18+

18 . VIDЕODA TAʼBNI XIRA QILUVCHI SAHNALAR MAVJUD. VIDЕODA SANITAR VRACH BЕMORNI YOTQIZIB BOʻGʻMOQDA

PRЕZIDЕNT BORGAN KASALXONADA RUHIY KASALLARNING TAHQIRLANAYOTGANI IDDAO QILINDI

Toshkent shahar ruhiy kasalliklar klinik shifoxonasida davolanayotgan bemorlar muntazam tahqirlanishi haqida ularning qarindoshlari Ozodlikka shikoyat qildi.

21 yoshli Madina Nabijonovaga koʻra ruhiy xasta turmush oʻrtogʻini sanitar vrach yerga bosib boʻgʻayotgani kasalxona xavfsizlik kamerasiga 24 aprel kuni tushib qolgan va bemor yaqinlari bu videoyozuvni ruhiy shifoxona xodimlari bilan muhokama qilgan.

Nabijonova muhokama payti shifoxona kompyuteridagi videoyozuvni telefoni yozib olib uni Ozodlikka taqdim etdi.

Videoda tibbiy forma kiygan kasalxona yoʻlagida bemorni yerga yiqitadi va ustiga minib ikki qoʻli bilan boʻynidan ushlaydi.

Madina Nabijonovaga koʻra erining palataga kirish soʻrovini qabul qilmay koʻchaga chiqaman degani sanitarning unga nisbatan zoʻravonlik qoʻllashiga bahona boʻlgan.

- Har xil dorilar berishadi, boʻshashtiradigan. Oʻshani taʼsirida erim zoʻrgʻa yurayapti. Sanitar vrach boʻynidan ushlab siltayapti. Yerga bosayapti, boʻgʻayapti. Xoʻjayinimning aytishicha, oʻlib qolishiga sal qolgan. Hushidan ketib ancha yotgan ham. Keyin turgʻizishadi, sanitar vrach uni xoʻrlab, boʻynidan ushlaydi, yana yerga yotqizadi. Men buni koʻrib dahshatga tushdim. Sizlarga shu videoni yuborayapman, boshqa bemorlarning qarindoshlari ham koʻrishsin, kasalxonada ruhiy xastalarni nima qilishlarini koʻrishsin, - deydi Nabijonova.

Nabijonova videoni oʻz koʻzi bilan koʻrgach, turmush oʻrtogʻini kasalxonadan chiqarib, uyida davolatishga majbur boʻlganini aytadi.

- Doim urib, siltashar ekan. Xoʻjayinim urib, xoʻrlashlari haqida aytavergach, oʻzim borib, kuzatuv kamerasini tekshirib chiqdim. Videoda oʻz koʻzim bilan koʻrganimdan soʻng, uni darhol shifoxonadan chiqarib oldik. Uyda davolatayapmiz, - dedi Nabijonova.

Toshkent shahar ruhiy kasalliklar klinik shifoxonasida davolanayotgan boshqa bir bemorning onasi ham “tahqirlash va kaltaklashlar”ning bu shifoxonada doimiy holat ekanini aytadi.

- Oʻgʻlim toʻrt yildan beri shu kasalxonada. Siyib qoʻysa doim urar ekan. Qattiq jarohat yetadigan qilib urmaydiku, lekin uradi. Mumkin emas-da bu. Bunga koʻnikib ham qolganmiz. Kasalxonadan olib, uyda davolatishga imkoniyatimiz yoʻq, - deydi toshkentlik ruhiy bemorning onasi.

Toshkent shahar ruhiy kasalliklar klinik shifoxonasi bosh shifokori Xayrulla Husanxoʻjayev bemor kaltaklangani haqidagi iddaolarni rad etdi.

