2222

အပိုင်း(၂၂၂၂)

မည်သည်မှမရရှိ

ရီဖူရှင်းတို့အဖွဲ့က ကြယ်ကောင်းကင်အောက်ခြေ၌ ရပ်နေခဲ့သည်။ သူတို့ အထက်တွင် စီဝေ့မဟာအင်ပါယာ၏ မျက်နှာ ရှိနေခဲ့သည်။ သူ၏ ကြီးမားသော မျက်နှာကြီးက ကြယ်ကောင်းကင်နှင့် တသားတည်း ဖြစ်နေ၏။ သူတို့က ထိုမျက်နှာအား မော့ကြည့်နေရင်း သူတို့ကိုယ်၌က အလွန် သေးငယ်နေသလို ခံစားလိုက်ရသည်။ သူတို့သည် သမုဒ္ဒရာအတွင်းမှ သဲတစ်ပွင့်ကဲ့သို့ သေးနုပ်လှပေသည်။

တည်ငြိမ်သော အရှိန်အဝါက ဆက်လက် တည်ရှိနေသည်။ ကြယ်ကောင်းကင်၏ ထိုနေရာတွင် ရီဖူရှင်းက ငြိမ်သက်အေးချမ်းစွာ ရှိနေခဲ့သည်။ အလွန် နည်းပါးသော လူအချို့သာ စကားပြောနေ၏။ သူတို့အားလုံးက ကြယ်ကောင်းကင်သို့ တိတ်ဆိတ်စွာ မော့ကြည့်နေခဲ့ကြသည်။ 

သူတို့က စီဝေ့မဟာအင်ပါယာ ပုံရိပ်၏ လျှို့ဝှက်ဆန်းကြယ်မှုကို နားမလည်နိုင်လျှင်ပင် ထိုနေရာ၌ ရပ်နေရုံနှင့် သူတို့က မတူညီသော အရာများကို လေ့လာမိနေဆဲ ဖြစ်သည်။ ထိုသည်မှာ သူတို့၏ စိတ်အခြေအနေကို သက်ရောက်စေသော နားလည်မှုဖြစ်လေသည်။ 

ထိုလူများအားလုံးက ဘုံအသီးသီးမှ အထူးချွန်ဆုံး ပုဂ္ဂိုလ်များ ဖြစ်ကြသည်။ ကောင်းကင်ဒေသမှ လူများကို ဥပမာပေးရလျှင် နယ်မြေဆယ့်ရှစ်ခု၏ နယ်မြေသခင်အိမ်တော်များမှ အဓိကပုဂ္ဂိုလ်များက ဤနေရာ၌ ရောက်နေကြသည်။ သူတို့အပြင် အင်အားစုကြီးများမှ အစွမ်းထက်ကျင့်ကြံသူအချို့၊ နတ္ထိတောင်တန်းဘုံမှ ကျင့်ကြံသူများနှင့် မှော်နက်လောကမှ ထိပ်သီးကျင့်ကြံသူများ ပါဝင်ပေသည်။ 

သူတို့၏ သက်ဆိုင်ရာဘုံများတွင် အားလုံးက အစွမ်းထက် တည်ရှိမှုများ ဖြစ်ကြသည်။ သူတို့က ပြိုင်ဘက်ကင်းပြီး ဝေးကွာလှသော နေရာများထိပင် ကျော်ကြားကာ လူအများ၏ ချီးကျူးခြင်းကို ခံကြရသူများ ဖြစ်သည်။ သို့သော် ဤနေရာတွင် သူတို့က အထွတ်အထိပ်၌ ရပ်တည်နေသူများမဟုတ်တော့ပေ။ နတ်ဘုရားတစ်ပါး၏ ရှေ့ ဤကြယ်ကောင်းကင်အောက်၌ လူတိုင်းက သေးနုပ်နေသလို ခံစားကြရပေသည်။ စကြဝဠာတစ်ခွင်လုံးနှင့် နှိုင်းယှဥ်ရလျှင် သူတို့က သေးငယ်နေဆဲပင် ဖြစ်၏။ သူတို့က ထိုမျှ မြင့်မားသော အဆင့်ထိ ကျင့်ကြံထားကြလျှင်ပင် ဤလောက၏ လျှို့ဝှက်ချက်များကို ထုတ်ဖော်နိုင်ရန် အဆင့်မမီသေးဘဲ ရှိနေပေသည်။ 

