Hand & Nail Moisture Pack

Бұл масканы кеше қолданып көрдім. Нəтижесі қаншалықты ұзаққа жетеді екен деп ойлап едім. Маталық маскаларды онша ұната бермеймін. Лездік қана нəтиже береді. Бетіңізге болсын, қолға болсын. Жасаған соң бірден тері əп-əдемі, жұп-жұмсақ. Бір тəуліктен соң қайта баяғы қалпы. Бұл маска да сол операдан.

Құрамында глицерин, карите, ши майы, алое вера, тағы басқалармен қатар, натрий EDTA жəне цетил спирті бар екен. Жарайды, кальций-натрийдің этилендиаминтетраацетаты тұрақтандырғыш ретінде пайдаланады. Ағзада жиналса зиянды, бірақ біз бұл қолғапты күнде кимейміз ғой)) Екінші назар аудартқан компонент - спирт. Əдетте косметикада спиртті ұнатпаймын. Бірақ косметологияда спирттің жақсы жəне жаман түрлері бар. Мысалы этил спирті пайдалы компоненттерді терінең төмен қабаттарына жеткізеді. Торшалық деңгейде əсер етеді. Бірақ терінің липидті, яғни қорғаныс қабатын бұзады. Егер маска, скраб, лосьондарда этил, метил, этанол спирті болса қолданған соң міндетті түрде қорғаныс қабатын қалпына келтіретін амал жасаңыз. Мысалы крем, эссенция жағып. Немесе бас тартуыңызға болады. Себебі олар "жаман" спирт. Ал цетил спиртінің еш зияны жоқ. Бұрын оны кашалоттың фиброзды сұйықтығынан (спермацетінен) алатын. Бірақ киттерді аулауға тыйым салынған соң, соңғы уақытта пальма майынан өндіреді. Һа, түтіндетіп алып, өзі су сеуіп тастады дейсіздер ме? Косметикаңыздың құрамына назар салып тұрсын дегенім ғой)))

Сонымен маскамызға оралайық. Қаптама ішінде сулы екі қолғап маска тек қолыңыздың терісіне ғана емес, тырнақтарға да пайдалы. Сондықтан лагыңызды кетіріп жасауды рекомендеймін. Киіп аласыз да 15 минут ештеңе жасамай отырасыз. Иə, тіпті сотка шұқи алмайсыз 😉

Нəтижесі жаман емес. Қолым жұмсарды, əдетте қатқыл болатын бас бармақ пен сұқ саусақ арасындағы, тырнақ маңайындағы терім өзіме ұнап отыр. Маған мұндай лездік əсер беретін ұсақ-түйектер əйелдердің өзін əйел сезінуі, өзін көбірек жақсы көруі үшін жасалатындай. Ал жұмсақ əрі əдемі қолдарға қарапайым ванночкамен де қол жеткізуге болады. Мысалы, кеңдеу ыдысқа жылы су құйып, розмарин майының 1-2 тамшысын, зəйтүн майынан 1 ас қасық қосып 5-7 минут қолыңызды малып отырыңыз. Немесе 2 стакан сүтке 2 стакан жылы су қосып 1 ас қасық зəйтүн майы мен 1 шөкім корица (ароматерапия үшін) қосып 5-7 минут қолыңызды салсаңыз болды. Қолыңыз жұмсарып, қалпына келіп қалады. Қолыңызды күтіп жүріңіз, қолға тоналка жағылмайды 🙃