аа

«Ұстаздық етпес жалықпас үйретуден балаға» - деген ұлы Абай бабамыз. Мұғалім жас ұрпақтың санасына енгізетін тәлім – тәрбие, үлгі - өнеге өлшеусіз. Оқытушының бүгін еккен дәні ертеңгі жеңісті - жемісті күннің кепілі. Аудандағы ағылшын тілін тереңдетіп оқытуға мамандандырылған №1 мектепте оқытушылар коллективі жаңадан қалыптасуда. Өткен оқу жылында пән оқытушыларының  ерекше әрекет жасауының арқасында 11-сынып түлектерінің барлығы    жоғары оқу орындары студенті атанды. Жыл басында аудандық халыққа білім беру бөлімі меңгерушісі  М.Базарбаевтың өзі оқушылардың қабілетіне қарай пән оқытушылары  бөліп-бөліп дайындықты бастау  талабын көлденең қойған болатын. Мектеп директоры М.Абдуллаева пән оқытушылары Ф.Мавлонов, Ш.Сафоева, Г.Хайдарова, З.Қуанышбаева, Б.Жүнісоваларға оқушыларды құжат тапсыратын оқу орындарына сай тыңғылықты дайындық жүргізуін өз бақылауына алды. Ата-аналармен де тығыз байланыста  болып бітіруші сынып оқушыларын үйде  жұмсамау, тек сабаққа дайындық жасауына, дұрыс тамақтануына, дене шынықтырумен тұрақты айналысуына жағдай жасаулары педагогтар жағынанн талап етілді. Соның арқасында  күтілген нәтижеге қол жеткізілді.

Биылғы оқу жылында да жаңа ұстаздар қосылған аталмыш мектептің педагогикалық-шығармашылық жұмыстары жемісті, қадамдары сәтті болсын.

М.МАТЧАНОВА,

шығармашылық-мәдени мәселелер бойынша насихаттаушы.

Ұрпақ болашағын ойлайтын әрбір мұғалім өз шәкіртінің білімді, сауатты болып өсуін қалайды. Ал білімге, өнерге, ғылымға апарар жол бастауыш сыныптан басталады. 

Беталысы күнде өзгерген алмағайып дүниеде адамзат үшін ешқашан өзгермеген, өзгермейтін темірқазық бар. Ол-білім! Ол-еңбек! Ел болашағының баянды болмағы білім мен қолда ойнаған еңбекке байланысты.  

Бастауыш сыныптың оқушылары үшін бүгінде небір айрықша әдістемелер оқу бағдарламасына енгізілген. Әр түрлі сабақ түрінде өткізілетін жаңа тақырып баланың ой-өрісін дамытып, ойлау қабілетін кеңейтеді. Әрі оның есте жақсы сақталуына, қорытылуына көмектеседі. Мұнымен қоса, сабақ барысында балдырғандардың өз ойын ауызша, еркін жеткізуіне көмектесетін ойындарды да жиі қолданамыз. Тәжірибе көрсеткеніндей, мұндай әдіс-тәсілдер тілдің анықтығына, шырайлылығына, көркемдігіне үлкен үлес қосады. Бұл мәселе де оқушылар ата-аналарымен өзара ынтымақтастықта жұмыс атқарудың маңызы зор екенін әсте де жадымыздан шығармауға тиіспіз. «Ынтымақ болмай, іс оңбайды», «Күш-бірлікте» деген дана бабаларымыз айтып кеткен даналық сөздерді бетке ұстап, игі мақсат жолында шаршамай қызмет атқару – әр оқытушының міндеті. Сөзімнің соңында, барша әріптестерімді жарқын да игілікті істер атқару жолында тынбай еңбек етуге шақырамын.     

Әлия ЕРЕЖЕПОВА,

№15 мектептің Бастауыш сыныптар әдісбірлестігі жетекшісі.