ဤသို့သော ပတ်ဝန်းကျင်မျိုးတွင် သူတို့က ထိုသို့သာ ခံစားကြရမည် ဖြစ်သည်။ 

အချို့က မဟာအင်ပါယာ၏ ခမ်းနားထည်ဝါမှုကို လေ့လာနေပြီး အချို့က ကျယ်ပြောလှသော ကြယ်ကောင်းကင်ကို လေ့လာနေသည်။ 

ရီဖူရှင်းသည် အမျိုးမျိုးသော ကျင့်ကြံသူတို့က ကြယ်ကောင်းကင်အောက်တွင် ရပ်နေကြသော်လည်း အုပ်စုသုံးစုကွဲနေပုံရသည်။ သူသည် ၎င်းက ရည်ရွယ်ချက်ရှိရှိ ဟုတ်မဟုတ် မသေချာပေ။ ဤအုပ်စုသုံးခုကြားတွင် ကောင်းကင်ဒေသမှ ကျင့်ကြံသူများက အရေအတွက်အများဆုံး ဖြစ်ပေသည်။ 

အခြားအဖွဲ့နှစ်ဖွဲ့က နတ္ထိတောင်တန်းဘုံနှင့် မှော်နက်လောကမှ ကျင့်ကြံသူများ ဖြစ်ကြသည်။ 

"ရန်​ဟောင်ရီ ဟိုးတုန်းက စီဝေ့မဟာအင်ပါယာရဲ့ ဒဏ္ဍာရီတွေကို ကြားဖူးလား။" ရန်ဟောင်တစ်ပါးက ရီဖူရှင်း၏ ဘေးသို့ လျှောက်လာရင်း ပြောလိုက်သည်။ ရီဖူရှင်းက ခေါင်းကို ယမ်းရင်း ပြန်ဖြေလိုက်သည်။ "ကျုပ် မဟာအင်ပါယာရဲ့ အကြောင်းကို နည်းနည်းလေးပဲ သိတာ။ ကျေးဇူးပြုပြီး ပြောပြပေးနိုင်မလား။" 

"ဒဏ္ဍာရီတွေက ပြောတာတော့ စီဝေ့မဟာအင်ပါယာက ဒီကြယ်ကမ္ဘာကို စုစည်းခဲ့ပြီး အုပ်ချုပ်သူ ဖြစ်လာခဲ့တယ်တဲ့။ စီဝေ့ကြယ်ကမ္ဘာထဲက ကြယ်တွေမှာ နေထိုင်တဲ့လူတွေအားလုံး သူ့ကို လေးစားကြတယ်။ သူ့အပြင် ဒီကြယ်ကမ္ဘာထဲမှာ တခြား မဟာအင်ပါယာ နည်းနည်း ရှိပြီးတော့ သူတို့တစ်ယောက်ချင်းစီက ကိုယ်ပိုင်နယ်မြေကို အုပ်စိုးနိုင်တဲ့ အဆင့်အတန်းကို ပိုင်ဆိုင်ထားကြတယ်။ စီဝေ့မဟာအင်ပါယာက သာမန်မဟာအင်ပါယာ မဟုတ်ဘူး။ သူ့လက်အောက်မှာ မဟာအင်ပါယာအဆင့် ပုဂ္ဂိုလ်တွေ ရှိပြီး သူ့ကို စီဝေ့ကြယ်အရှင်လို့လည်း ခေါ်ကြတယ်။ သူက ကြယ်တွေရဲ့ အရှင်သခင်လို့ ကျော်ကြားတယ်။" ကျင့်ကြံသူက ပြောလိုက်သည်။ "ဒီကြယ်ကမ္ဘာကို ကပ်ဘေးမတိုင်ခင်မှာ စီဝေ့မဟာအင်ပါယာက ချိပ်ပိတ်ခဲ့တာ။ အခုတော့ ဒါက အရင်ကနဲ့မတူတော့ပါဘူး။ အရင်ကတော့ အခုထက်ပိုပြီး ကြီးမားကျယ်ပြန့်ခဲ့တာပေါ့။ သေချာပြောဖို့ခက်တယ်။ စီဝေ့ မဟာအင်ပါယာရဲ့ ပုံရိပ်ဖြစ်လာအောင် ပေါင်းစည်းထားတဲ့ ကြယ်တွေကြားမှာ ဒီကြယ်ပေါ်က တခြားကျင့်​ကြံသူတွေရော ရှိနိုင်မလား။" 

