Биз сизга жаҳонга машҳур Mercedes-Benz автомобиллари ҳақида ҳикоя қилишга қарор қилдик.
Mercedes-Benz енгил ва юк автомобиллари, автобуслар ҳамда бошқа транспорт воситаларини ишлаб чиқарувчи компания. Компания «Daimler AG» концернига тегишли. Mercedes-Benz штаб-квартираси Германиянинг Штутгарт шаҳрида жойлашган.
Mercedes-Benz савдо маркаси 1926 йил икки рақобатчи Benz & Cie (асосчиси Карл Бенц) ва Daimler-Motoren-Gesellschaft (асосчиси Готлиб Даймлер) компанияларини бир Daimler-Benz концернига бирлашиши натижасида юзага келган.
Тарихи
Mersedes-Benz автомобилларининг ишлаб чиқарилишини пойдевори қўйилган сана 1883 йил 1 октябрь куни «Бенц ва ко. Райнише Газмоторен-Фабрик, Мангейм» компанияси рўйхатга олинган кундан ҳисоблаш мумкин. Компанияга моҳир немец муҳандиси, автомобиль ишлаб чиқаришда биринчилардан бўлган Карл Бенц асос солган. Бенц компанияси томонидан биринчи автомобиль 1886 йил ишлаб чиқарилган.
Айнан шу даврда ва айнан шу давлатда Готлиб Даймлер исмли инсон томонидан 1890 йил «Даймлер-Моторен-Гезелльшафт» компаниясига асос солинган. Ушбу компания аввалига талаб катта бўлмаган автомобиллар ишлаб чиқарган. Готлиб Даймлернинг яқин дўсти ва ҳамкори Вильгельм Майбах томонидан 1901 йилда яратилган тўрт ғилдиракли автомобиллар компанияга биринчи муваффақият олиб келди. Кейинчалик «Даймлер-Моторен-Гезелльшафт» компанияси ўз автомобилларини Мерседес номи билан ишлаб чиқаришни бошлаган.
Нима учун Мерседес?
Маълумотларга қараганда автомобиль Мерседес номини олишига Австрия-Венгриянинг Ницце шаҳридаги вице-консули ва бир вақтни ўзида Даймлер компаниясининг Франциядаги ваколатхонаси раҳбари Эмил Еллинекнинг тавсияси сабаб бўлган. Гап шундаки 1899 йили Даймлер компанияси автомобили Эмил Еллинекнинг қизи Мерседес номи остида Ниццеда бўлиб ўтган пойгада иштирок этиб муваффақиятга эришган. Бир йилдан сўнг Эмил Еллинек компанияга 36 дона автомобиль учун буюртма беради, фақат автомобильларнинг номи Мерседес бўлиши кераклиги ҳақида шарт қўяди. 36 дона автомобильга буюртма олиш катта муваффақият бўлгани сабабли компания Эмил Еллинекнинг шартига рози бўлади. Шундай қилиб 1902 йилдан Мерседес компаниянинг савдо белгиси бўлган.
Daimler-Benz концерни
«Даймлер Моторен Гезельшафт» компанияси автомобилларидан ташқари кема ва самолёт двигателлари ишлаб чиқарган. Шу сабабли ҳам «Мерседес» автомобилларининг логотипи уч нурли юлдуз компания двигателлари қуруқликдаги, сувдаги ва ҳаводаги муваффақиятини рамзий маънода англатади.
1926 йил Benz & Cie ва Daimler-Motoren-Gesellschaft компаниялари бирлашганидан сўнг ташкил этилган Daimler-Benz концерни Mercedes-Benz номи остида автомобиль ишлаб чиқаришни бошлайди. Янги ташкил этилган компания бош муҳандиси лавозимига машҳур немец ихтирочиси Фердинанд Порше тайинланди (Фердинанд Порше кейинчалик «Porsche» автомобилларини ишлаб чиқарувчи «Dr. Ing. h. c. F. Porsche Aktiengesellschaft» компаниясига асос солган). Порше 1930 йилгача компанияда ишлади. У автомобиль ишлаб чиқариш дастурини тубдан янгилаб, ўша давр талабидан келиб чиқиб янги техник инновацияларни жорий этди. Тез кунда Mercedes-Benz-S, Mercedes-Benz-SS ва спорт автомобили Mercedes-Benz-360 яратилди.
Иккинчи жаҳон уриши даврида Daimler-Benz фронт учун хар-хил русумли енгил ва юк автомобилларини ишлаб чиқарди. Уруш натижасида завод вайронага айланган эди. 1946 йилдан кейин ишлаб чиқариш аста-секинлик билан йўлга қўйилди.
ХХ- асрнинг 50- йилларида компания замон талабига мос бўлган автомобильларни ишлаб чиқара бошлади.
Қуйида биз шундай автомобильларнинг бир неча русуми ҳақида маълумот берамиз.
