Organic Kitchen туралы

Өткенде іссапарға бара жатып үйдің жанындағы дүкенге соғып бір рет қолдануға арналған кондиционер не маска сұрағам шашқа арналған. Сонда сатушы қыз organic shop-тың құттай құтыдағы 100 грамдық маскасын ұсынған. Ұнап қалып тағы келдім. Маскам бітіп қалыпты, бірақ Organic Kitchen сериясының денеге арналған скраб, крем, маскаларын алып қайттым. Сыртында SLS, парабендер жоқ, тек табиғи, жеуге болатын консерванттардан жасалған деген жазуы "сындырды" мені. Ұнаған/ұнамағанын айтайын. Ұнағаны:

✔ Бағасы. Небəрі 415 теңге. Сіздің дүкенде одан да арзан болуы бек мүмкін.

✔ 100 грамдық шағын құтыда. Органик дүние болғандықтан осындай шағын көлемде сатылғаны жөн. Біздің қазақстандық Биотондар 250 гр көлемде шығарылады. Мұндай косметиканы əрі кетсе 1-2 апта ішінде пайдаланған жөн. Тіпті тоңазытқышта сақтасаңыз да. Сондықтан қалған 100-150 гр босқа бұзылып кетеді. Əрі іссапарға, моншаға алып жүруге ыңғайлы.

✔ Иісі. Ыммм... Нағыз құлпынай, нағыз бал, "Девичник в Вегасе" бетке арналған маскасының иісі тіпті супер. Жалбыз бен кола жапырағының иісі дейді. Кола жапырағын иіскеп көрмеппін, бірақ бала кездегі пепси-коланың иісін таныдым. Денеге жаққан соң денеде де ойнақтап жүреді жұпары.

✔ Қақпағы жабық. Арзан болғанына қарамастан жақсы қорғалған. Сіз алған дүниеге дүкенде көрінген кремге мұрнын тықпалап жүретіндер жоламағанына сенімді болыңыз.

✔ Денемді, бетімді керемет жасартып жіберді демеймін, себебі бұларды бірінші рет қолдандым. Ал organic shop-тың organic kitchen сериясының сұйық сабындары, шашқа арналған маскасы сын айтқызған емес. Оның үстіне табиғи компоненттерден жасалған дүниенің зияны болмайды деп ойлаймын.

✔ Мұндай ұсақ-түйектердің ең басты қасиеті - əйелді өзін өзі сүюге, еркелетуге, бағалауға ынталандырады. "100% Богиня" скрабымен денеңізді ысып тұрып өзіңізді тұрмыс-тіршіліктен мезі болған қарапайым қазақтың қыз-келіншегі емес, кемінде Одри Хепберн сезінесіз ғой 😊 (косметика атауларына бар фантазиясын салған маркетологтар кармасына 100+) Бетіңізге маска жасап бір уақыт өзіңізге көңіл бөлудің өзі көңіл күйді көтереді.

Ұнамағаны:

❌ Ыдысы. Органик дүние болған соң органик материалдан жасалған құтыны қалар едім. Пластмасса емес, шыны құтыда болса керемет болушы еді. Бірақ, құтысына қатысты бағасы да өсуі мүмкін ғой.

❌ Бұл енді минусы емес, ескерту. Егер сізде құлпынайға не цитруске аллергия болса, құрамында бұл компоненттері жоғын таңдаңыз. Себебі, қайталаймын - бұл серия табиғи өнімдерден жасалған!