ရီဖူရှင်းက ခေါင်းညိတ်လိုက်သည်။ မဟာအင်ပါယာများတွင်လည်း စွမ်းအားအဆင့်များ ရှိကြပေသည်။ ယခင်က ကောင်းကင်လမ်းစဥ်ပြိုမကျခင် နတ်ဘုရားများခေတ်တွင် နတ်ဘုရားများက လောကကို အုပ်စိုးကြသည်။ ထိုစဥ်အချိန်၌ မဟာအင်ပါယာအဆင့် တည်ရှိမှုများက အများအပြား ရှိနေမည်မှာ သေချာပေသည်။ သူတို့ကြား၌လည်း ပို၍ ထူးချွန်ထက်မြက်သူများ ရှိနေမည်မှာ သဘာဝပင် ဖြစ်သည်။ စီဝေ့မဟာအင်ပါယာက သူတို့ထဲမှ တစ်ယောက် ဖြစ်သည်။ သူက ကြယ်ကမ္ဘာတစ်ခုလုံးကို အုပ်စိုးသည့် ကြယ်အရှင်သခင် ဖြစ်​လေသည်။

မဟာအင်ပါယာရှန်ကျားကလည်း အစွမ်းထက်သော မဟာအင်ပါယာတစ်ပါး ဖြစ်သည်။ မဟုတ်လျှင် သူက လမ်းစဥ်မရှိသော လောကဟု ပြောရဲလိမ့်မည် မဟုတ်ပေ။ သူက ကောင်းကင်နန်းတော်နှင့် ကောင်းကင်လမ်းစဥ်ကို စိန်ခေါ်ချင်နေခဲ့သည်။ 

ထိုခမ်းနားထည်ဝါသော ခေတ်ကာလအတွင်း အမျိုးမျိုးသော နတ်ဘုရားများက အချင်းချင်း ယှဥ်ပြိုင်ကြသောအခါ ထူးချွန်လှသော ပြိုင်ဘက်ကင်း နတ်ဘုရား မည်မျှများများ ရှိနေလိမ့်မည်နည်း။ 

ရီဖူရှင်းသည် ထိုသို့သော ခေတ်ကာလကိုသာ ပြန်ရောက်သွားနိုင်လျှင် သေချာပေါက် စိတ်လှုပ်ရှားစရာကောင်းလိမ့်မည်ဟု တွေးမိပေသည်။ 

ကံမကောင်းစွာဖြင့် ထိုကဲ့သို့ ခေတ်အခါကို နောက်တစ်ကြိမ် ပြန်လည်ရောက်ရှိရန် မဖြစ်နိုင်ပေ။ 

"ကောင်းပြီ။ ရန်ဟောင်ရီ ဆက်ပြီး လေ့လာဖို့ ကျုပ် သွားလိုက်ဦးမယ်။" ထိုရန်ဟောင်က ပြောလိုက်သည်။ ရီဖူရှင်းက ခေါင်းကို ညိတ်လိုက်ပြီး ထပ်မပြောတော့ပေ။ သူက ကြယ်ကောင်းကင်သို့ ဆက်လက် မော့ကြည့်နေခဲ့သည်။ မှိန်ဖျော့သော ခံစားချက်တစ်ခုက သူ့စိတ်ထဲတွင် ထင်ဟပ်လာသည်။