- Videoda huddi urganday boʻldiyu, lekin hech kim hech kimni urgani yoʻq. Oʻshanda bemorning qarindoshlari daʼvoyimiz yoʻq, deb yozib berishgan. Agar xodimimiz kasalni urdi, u yoki bu qildi degan narsa boʻlsa, haqiqatan tasdiqlansa oʻsha kunni oʻzida ishdan haydavoraman. Bir kun ham ushlab turmayman, - dedi Xayrulla Husanxoʻjayev.

Toshkent shahar ruhiy kasalliklar klinik shifoxonasi bosh shifokori favqulodda holatlarda sanitar vrachlarning bemorga nisbatan kuch ishlatishga haqqi borligini qoʻshimcha qildi.

- Ruhiy kasal oʻzi tashlanishi mumkin. Tashlangan paytda sanitar uni urmaydiku, lekin qoʻlidan yoki boshqa joyidan ushlab, bir narsa qilib qoʻymasin, derazani sindirib qoʻlini kesib yubormasin, deb ushlab, boylab tashlashga haqqi bor. Lekin, urishga, oyoq bilan, qoʻl bilan urishga, haqorat qilishga hech kimning haqqi yoʻq. Shunday holatlar boʻlmasligi uchun shifoxonada kuzatuv kameralari qoʻyilgan. Hech kim ruhiy kasallarni xafa qilmasin, degan maʼnoda qoʻyilgan bu, - deydi Toshkent shahar ruhiy kasalliklar klinik shifoxonasi bosh shifokori Xayrulla Husanxoʻjayev.

1896 yilda qurilgan Toshkent shahar ruhiy kasalliklar klinik shifoxonasi 2013 yilda qayta taʼmirlangan.

2015 yilda shifoxonaga tashrifi davomida Oʻzbekiston prezidenti Shavkat Mirziyoyev klinikani respublikadagi tayanch muassasaga aylantirish, ruhiy kasalliklarning oldini olish va boshlangʻich bosqichdayoq davolash amaliyotini rivojlantirish, bu borada chet eldagi ilmiy-tibbiy muassasalar bilan hamkorlikni yoʻlga qoʻyishni taklif qilgan edi.

18 ВИДЕОДА ТАЪБНИ ХИРА ҚИЛУВЧИ САҲНАЛАР МАВЖУД. ВИДЕОДА САНИТАР ВРАЧ БЕМОРНИ ЁТҚИЗИБ БЎҒМОҚДА

ПРЕЗИДЕНТ БОРГАН КАСАЛХОНАДА РУҲИЙ КАСАЛЛАРНИНГ ТАҲҚИРЛАНАËТГАНИ ИДДАО ҚИЛИНДИ

Тошкент шаҳар руҳий касалликлар клиник шифохонасида даволанаётган беморлар мунтазам таҳқирланиши ҳақида уларнинг қариндошлари Озодликка шикоят қилди.

21 ёшли Мадина Набижоновага кўра¸ руҳий хаста турмуш ўртоғини санитар врач ерга босиб бўғаётгани касалхона хавфсизлик камерасига 24 апрель куни тушиб қолган ва бемор яқинлари бу видеоëзувни руҳий шифохона ходимлари билан муҳокама қилган.

Набижонова муҳокама пайти шифохона компьютеридаги видеоëзувни телефони ëзиб олиб уни Озодликка тақдим этди.

Видеода тиббий форма кийган касалхона йўлагида беморни ерга йиқитади ва устига миниб икки қўли билан бўйнидан ушлайди.

Мадина Набижоновага кўра¸ эрининг палатага кириш сўровини қабул қилмай¸ кўчага чиқаман дегани санитарнинг унга нисбатан зўравонлик қўллашига баҳона бўлган.

