Биз сизга «Toyota Motor» компаниясининг асосчиси Киичиро Тоёда ҳақида ҳикоя қилишни ният қилдик.
Киичиро Тоёданиёшлиги.
Киичиро Тоёда 1894 йил 11 июнда Япониянинг Сидзуока (Shizuoka) вилоятида туғилган. У икки ёшда тўлганда баъзи бир сабабларга кўра ота- онаси ажрашган. Киичиронинг отаси Сакичи Тоёда фарзандини ўзи билан олиб қолиб, иккинчи бор уйланади ва Айко исмли қиз фарзандлик бўлади. Киичиронинг отаси машҳур муҳандис ва ихтирочи бўлган. У Японияда биринчи бўлиб «Toyodа электр тикув машинаси» ни ихтиро этган. Умри давомида ихтиролари учун 85 та патент олган ва «япон ихтирочиларининг қироли» номига эришган. Шу сабабли ҳам Киичиро ёшлигидан отасига ўхшаб ихтирочи бўлишни орзу қилган.
1921 йил Киичиро Тоёда синглиси Айко ва унинг эри Рисабуро билан АҚШга, кейинчалик Англияга ташриф этиб тўқимачилик корхоналарида малака оширдилар.
1924 йил Киичирони отаси Сакичи Тоёда дунёда биринчи бўлиб «Automatic Loom Type G» русумли автоматик тикув ускунасини ихтиро этди. 1926 йил ноябрь ойида Сакичи Тоёда «Тoyoda Automatic Loom Works» компаниясини рўйхатдан ўтказди. Компания президенти этиб қизи Айконинг эри Рисабуро тайинланди. 32 ёшлик Киичиро эса компания бошқарувчиси лавозимига тайинланди. Икки йилда Сакичи Тоёда ихтиро этган ускуна учун буюртмалар сони 4000 донадан ошиб кетди.
Ота ва ўғилнинг Япония иқтисодиётини ривожланишига қўшган ҳиссаси Япония императори томонидан муносиб тақдирланди. Сакичи Тоёда 1926 йил, Киичиро Тоёда 1938 йили Император академиясининг юксак мукофоти билан тақдирланганлар.
Автомобилсозлик соҳасидаги ютуқлари.
Киичиронинг отаси АҚШ да ташриф этган вақтида автомобилсозлик соҳасида бўлаётган ўзгаришларнинг кўриб автомобиль ишлаб чиқариш келажакда катта моддий фойда олиб келишини англайди. Сакичи Тоёда Киичирони автомобиль ишлаб чиқариш билан шуғулланишни маслаҳат беради. Шундан сўнг, Тоёдалар оиласи ихтиро этилган тикув ускуналарини патентини сотиб автомобилсозлик билан шуғулланишга қарор қилишади. Шу мақсадда Киичиро 1929 йилнинг декабрь ойида Англияда бўлиб «Platt Brothers» компанияси раҳбарлари ака-ука Платтларга тикув ускуналарини патентини сотади. 1930 йил Киичиро Японияга қайтиб муҳандислар жамоаси билан янги автомобиль ихтиро қилишни бошлайди.
1930 йилда Киичиро Японияда ўтказилган миллий автомобилсозликни ривожлантириш лойиҳасида иштирок этади. Лойиҳадаги иштирок Киичирога катта тажриба беради.
Биринчи автомобилни ишлаб чиқариш.
Биринчи автомобилни яратиш учун Киичиро ўз муҳандислари билан АҚШда ишлаб чиқарилган автомобилларни ҳар бир эҳтиёт қисмини чуқур ўрганиб малака оширишди.
1935 йилнинг май ойида асосан Американинг General Motors ва Chevrolet компаниялари ишлаб чиқарган автомобилларига ўхшаш Model A1 русумли автомобиль ишлаб чиқарилди.