သူက စိတ်ကို ရှင်းလင်းရန် ကြိုးစားခဲ့၏။ သူ၏ စိတ်အာရုံက နဂါးငွေ့တန်းအတွင်း သွားလာနေခဲ့သည်။ သူ၏ စိတ်အာရုံသည် ထိုနေရာတစ်ဝိုက်တွင် မျောလွင့်ကာ အဆုံးမဲ့ ကြယ်ကောင်းကင်၌ လှည့်လည်သွားလာနေ၏။

၎င်းက ဝင်္ကပါအစီအရင်တစ်ခု ဖြစ်နိုင်သလားဟု ရီဖူရှင်းက တွေးလိုက်သည်။ သို့သော် ဤသန်းချီသော ကြယ်များမှ မည်သို့သော ဝင်္ကပါအစီအရင်မျိုး ဖြစ်တည်နိုင်ပါမည်နည်း။ 

၎င်းကို ထုတ်ဖော်ရန်က သူ့အတွက် လွယ်ကူလိမ့်မည် မဟုတ်ပေ။ အဖြစ်နိုင်ဆုံးမှာ ဤနေရာရှိ ကျင့်ကြံသူများအားလုံးသည်လည်း ၎င်းကို ဖော်ပြနိုင်စွမ်း ရှိလိမ့်မည် မဟုတ်ပေ။ မဟာအင်ပါယာအဆင့် တည်ရှိမှုသည်သာလျှင် ကြယ်များကို အသုံးပြု၍ ဝင်္ကပါကို တည်ဆောက်နိုင်ပေလိမ့်မည်။ 

သူ၏ စိတ်အာရုံက လေဟာနယ်အတွင်း မျောလွင့်နေရင်း သူက ကြယ်ကောင်းကင်အတွင်း ထူးထူးခြားခြား တောက်ပသော အလင်းတန်းတစ်ခုကို မြင်တွေ့လိုက်ရသည်။ ၎င်းသည် မဟာအင်ပါယာ၏ လက်ထဲရှိ ကောင်းကင်စာလိပ်မှ ဖြစ်သည်။ ယင်းက လျှို့ဝှက်ဆန်းကြယ်ပုံပေါ်သည်။ မဟာအင်ပါယာသည် ၎င်းကို သူ့လက်ထဲ၌ ကိုင်ထားသော်လည်း သူတို့က မထိတွေ့နိုင်ပေ။ တစ်စုံတစ်ယောက်က ထိုသို့ လုပ်ဆောင်ရန် ကြိုးစားခဲ့ဖူးသည်။ သူတို့သာမကဘဲ လွန်ခဲ့သော နှစ်များတလျှောက် စီဝေ့အင်ပါယာနန်းတော်မှ ကျင့်ကြံသူများသည် ထိုသို့ လုပ်ဆောင်နိုင်ခဲ့ကြခြင်း မရှိပေ။ ထို့​ကြောင့် ရီဖူရှင်းသည် ကောင်းကင်စာလိပ်ကို ပိုင်ဆိုင်ရန် ကြိုးစားခဲ့ခြင်း မရှိပေ။ ထိုသို့ လုပ်ဆောင်ခြင်းက ရူးမိုက်သည်သာ ဖြစ်၏။ 

သူသည် စီဝေ့မဟာအင်ပါယာ၏ ပုံရိပ်နောက်ကွယ်မှ လျှို့ဝှက်ဆန်းကြယ်မှုကို ဖြစ်စေ ထိုအတွင်း၌ ပုန်းကွယ်နေသော လျှို့ဝှက်ချက်ကို ဖြစ်စေ ရှာတွေ့နိုင်ရန်သာ မျှော်လင့်မိသည်။