- Ҳар хил дорилар беришади, бўшаштирадиган. Ўшани таъсирида эрим зўрға юраяпти. Санитар врач бўйнидан ушлаб силтаяпти. Ерга босаяпти, бўғаяпти. Хўжайинимнинг айтишича, ўлиб қолишига сал қолган. Ҳушидан кетиб анча ётган ҳам. Кейин турғизишади, санитар врач уни хўрлаб, бўйнидан ушлайди, яна ерга ётқизади. Мен буни кўриб даҳшатга тушдим. Сизларга шу видеони юбораяпман, бошқа беморларнинг қариндошлари ҳам кўришсин, касалхонада руҳий хасталарни нима қилишларини кўришсин, - дейди Набижонова.

Набижонова видеони ўз кўзи билан кўргач, турмуш ўртоғини касалхонадан чиқариб, уйида даволатишга мажбур бўлганини айтади.

- Доим уриб, силташар экан. Хўжайиним уриб, хўрлашлари ҳақида айтавергач, ўзим бориб, кузатув камерасини текшириб чиқдим. Видеода ўз кўзим билан кўрганимдан сўнг, уни дарҳол шифохонадан чиқариб олдик. Уйда даволатaяпмиз, - деди Набижонова.

Тошкент шаҳар руҳий касалликлар клиник шифохонасида даволанаётган бошқа бир беморнинг онаси ҳам "таҳқирлаш ва калтаклашлар"нинг бу шифохонада доимий ҳолат эканини айтади.

- Ўғлим тўрт йилдан бери шу касалхонада. Сийиб қўйса доим урар экан. Қаттиқ жароҳат етадиган қилиб урмайдику, лекин уради. Мумкин эмас-да бу. Бунга кўникиб ҳам қолганмиз. Касалхонадан олиб, уйда даволатишга имкониятимиз йўқ, - дейди тошкентлик руҳий беморнинг онаси.

Тошкент шаҳар руҳий касалликлар клиник шифохонаси бош шифокори Хайрулла Ҳусанxўжаев бемор калтаклангани ҳақидаги иддаоларни рад этди.

- Видеода ҳудди ургандай бўлдию, лекин ҳеч ким ҳеч кимни ургани йўқ. Ўшанда беморнинг қариндошлари даъвойимиз йўқ, деб ёзиб беришган. Агар ходимимиз касални урди, у ёки бу қилди деган нарса бўлса, ҳақиқатан тасдиқланса ўша кунни ўзида ишдан ҳайдавораман. Бир кун ҳам ушлаб турмайман, - деди Хайрулла Ҳусанxўжаев.

Тошкент шаҳар руҳий касалликлар клиник шифохонаси бош шифокори фавқулодда ҳолатларда санитар врачларнинг беморга нисбатан куч ишлатишга ҳаққи борлигини қўшимча қилди.

- Руҳий касал ўзи ташланиши мумкин. Ташланган пайтда санитар уни урмайдику, лекин қўлидан ёки бошқа жойидан ушлаб, бир нарса қилиб қўймасин, деразани синдириб қўлини кесиб юбормасин, деб ушлаб, бойлаб ташлашга ҳаққи бор. Лекин, уришга, оёқ билан, қўл билан уришга, ҳақорат қилишга ҳеч кимнинг ҳаққи йўқ. Шундай ҳолатлар бўлмаслиги учун шифохонада кузатув камералари қўйилган. Ҳеч ким руҳий касалларни хафа қилмасин, деган маънода қўйилган бу, - дейди Тошкент шаҳар руҳий касалликлар клиник шифохонаси бош шифокори Хайрулла Ҳусанxўжаев.

1896 йилда қурилган Тошкент шаҳар руҳий касалликлар клиник шифохонаси 2013 йилда қайта таъмирланган.

2015 йилда шифохонага ташрифи давомида Ўзбекистон президенти Шавкат Мирзиёев клиникани республикадаги таянч муассасага айлантириш, руҳий касалликларнинг олдини олиш ва бошланғич босқичдаёқ даволаш амалиётини ривожлантириш, бу борада чет элдаги илмий-тиббий муассасалар билан ҳамкорликни йўлга қўйишни таклиф қилган эди.