1938 йил шахсан Киичиро раҳбарлиги остида такомиллашган Model АА русумли автомобиль ишлаб чиқилди. Бу автомобилга асосий «форд» ва «шевроле» автомобилларининг эҳтиёт қисмларидан фойдаланилган. Шунинг учун таъмирлаш ёки техник хизмат кўрсатиш жараёнида катта муаммолар юзага келмаган.
1935 йили Япониянинг Савдо ва Харбий саноати Киичиро Тоёданинг «Toyoda Automatic Loom Works» компаниясига юк автомобилларини ишлаб чиқариш бўйича таклиф беради. Бунинг учун Киичиро 1934 йилда ишлаб чиқилган «Ford» юк автомобили харид қилади, эҳтиёт қисмларга бўлиб чуқур ўрганиб чиқилади ва 1935 йил компания ўзининг G1 русумли юк автомобилларини ишлаб чиқаришни бошлайди.
1936 йил сентябрь ойида «Toyoda Automatic Loom Works» компанияси енгил ва юк автомобилларини ишлаб чиқариш бўйича давлат лицензиясини қўлга киритади.
1936 йили Киичиро Тоёда Япониянинг Коромо (1959 йилдан бери Тоёта) шаҳрида автомобиль ишлаб чиқарувчи завод қуради. 1937 йили Киичиро Тоёда 100 минг фунт стерлинг қийматида 3000 автомобиль ишлаб чиқариш бўйича давлат буюртмасини олади.
Ишлаб чиқарилган автомобилларга янги мижозларни жалб қилиш учун Киичиро Тоёда дилерлар тизимини яратади. 1936 йилда еттита дилерлик компанияси фаолият олиб борган бўлса, бир йилдан кейин бундан компаниялар сони йигирма иккитага, 1939 йилга келиб Япония, Корея ва Тайванда жами ўттиз еттита дилерлик хизмат кўрсатиш компанияси фаолият олиб боради.
Компания логотипи ва номини яратилиши.
1937 йил 28 август куни «Toyota Motor Co., Ltd» (ҳозирда Toyota Motor Corporation) компанияси расман рўйхатга олинган. Киичиро Тоёда компания вице-президенти, синглисини эри Рисабуро 1941 йилгача компания президенти лавозимида фаолият олиб боришган. Киичиро компания логотипини яратиш бўйича конкурс эълон қилади. Кўриб чиқилган 27 мингдан кўп эскизлар орасида биттаси танлаб олинади. Логотипда компания, мижозлар ва рақобатчилар уйғунлиги акс эттирилган.
Компания ўз логотипини эълон қилиш билан бирга компаниянинг номи «Тоёда» дан «Тоёта» га алмаштирилди.Бунинг асосий сабаби Япон иероглифига боғлиқ.
Компаниянинг 1941- 1945 йиллардаги фаолияти.
Иккинчи жаҳон уруши даврида «Toyota Motor» компанияси ҳарбий эҳтиёж учун Мудофаа вазирлиги буюртмалари бўйича автомобиллар ишлаб чиқарди. 1941 йил Киичиро Тоёда компания президенти лавозимига тайинланади.
Урушдан кейинги 1945-1950 йиллар.
Урушдан кейинги даврда «Toyota Motor» компанияси учун бутун Япония давлати каби жуда оғир бўлган. Компания ишчилари оч қолмаслиги учун завод ҳудудида сабзавот ва мевалар етиштирилган, паррандачилик ва балиқчилик билан шуғулланилган, шунингдек, чойнак, дазмол ва шунга ўхшаш бошқа уй рўзғор буюмлари ишлаб чиқарилган.
Шу даврда «Toyota Motor» компанияси халқ орасида Toyopet –«Митти -Тоёта» номини олган кичик ҳажмдаги SA русумли автомобилларни ишлаб чиқаришни йўлга қўйди. Бу автомобиллар на фақат Японияда сотилди балки Тайван ва Коста-Рикога экспорт қилинди.