1953 йилдан 1962 йилгача ишлаб чиқарилган Е классдаги (бизнес) Mercedes-Benz 180 «Ponton», Mercedes-Benz W120 ва Mercedes-Benz 180 автомобиллари. Европа давлатлари учун намуна сифатида қабул қилинди.
Компанияда енгил автомобиллар ишлаб чиқариш билан бирга пойга автомобилларини яратишга ҳам катта эътибор берилди. Бу мақсадда компанияда алоҳида гуруҳ тузилди ва унинг аъзолари тадқиқотлар олиб борди. Гуруҳга Messerschmitt Bf.109 қирувчи самолётларини ишлаб чиқаришда иштирок этган муҳандислар жалб қилинди. Бунинг натижасида Mercedes-Benz W196 русумли пойга автомобили яратилди. Ушбу русумли автомобилда аргентиналик пойгачи Хуан-Мануэль Фанхио 1954 ва 1955 йиллардаги Формула 1 пойгасида ғалаба қозонди.
1963 йил Франкфуркда ўтказилган Мотор-Шоу кўргазмасида афсонавий лимузин Mercedes-Benz -600 (W100) автомобили намойиш этилди. автомобильга 250 от кучига эга 8 цилиндрлик двигатель ўрнатилган бўлиб, соатига 204 километр йўлни босиб ўтиши мумкин эди. 1981 йилгача ишлаб чиқарилган ушбу автомобиль ҳақида тушунчага эга бўлиш учун шуни таъкидлаш керакки, ишлаб чиқарилган автомобильларнинг ҳаммаси буюртма асосида қўлда йиғилган. Mercedes-Benz -600 (W100) ҳозирги вақтда ҳам коллекционерлар орасида жуда машҳур.
ХХ- асрнинг 70- йиллари бошларида компанияда ишлаб чиқарилган SL классдаги янги Mercedes-Benz R107 русумли автомобиллар тез кунда дунё бозорини, ҳаттоки америка бозорини эгаллади. Ушбу русумли автомобиль 1989 йилгача ишлаб чиқарилди. 1989 йил афсонавий Mercedes-Benz R107 автомобилларининг ўрнига кўриниши спорт автомобилларига ўхшаган Mercedes-Benz R129 русумли автомобилларини ишлаб чиқариш йўлга қўйилди.
1976 йилда ишлаб чиқарилган бизнес классдаги Mercedes-Benz W123 автомобили мутахассисларнинг фикри бўйича энг ишончли автомобиль ҳисобланади. Ҳозирги вақтда ҳам кўпгина давлатларнинг йўлларида ушбу автомобильни учратиш мумкин.
1982 йилдан 1993 йилгача ишлаб чиқарилган 75 дан 185 от кучигача эга бўлган двигателлар ўрнатилган Mercedes-Benz 190 автомобилларининг яратилишига италян муҳандиси Брунно Сакко иштирок этган. Автомобильнинг нархи ҳам қиммат бўлмаган. Ушбу русумдаги автомобильдан 11 йил ичида 1 800 000 дона ишлаб чиқарилган.
Компания 1991 йил март ойида Женевада бўлиб ўтган автосалонида S классдаги янги Mercedes-Benz W140 автомобилини намойиш этди. Ҳажми катта бўлган автомобилда компьютер ва V12 шаклидаги двигатель ўрнатилди.
1995 йилдан 2003 йилгача ишлаб чиқарилган Е классдаги Mercedes-Benz W 210 автомобилининг ташқи кўриниши ўзгартирилиб тўртта фара ўрнатилди. 8 йилда ушбу автомобильдан 1653 437 дона ишлаб чиқарилди.
Mercedes-Benz 1993 йилда бешта классдаги автомобиллар ишлаб чиқарган бўлса, 1999 йилга келиб ўнта классдаги автомобиллар ишлаб чиқаришни бошлади.
ХХI-асрнинг бошларида ишлаб чиқарилган Mercedes-Benz SL55 AMG русумли автомобили энг муваффақиятли автомобильлардан бири ҳисобланади. автомобиль 4,5 сонияда тезлигини соатига 100 километргача чиқариши ва соатига 300 километр тезликда йўл босиб ўтиши мумкин.
2002 йили дунё бозорига чиқарилган компаниянинг учинчи авлод автомобилларидан бўлган бизнес классдаги Mercedes-Benz W210 автомобиллари ўрнига Mercedes-Benz W211 автомобиллари ишлаб чиқарилиш бошланди. Автомобиль чарм ўриндиқ ва ёғочдан ясалган интерьерга эга бўлган. 2009 йилгача Mercedes-Benz W211 автомобилидан 1 500 000 дона ишлаб чиқарилган.
Компаниянинг тўртинчи авлод автомобилларидан бўлган Mercedes-Benz W212 русумли автомобили 2009 йилда Детройт автосалонида намойиш қилинди.
