Boyovutda Mobil bog‘cha foydalanishga topshirildi
@BoyovutliklarOlin xabar berganimizdek, Boyovut tumanida mobil maktabgacha ta’lim tashkilotlari maktabgacha yoshdagi bolalar nisbatan kam qamrab olingan 3 ta hududda tashkil etilmoqda.
Shundan “Tinchlik” mahallasi hududida hozirlangan yer maydoniga mobil maktabgacha ta’lim tashkilotining o‘yin maydonchasi qurilishi tugallanib, foydalanishga topshirildi.
Tadbirda Sirdaryo viloyati maktabgacha ta’lim boshqarmasi boshlig‘i o‘rinbosari G.Parpiyeva, Boyovut tumani hokimi hokimining yoshlar siyosati, ijtimoiy rivojlantirish va ma’naviy-ma’rifiy masalalar bo‘yicha o‘rinbosari R.Dusmuratov hamda tuman maktabgacha ta’lim bo‘limi mudiri B.Xolmuxammedovalar qatnashdi.
Mazkur mobil maktabgacha ta’lim tashkiloti foydalanishga topshirilishi munosabati bilan ushbu hududga yaqin joylashgan 3 ta aholi punktidan 110 nafar bolalar qamrab olindi.
Ma’lumot o‘rnida aytib o‘tishimiz kerakki, mobil maktabgacha ta’lim tashkilotida ta’lim-tarbiya jarayoni 3,5 soatdan 2 smenada tashkil etilmoqda. Eng asosiysi mobil bog‘cha uchun ota-ona badali talab qilinmaydi.
Boyovut tumani hokimligi axborot xizmati