Дезодоранттар

Дезодорант жазда ғана актуал мəселе десеңіз қателесесіз. Менде тердің жағымсыз иісі, қолаңса проблемасы жоқ. Бірақ жейделеріме обал. Қыста еріксіз қалың киінесіз, жаттығу залына барасыз, суық тиіп қалса тіпті ағыл-тегіл терлейсіз. Сəл терлесем, киімді екінші кие алмаймын. Жуу қажет болады. Ал жуған сайын киімнің өңі кетеді. Сондықтан сирек жууға тырысамын. Мұндайда құтқаратын жақсы дезодорант. Өзім қолданатын үш түріне тоқталайын.

Ұзақ мерзімді. Dry Dry.

Аптасына бір жақсаңыз жеткілікті. Робот сияқты құп-құрғақ жүресіз. Тек жағудың бір ерекшелігі бар. Таза, құрғақ теріге жатар алдында, яғни түнде жағу керек. Ылғал теріге жақсаңыз, ашытады. Қолдану жөніндегі нұсқаулықта тек түнде қолдануға арналған деп жазылған. Күндіз жағып көрмедім. Бірақ алдында түнде жағып пижамамды киіп алушы едім. Бір күні пижамамның қолтығы ағарып, үлбіреп қалғанын байқадым 😜. Шугаринг пен Драй Драйдың үйлестіре көрмеңіз. Жалпы теріде сəл болса да жара не қызару болса қолданбаңыз. Оны тіпті алақанға, маңдайға, табанға жағуға болады. Əр жерге жағатын дезодорант пайызы да əртүрлі болады. Құрамы: "Денатурированный спирт (бутиловый спирт, денатурат), гидрат хлористого алюминия – 30,5%. Бұл элементтерді не екенін нақты білмеймін. Бірақ бес шақырым жүгірсеңіз де теріңізді тырп еткізбейтініне қарағанда жай зат емес-ау. Өндіруші ел - Швеция. Интернет форумдарда Швецияда бұл дезодоранттар мүлдем сатылмайды дейді. Өзім тексеріп көрмеген соң айта алмаймын. Бірақ соңғы кезде пайдаланып жүрген жоқпын. Тек іссапарға шығатын болсам ғана қолданамын. Түссіз. Иіссіз. Мүлдем. Дəріханаларда сатылады. Бағасы 4700-5000 теңге.

100% органик - Dr. Hauschka Sage. Құтысының өзі шыны. Иісі жалбыз бен шалфей аралас. Иісі бар дезодоранттар ұнамайды маған. Сəл ұзағырақ кебеді. Тренажер залына бардым. Терледім. Бірақ ақ футболкамда ізі, иісі қалмады. Есесіне табиғи. Құрамында спирт жоқ. Қазір негізгі қолданатыным осы. Бағасы 5500 теңге. Интернет дүкендерде одан да арзан болуы мүмкін.

Нивея "Невидимая защита" антиперспиранты. Əсері 48 сағат дейді. Бірақ екі тəулікке жетпейді. Із, иіс қалдырмайды. Тез кебеді. Мұның да иісі бар аздап, бірақ тез кетіп қалады. Тершеңдікпен күреседі. Бірақ 100% емес. 87-90% болар. Бағасы 600-700 теңге аралығында. Бағасын ескерсек, сапасы жарайды. Сүйікті құралым бола алмады. Пышылдағаны ұнамайтындықтан шығар...

Бары осы, əзірге. Өзіңізге ыңғайлы дезодорантты ертерек таңдаған жөн. Жазда байқаған шығарсыз, кей əйелдің қолтығы қара болып тұрады. Кір болып көрінуі мүмкін. Бірақ бұл қырыну, нашар дезодорант сияқты негатив факторларға байланысты терінің құрғауынан болатын жағдай.