1946 йилдан 1948 йилгача компания 75 минг енгил ва 16 минг юк автомобилларини ишлаб чиқарди. ХХ- асрнинг 50- йилларининг бошида Япон иқтисодиётини ривожланиши учун маҳаллий банклар томонидан берилган ёрдам туфайли «Toyota Motor» компанияси ишлаб чиқарилаётган автомобиллар русуми ва сонини оширишга эришди. ХХ- асрнинг 50- йилларнинг бошида компания 11 минг, 1955 йил 2786 дона автомобиль ишлаб чиқарарди. 1955 йилга келиб «Toyota Motor» компанияси автомобиль ишлаб чиқарувчи йирик компанияга айланди. Аммо, компания асосчисиКиичиро Тоёдага бундан кунларни кўриш насиб этмади.
Киичиро Тоёда 1952 йилнинг 27 март куни юраги хасталиги сабабли вафот этди.Уч ойдан сўнг синглисини эри компаниянинг биринчи президенти Рисабуро Тоёда ҳам вафот этди.
Ҳозирги вақтда «Toyota Motor» компаниясининг автомобиллари юқори сифати билан ажралиб туради. Компания ўз маҳсулотларини доимий равишда такомиллаштириб келмоқда.
2019 йилда компания 272,1 миллиард долларлик маҳсулот сотиб, 17,2 миллиард доллар фойда кўрган. Компанияда 370 мингдан ортиқ ишчи меҳнат қилади, йилига 5,5 миллион автомобиль ишлаб чиқарилади. «Toyota Motor Corporation» компанияси «Nissan Motor Company» ва «Honda Motor Company» билан биргаликда Япониянинг гигант компаниялари рўйхатига киради.
Киичиро Тоёдани оиласи.
Киичиро Тоёда Японияда Takashimaya универмаглар мажмуасининг асосчиси Иида Шиншичининг қизи Хатако Шиншичига уйланган. Уларнинг 1925 йилда туғилган Шойчиро ва 1929 йилда туғилган Татсуро исмли фарзанд кўришган. Фарзандлари оилавий бизнесни бошқаришда фаол иштирок этишган.
Киичиронинг катта ўғли Шойчиро Тоёда 1952 йилдан компанияда хизмат қилган. 1967 йил бошқарувчи директор лавозимига тайинланган. 1982 йилдан 1992 йилгача компания президенти лавозимида фаолият олиб борган. Унинг раҳбарлиги остида Lexus ва Prius русумли автомобиллар ишлаб чиқарилган. Forbes журналининг 2019 йилда берган маълумотига кўра Шойчиро Тоёданинг бойлиги 400 миллион доллар баҳоланган.
Киичиронинг кичик ўғли Татсуро Тоёда 1953 йилда компанияда меҳнат фаолиятини бошлаган.1986 йил бошқарувчи директор лавозимига тайинланган. 1988 йили компания вице-президенти, 1992 йилдан 1995 йилгача компания президенти (рўйхат бўйича еттинчи) лавозимида хизмат қилган.
Киичиронинг невараси Акио Тоёда 1984 йилдан бери компанияда меҳнат қилади. 2009 йилда компания президенти (рўйхат бўйича ўн биринчи) лавозимида тайинланди. Акио Тоёда Forbes журналининг «2018 йилнинг энг нуфузли инсонлар» рўйхатида 29-ўринни эгаллаган.
Киичиро Тоёданинг номи 2018 йил 19 июль куни Детройтдаги Автомобиллар шон-шараф (Automotive Hall of Fame) музейига киритилди.
«Toyota Motor» компанияси жуда қийин даврни бошидан кечирган. Аммо, Киичиро Тоёданинг меҳнатсеварлиги, қатъийлиги, узоқни кўра билиши, адолатли бизнес олиб бориши ва доимий юқори мақсадларга эришишга ҳаракат қилиши Япония автомобилсозлигини юқори чўққиларга чиқишига катта ҳисса қўшган.
