123

Шунчаки, икки хил одамлар

Иккита эгизак ака-укалар бор. Бирининг исми — Ташқи, иккинчисиники — Ички. Уларнинг фамилияси эса Бошқарув. 

Уларнинг иккаласи ҳам қарийб бир хил ҳаёт кечиришади. Лекин бўлаётган воқеаларга ҳар хил қарашади. 

Бугун эрталаб Ташқибек автобусни ярим соат кутди. Кутаётганига 31 дақиқа бўлиши билан жаҳли чиқиб кетди: "Аблаҳлар, янги автобус йўлини очишаётганида ҳар 10 минутда автобус келади, дейишганди. Э-ээ, мана бу ерга ҳам катта қилиб ёзиб қўйишибди. Нимага автобус келмаяпти?! Нима, мен уларни деб ишга кечикишим керакми? Нимага бизнинг ҳайдовчиларда тартиб деган нарсани т ҳарфи йўқ!? Ўзи-чи бизда мансабдорлар ваъда бериб қўяверади-да, у ёғига тупуриб кетаверишади! Давлатни дабдаласини чиқаришган!"

Ичкибекнинг ҳам автобуси кечикаётганди. У, лекин, асабийлашмади: "Кўринишидан, ишга кечикяпман. Ишдагиларга кечикишимни айтиб қўяман. Автобус қачон келишини кўрсатадиган программани телефонга ўрнатиб олишим керак экан. Шунда қачон аниқ келишини билиб олардим. Хўш, бугунчалик энди таксидан кетмасмикан ёки пиёда?.."

Ташқибек кўчада кутавериб, совқатиб кетди: "Об-ҳавоям дабдала, товба! Қачон ёз келади, а?"

Ичкибек ҳам пиёда кетаётгани учун совқатишни бошлади: "Об-ҳавога қарамасдан кийинибман. Кун охиригача чидаб турсамми, ёки уйга қайтиб, иссиқроқ кийиниб олсаммикан?"

Ташқибек охири ишхонасига етиб олди. Ишда бошлиқ бир тўда вазифа тайёрлаб қўйибди: "Кундан кунга кўп иш беришяпти. Майлийди, шунга яраша ойликни кўпайтиришса. Лекин, йўқ, бошлиқнинг ўзи ҳеч нима қилолмайди-да, ақллилик қилиб кетаверади!"

Ичкибек ҳам ишхонага келди. Унга ҳам кўп иш буюришди. "Хўш, мен олдингидан кўпроқ компанияга фойда келтиряпманми, демак, бошлиқнинг ёнига кириб, ойлигимни кўтаришини сўраб кўришим керак. Ҳа, бу бироз қўрқинчли. Лекин керак".

Ташқибек телеграмга кириб, янгиликларни ўқиди. Бирдан тутақиб кетди: "Яна сув-газга нархни кўтаришибди, маразлар! Бир йил олдин шунча эди-ю! Камига янги ҳоким келганига бир ой бўлмасдан машина сотволибди! Ҳамма ер коррупция бўлиб кетди! Одамлар камбағаллашиб ётибди! Қани адолат?"

Ичкибек янгиликларни Ташқибекдан эшитди. У ичида ўйланди: "Пулим етмай қолиши мумкин экан. Қандай қилиб муаммоларни ҳал қилсам бўлади? Янги даромад йўлларини топишим керак. Лекин давлатда ҳам муаммолар кўпайяпти, қандайдир хавфни сезяпман. Буни камайтириш учун нима қўлимдан келади?"

Эгизакларнинг ҳаёти икки хил бошқарилади. Ташқибек ҳаётини ўзи эмас, ташқи тараф/ҳолат/одамлар бошқаришига қўйиб беради. Ичкибек бўлса ўз ҳаётида масъулиятни бўйнига олиб, ҳаётини ўзи бошқаради. Уларнинг орасидаги фарқ шу.

Нима деб ўйлайсиз, Ташқибекдек яшаган яхшими ёки Ичкибекдекми?