သူ၏ စိတ်အာရုံက ကြယ်ကောင်းကင်တစ်ခွင်၌ အချိန်အကြာကြီး လှည့်လည်သွားလာနေသည်။ သို့သော် သူက မည်သည့်အရာကိုမှ ဖမ်းဆုပ်နိုင်ခြင်း မရှိသေးပေ။ ရီဖူရှင်းသည် ကျယ်ပြောလှသော ကြယ်ကောင်းကင်နှင့် နဂါးငွေ့တန်း၏ ခမ်းနားထည်ဝါမှုကိုသာ အာရုံခံနိုင်ပြီး သူက မည်မျှ သေးငယ်ကြောင်းကိုသာ ခံစားမိပေသည်။ ကောင်းကင်စွမ်းအားများက လေဟာနယ်အတွင်း လင်းလက်နေပြီး ရှေးခေတ်အခါကကဲ့သို့ ထင်မှတ်ရသည်။ သူက ထိုနေရာ၌ ရပ်နေသော်လည်း အခြားမည်သည့်အရာကိုမှ အာရုံခံနိုင်ခြင်း မရှိပေ။ 

သူက ထိုသို့ဆက်လုပ်နေပါလျှင် လောကအတွင်း ထိုးထွင်းသိမြင်မှုအချို့ ရလာနိုင်သော်လည်း စီဝေ့မဟာအင်ပါယာ၏ လျှို့ဝှက်ချက်အား ဖော်ထုတ်ရန် မဖြစ်နိုင်သေးပါချေ။

ရီဖူရှင်းက သူ၏ စိတ်အာရုံကို ပြန်ဆုတ်ခွာလိုက်ပြီး မျက်လုံးများဖွင့်ကာ ကြယ်ကောင်းကင်နှင့် စီဝေ့မဟာအင်ပါယာ၏ ပုံရိပ်ကို ကြည့်ကာ စိတ်ထဲမှ သက်ပြင်းချလိုက်သည်။ သူသည် ဤလျှို့ဝှက်ဆန်းကြယ်မှုကို ဖော်ထုတ်ရန် စိန်ခေါ်ရလိမ့်မည်ဟု ခံစားမိပေသည်။

ရီဖူရှင်းက အခြားလူများကို ကြည့်လိုက်​ပြီး မျက်မမြင်ထျယ်နှင့် ဖန်းကိုင့်ကို မေးလိုက်သည်။ "တစ်ခုခုများ နားလည်နိုင်ကြလား။" 

ဖန်းကိုင့်က ခေါင်းကို ယမ်းရင်း ပြန်ဖြေလိုက်သည်။ "ဒီမှာ ရှိနေတဲ့တလျှောက် ကျုပ်ရဲ့ ဘဝတစ်သက်တာ ကျင့်ကြံခြင်းတွေက ဘာမှမဟုတ်ဘူးဆိုတာကိုပဲ ခံစားမိတယ်။" 

အခြားတစ်ဖက်၌ မျက်မမြင်ထျယ်က ပြောလိုက်သည်။ "စီဝေ့မဟာအင်ပါယာက တကယ်ပဲ သူ့ရဲ့ စွမ်းအားတစ်ပိုင်းတစ်စကို ထားခဲ့တယ်ဆိုရင် ကောင်းကင်က ကြယ်တွေအားလုံးကို ဖြိုချလိုက်ရင် ဘယ်လိုဖြစ်ကုန်လိမ့်မလဲ။" 

“…” ရီဖူရှင်းက မျက်မမြင်ထျယ်ကို အံ့အားတသင့်ကြည့်လိုက်သည်။ ထိုသူတွင် စိတ်ဝင်စားစရာကောင်းသော စဥ်းစားတွေးခေါ်သည့် နည်းလမ်းရှိပေသည်။

