Имкониятим чекланган деб нолимайман, шукроналик билан яшайман. Ўқиш билан бирга касаначилик фаолиятимни ҳам олиб бормоқдаман

Ўзбекистон Президентининг 2017 йил 1 августдаги Ф-5006-сон фармойиши билан ташкил этилган имконияти чекланган шахсларни давлат томонидан қўллаб-қувватлаш тизимини тубдан такомиллаштиришга қаратилган чора-тадбирлар ижроси мамлакатимизда қўллаб-қувватланмоқда. Уларга тиббий-ижтимоий ёрдам кўрсатиш, уларни касбга ўқитиш ва ишга жойлаштириш,касаначиликка жалб этишда самарали ишлар олиб борилмоқда. Жумладан Оқолтин туманидаги Алишер Навоий махалласида яшовчи болаликдан 2-гуруҳ ногирони бўлган Шахло Тешабоева ҳам давлатимиз томонидан берилган имтиёз ва имкониятлар оқилона фойдаланган ҳолда касаначилик фаолияти бошлаб юборган. У хозирда 25 ёшда. 2017 йилда бир ўзи касаначилик фаолиятини бошлаган бўлса, ҳозирги кунга келиб кўплаб шогирдлар ортирди, иш ўринларини яратди.

Шахло Тешабоеванинг мўъжазгина хонадонида бўлиб у билан сухбатлашганимизда у хаётга бўлган мухаббати, келажакдаги олдига қўйган улкан режалари ҳақида тўлиб-тошиб гапирар экан шундай дейди:

  -Қувончимнинг чеки йўқ. Мен бу йил давлатимиз рахбари томонидан чиқарилган имтиёз асосида олий ўқув юртига ўқишга қабул қилиндим.Ўқиш билан бирга касаначилик фаолиятимни хам давом эттираман. Имкониятим чекланган деб нолимайман. Шукроналик билан яшайман. Туман,махалла ходимлари муаммоларни ўз вақтида бартараф қилиб ёрдам қиладилар.

Истараси иссиқ, боқишлари самимий, кўзларида хаётга ишонч, умид, шукроналик балқиб турган Шахлога боқиб хавас қилдик. Шундай инсонлар борки, хаётда ўз кучлари, мехнатлари билан кўзлаган мақсадларига етадилар, яна шундай инсонлар борки, тўрт мучаси соғлом бўлсада "берсанг ейман,урсанг ўламан"қабилада хаётдан нолийдилар. Ана шундайларга тиниб-тинчимас Шахло Тешабоеванинг хаётини ўрнак қилмоқчимиз.

Маҳалла ва оилани қўллаб-қувватлаш Оқолтин туман бўлими