➜ @UzTv24 📰
Oliy Majlisda to‘ylarni qisqartirish to‘g‘risidagi qarorlarning natija bermagani aytildi.
Oliy Majlis Qonunchilik palatasida 20-iyul, juma kuni “Oilaviy tadbirlardagi me’yor: muammo va yechim” mavzusida davra suhbati bo‘lib o‘tdi. Bu haqda Oliy Majlis Qonunchilik palatasi matbuot xizmati xabar berdi.
Tadbirda to‘y-xashamlarni ixchamlashtirish masalasi muhokama qilindi.
Davra suhbatida ishtirok etgan deputatlarning fikricha, mahalliy hokimiyat organlari tomonidan to‘y-ma’raka xarajatlarini qisqartirish borasida qabul qilinayotgan qarorlar kutilgan natijani bermayapti.
Tadbirda aytilishicha, xalq bilan joylarda bo‘layotgan uchrashuv va muloqotlarda, shuningdek, parlamentga yo‘llangan ko‘plab murojaatlarda to‘y-ma’rakalarni tartibga keltirish masalasi takror ko‘tarilmoqda.
Tadbir Parlament quyi palatasining Oila va ayollar masalalari bo‘yicha komissiyasi, Yoshlar masalalari bo‘yicha komissiya, Qonunchilik va sud-huquq masalalari qo‘mitasi, Oliy Majlis huzuridagi Qonunchilik muammolari va parlament tadqiqotlari instituti tomonidan tashkil etildi. Tadbirda deputatlar, vazirlik va idoralar xodimlari, nodavlat-notijorat tashkilotlar, ta’lim muassasalari hamda OAV vakillari qatnashdi.
➜ @UzTv24 📰