Неліктен түнде тек түнгі крем жағамыз?

Түнгі кремнің күндізгі кремнен ерекшелігі

Күндізгі кремдер бетті қоршаған орта факторларынан қорғауға, теріні ылғалдандыруға арналады.

Ал түнгі кремдер теріні қалпына келтіруге арналған. Күндізгі крем құрамының 60% судан тұрады. Түнгі кремдер құрамында витаминдер, қоректік заттар көбірек болады. Оның консистенциясының қоюырақ болуы да осыған байланысты. Терінің регенерация қабілеті түнгі сағат 01 мен 04 сағат аралығында күшті болады. Тері босаңсып, кремнің барлық пайдалы компоненттері белсенді "қызмет атқарады".

Түнгі кремді ұйықтар алдында, төсекке жататын кезде емес, одан екі сағат бұрын жаққаныңыз жөн. Əйтпесе крем сіңіп үлгермей, көрпе-жастығыңызда қалады.

Теріңіз майлы болса, скраб, пилинг жасап үстіңгі қабатын тазартып алғаныңыз жөн. Бірақ күнде пилинг жасау да зиянды. Сондықтан спонжбен тазалап жуған абзал. Крем сіңу үшің теріні лосьон, тоникпен сүртіңіз. Ылғал бетке крем жақсы сіңеді.

Енді өзімнің сүйікті түнгі кремім туралы айтайын. Бұл Guerlain фирмасының ABEILLE ROYALE Night Cream-ы. Негізі 30+ арналған крем. Құрамында үш түрлі бал бар: тимьян балы, новозеландиялық клевер балы жəне аналық бал арасының сүті. Гёрлен компаниясы зертханасының айтуынша əжімнің пайда болу себебі тері тініндегі микро жарылыстар. Яғни тіннің ыдырап, жарықшақтардың пайда болуы. Крем құрамындағы компоненттер регенерацияны күшейтіп бетіңізді тығыршықтай етеді. Егер бетіңізге əжім енді түсе бастаса, осы кремді жаққан соң нəтижесін 1-2 аптада-ақ байқауыңызға болады. Ұсақ əжімдер жазылып, бетіңіз барқыттай болады. Байқайсыз ба, кейбір егде тартқан əйелдердің жасын шамалап білесіз, бірақ бетінде əжімі жоқ, терісі барқыт тектес болып тұрады. Бұл күтінетін əйелдерге тəн тері. ABEILLE ROYALE-дің маған тағы бір ұнайтыны - иісі. Жоқ, хош иісті емес, бірақ күтімнің иісі дер едім. Крем қою, ауырлау. Бірақ таңертең майы шылқып тұрмайды. Толығымен сіңіп кетеді. Бағасы 58 мың теңгедей. Косметика дүкендерінде жеңілдіктер болғанда осындай дүниелер алған жөн. Бұл кремді күнде жақпаймын. Бір апта жағып, басқа кремдермен алмастырып отырамын. Қай креммен алмастыратынымды келесі жолы жазамын 😉