිනේරු තාක්ෂණ ක්ෂේත්‍රය පුළුල් වීමට සාපේක්ෂව දේශීය මෘදුකාංග ඉංජිනේරු තාක්ෂණ ක්ෂේත්‍රයට අවශ්‍ය බුද්ධිමය යාන්ත්‍ර විද්‍යා (AI) දැනුම සහිත වෘත්තිකයකු බිහිකිරීමට මෙමඟින් අපේක්ෂා කරයි. 

කර්මාන්ත (industry), 

ශාස්ත්‍රීය අධ්‍යයන (academia),

සමාජ ව්‍යවසාය (entrepreneurs in the society) 

ක්ෂේත්‍ර සඳහා අවශ්‍ය කරන බුද්ධිමය යාන්ත්‍ර විද්‍යා (Artificial intelligence) දැනුම සම්ප්‍රේෂණය කිරීම ද මෙහි පරමාර්ථයකි. එපමණක් නොව සාමාන්‍ය වෘත්තිකයෙකු වෙනුවට ක්ෂේත්‍රයේ ප්‍රතිපත්ති සම්පාදකයින් මෙන්ම සමාජයට අවශ්‍ය නවෝත්පාදකයින් බිහි කිරීම මෙම පාඨමාලාව ප්‍රමුඛ පරමාර්ථයකි. එමෙන්ම මේ හරහා නිර්මාණය වන ආර්ථික පැතිකඩ ඔස්සේ දේශීය ආර්ථිකය ගොඩ නැංවීමට ද හැකිවනු ඇත. ලද දැනුමෙන් පමණක් සෑහීමකට පත් නොවී AI ක්ෂේත්‍රය පිළිබඳ අඛණ්ඩ දැනුම සොයා යන්නෙනෙක් මේ තුළින් බිහි කරලීමට අපේක්ෂිතයි. 

මෙම උපාධි පාඨමාලාව හදාරන්නෙකුට සම්ප්‍රදායික මෘදුකාංග ඉංජිනේරු රාමුවෙන් ඔබ්බට ගොස් ක්ෂේත්‍රයෙන් නව්‍යතා සම්පාදකයකු වීමේ ඉඩකඩ විශාල වශයෙන් හිමිවේ. ඊට මුඛ්‍ය හේතුව වන්නේ ඒ සඳහා අවශ්‍ය නවීන න්‍යායත්මක දැනුම සහ ශිල්පීය ඥානය මෙම පාඨමාලාව හරහා ආවරණය වන හෙයිනි. 

එහිදී B.Sc (Hons) Artificial intelligence උපාධිය සම්පූර්ණ කරන්නෙකුට මෘදුකාග ඉංජිනේරු ක්ෂේත්‍රය තුළම විහිදුණු පරාසයක් ඔස්සේ තම රැකියාව ආරම්භ කිරීමේ අවස්ථාව හිමිවේ. ගෝලීය අවශ්‍යතා හඳුනා ගනිමින් ඊට ගැළපෙන පරිදි නව්ය අධ්‍යන පාඨමාලා හඳුන්වා දෙන විශ්වවිද්‍යාලයක් ලෙස ප්‍රකට මොරටුව සරසවිය මඟින් හඳුන්වා දෙන මෙම නවීන පාඨමාලාව හරහා පර්යේෂණ හා සංවර්ධන ක්ෂේත්‍රයට සක්‍රිය දායකත්වය ලබාදෙන උපාධිධාරීන් බිහිකිරීම අරමුණු කොට ගෙන ඇත.

බුද්ධිමය යාන්ත්‍ර විද්‍යාව (AI) යනු ලෝකයේ නව තාක්ෂණ පෙරළියත් සමග බිහිවූ නව්‍ය ක්ෂේත්‍රයකි. එය සෞඛ්‍ය, ගමනාගමන, අධ්‍යාපන, ආර්ථික හා මුල්‍ය මෙන්ම සමාජ යටිතල පහසුකම් යන සියලු ක්ෂේත්‍ර යන්හි උන්නතිය කෙරෙහි බලපා ඇති පුළුල් පරාසයක විහිදුණු විෂය ක්ෂේත්‍රයකි. එමෙන්ම එකී ක්ෂේත්‍ර තුළ විධාකාර නව නිර්මාණ බිහි කරමින් සංවර්ධනයට උපකාරී වන අත්‍යවශ්‍ය මෙවලමක් ලෙසත් AI විෂය පථය හඳුනා ගන්නට පුළුවනි. එම නිසාම මෙම AI ක්ෂේත්‍රය හරහා වසරකට දේශීය හා විදේශීය වශයෙන් විශාල රැකියා අවස්ථා ප්‍රමාණයක් බිහිවේ. 

මෙරට තොරතුරු තාක්ෂණ අධ්‍යයන ක්ෂේත්‍රයේ නිමි වළලු පුළුල් කිරීමට මෙම උපාධි පාඨමාලාව මහඟු රුකුලක් වනු ඇත. මෙම පාඨමාලාව හැදෑරීම හරහා දෙස් විදෙස් කර්මාන්ත රැසක දිනෙන් දින වැඩිවන ඉල්ලුමට අවශ්‍ය ලෙස උපාධිධාරීන් බොහෝ පිරිසකට රැකියා අවස්ථා හිමිවනු ඇත.

පහත සබැඳි ඔස්සේ ඔබට මෙම පාඨමාලාව පිළිබඳව මොරටුව විශ්වවිද්‍යාලයේ නිල වෙබ් පිටුව හරහා තොරතුරු ලබා ගත හැක.

හැඳින්විම : https://uom.lk/itfac/bachelor-science-honours-artificial-intelligence?fbclid=IwAR17be3QgBj-FYmvwY387313qL2wdm0ZzeIgtpDwmv61UCnFKsvRSwSEeWo

විෂය මාලාව : https://uom.lk/sites/default/files/Faculty/IT/ugs/files/Annex%2001-A-BSc%20Hons%20%28AI%29%20Curriculum%2014-08-2020_0.pdf?fbclid=IwAR1hYj5w_ANu0gLuLIJcSrJKeaWp_hXXS5SVfL21yCLnrtKE4GAA1R0qC1k 

විශේෂ ස්තුතිය : 

 ආචාර්ය A.T.P. සිල්වා (ප්‍රධානි , පරිගණකමය ගණිත විද්‍යා දෙපාර්තමේන්තුව)

 ආචාර්ය K.A.S.N. සුමතිපාල  (පරිගණකමය ගණිත විද්‍යා දෙපාර්තමේන්තුව)

සැකසුම: රවීන් නුවරපක්ෂ සහ අමේෂ් ජයවීර

ග්‍රැෆික් නිර්මාණය : පුල්සර සන්දීප