သို့သော် ရီဖူရှင်းက ထိုအကြောင်းကို တွေးဆကြည့်လိုက်သည်။ အကယ်၍ ကြယ်များအားလုံး ပြိုကျသွားပါက မည်သို့ ဖြစ်လိမ့်မည်နည်း။

လောကတစ်ခုလုံး ​ပျက်စီးသွားနိုင်ချေများပေသည်။​ဤကြယ်ကမ္ဘာတစ်ခုလုံးသည်ပင် ဖျက်ဆီးခံလိုက်ရနိုင်သည်။

ဤသည်က စီဝေ့မဟာအင်ပါယာ၏ စွမ်းအားပေလား။ ကြယ်အရှင်သခင်တစ်ပါးအနေနှင့် သူက ကောင်းကင်ရှိ ကြယ်များအားလုံးကို ထိန်းချုပ်နိုင်ပေသည်။ 

"ရန်ဟောင်ရီ တစ်ခုခုများ နားလည်နိုင်ခဲ့သေးလား။" ရီဖူရှင်းက လေ့လာနေသည့် အ​ခြေအနေမှ ထွက်လာသည်ကို မြင်သည့်အခါ ရန်ဟောင်တစ်ပါးက မေးလိုက်သည်။ 

"ကံမကောင်းစွာနဲ့ မလုပ်နိုင်ခဲ့ဘူး။" ရီဖူရှင်းက ခေါင်းယမ်းရင်း ပြန်ဖြေလိုက်သည်။ 

ထိုလူက ပြောလိုက်သည်။ "ဘာမှမဖြစ်ပါဘူး။ လွန်ခဲ့တဲ့ ရက်တွေမှာ ကျင့်ကြံသူတွေအများကြီး ဒီမှာ စုဝေးနေပေမယ့် ကျုပ်တို့အားလုံး လုံလုံလောက်လောက် နားလည်သဘောပေါက်နိုင်တာမျိုး မရှိခဲ့ဘူး။ စီဝေ့မဟာအင်ပါယာရဲ့ ပုံရိပ်ကို​ဖြစ်ပေါ်လာစေတဲ့ ထူးခြားတဲ့ ကြယ်တွေရဲ့ တည်ရှိမှုကို ခံစားနိုင်တဲ့ လူတချို့တော့ ရှိတယ်။ ဒါပေမယ့် သူတို့ရဲ့ တွေ့ရှိမှုက အခုထိ မရှင်းလင်းတာကြောင့် အများကြီး အသုံးဝင်မှာတော့ မဟုတ်ဘူး။" ရီဖူရှင်းက ကြယ်ကောင်းကင်ကို မော့ကြည့်လိုက်သည်။ သူက ထိုကြယ်များကို အာရုံခံနိုင်သည်လား။ 

"ကျုပ် တစ်ခုခု ရှာတွေ့နိုင်လားလို့ ကြည့်ကြည့်လိုက်ဦးမယ်။" ရီဖူရှင်းက ပြောလိုက်သည်။ "သတိပေးတာ ကျေးဇူးတင်ပါတယ်။" 

"ဒါက အသုံးဝင်တဲ့ သဲလွန်စမဟုတ်ပါဘူး။" တစ်ဖက်လူက ပြုံးကာ ခေါင်းကို ယမ်းလိုက်ရင်း အာရုံထပ်မစိုက်တော့ပေ။ ရီဖူရှင်းက မျက်လုံးများကို တစ်ဖန် ပြန် မှိတ်လိုက်သည်။ သူ၏ စိတ်အာရုံက ကြယ်ကောင်းကင်သို့ ရောက်ရှိသွားပြီး စီဝေ့မဟာအင်ပါယာ၏ ပုံရိပ်ကို ဖြစ်ပေါ်လာစေသော ကြယ်များထံ ဦးတည်သွားခဲ့သည်။ သူတို့၏ ကောက်ချက်ချမှုကို အခြေခံလျှင် ထိုကြယ်များကြား၌ တစ်စုံတစ်ခု ရှိနိုင်ပေသည်။

***