Автомобиль хавфсизлик бўйича бир неча янгиликлар билан жиҳозланди. Хусусан, автоматик равишда ҳайдовчини чарчаганлигини ва йўл хавфсизлик белгиларини аниқлаш ҳамда автомобильни йўналишдан четга чиқишини огоҳлантириш.
Mercedes-Benz тарихи, автомобиль ишлаб чиқариш тарихи билан чамбарчас боғлиқ жараёндир. Ҳозирги даврда ҳам Mercedes-Benz автомобиллари дунёда энг машҳур ва энг ишончли автомобильлардан бири ҳисобланади.
Штутгартнинг Унтертюркхайм (Untertürkheim) ҳудудининг 2 миллион квадрат километр майдонида жойлашган Mercedes-Benz заводи, Daimler AG концернининг энг қадимий заводи ҳисобланади. Завод ишчилари енгил автомобильларнинг двигатели, мости ва трансмиссияларини ишлаб чиқарадилар. Завод раҳбарияти Эсслинген-Меттингенга (Esslingen-Mettingen) жойлашган бўлиб, шу ердан ишлаб чиқаришни назорат қиладилар.
Шунингдек, Штутгард шаҳрида концернга тегишли бўлган Mercedes-Benz Center мажмуаси жойлашган. Мажмуада Mercedes-Benz–автомобиллари музейи, компания штаб квартираси ва Штутгарт футбол жамоасининг ўйингоҳи -Мерседес-Бенц-Арена жойлашган.
2006 йил 19 май куни очилган Mercedes-Benz музейи, дунёда автомобиль ишлаб чиқаришнинг 130 йиллик тарихини қамраб олган ягона музей ҳисобланади. Тўққиз қаватли бинонинг 16 500 квадрат метрини эгаллаган музейда 160 дан кўп автомобиллар ва 1 500 дан зиёд тарихий экспонатлар жой олган.
Музейга ташриф этган меҳмон тахминан икки соат давом этадиган экскурсия жараёнида компаниянинг на фақат 1886 йилдан бошлаб ҳозирги вақтгача бўлган тарихи, балки унинг келажаги билан ҳам танишиши мумкин. Ушбу ғоя архитекторлар Беркел ва Босга тегишлидир.
Mercedes-Benz компаниясида меҳнат қилаётган 150 000 нафардан ортиқ ишчилари дунё автомобиль саноатини ривожланишига улкан ҳисса қўшиб келмоқдалар.
Mercedes-Benz, халқ тилида «Мерс» деб номланувчи автомобиллари дунёнинг қайси давлатида бўлмасин энг юқори сифатли автомобиль деб тан олинган. Албатта Mercedes-Benz юқори сифатли автомобиль ишлаб чиқарувчи ягона компания эмас, лекин бу йўналишда у пешқадам компания.
2015 йил бошида Mercedes-Benz компанияси «Келажак автомобили» деб аталган F 015 Luxury in Motion автомашинаси концептини тақдим қилган эди. Бир гуруҳ журналистлар машинанинг тайёр нусхасида сайр қилиш имкониятига эга бўлди. Жараёнда иштирок этишга чақирилган The Verge ресурси журналистлари ўз сайрларини видеотасмага муҳрладилар.
Видеорепортаждан маълум бўлишича, машина мустақил ҳаракатлана олади, шу боис ҳайдовчи ўриндиғи 180 даражага ўгирилади. Шунингдек, машина тезлигини тўрт эшикка ўрнатилган сенсорли экранлари орқали бошқариш мумкин. Сенсорли экранлар жиҳозлар панели ва йўловчилар ўртасидаги кўчма ўриндиққа ҳам ўрнатилган. Радиатор панжарасига йўл белгиларини йўл устида «чизиб берадиган» лазерли проектор ўрнатилган.
Mercedes расмийлари бу турдаги «келажак автомобили» 15 йилдан сўнг ишлаб чиқарила бошланишини айтмоқда.
«Bloomberg» нашрининг берган маълумотига кўра Mercedes-Benz компанияси янги бренд остида ўзининг электромобилларини ишлаб чиқариш арафасида турибди.Маълумотларга қараганда, компания дастлаб иккита седан ва иккита йўлтанламас электромобилларини ишлаб чиқарган. Мазкур моделлардан бирининг прототипи 2016 йилнинг сентябрь ойида Париж автосалонида намойиш этилган.Mercedes-Benz компаниясидан кейин бошқа компаниялар ҳам электромобиллар устида ишлашни бошлаб юбориши тайин. Автомобиль саноатида янги давр бошланганлиги ҳақида гапириш мумкин.
2019 йил Mercedes-Benz 60,355 миллиард долларга баҳоланган. Бу кўрсатгич билан автомобиль ишлаб чиқарувчи компаниялар орасида биринчи ўринда туради.
