“Таъмирланган” таъмирталаб йўллар...
@oqoltin_yangiliklari
Қуйида каналимиз обуначиси томонидан юборилган мурожаатни эътиборингнизга ҳавола этамиз:
“Узоқ йиллардан буён ҳайдовчилик қиламан. Очиғини айтганда, Гулистон шаҳридан Оқолтин тумани Фарғона шаҳарчасига қадар босиб ўтган йўлимизда учраган “яма”лар асабингизни бузиб юборади. Гап шундаки, йўлларда, аниқроқ айтганда, Тошкент—Термиз—А373 автомобиль йўлида яқиндагина таъмирлаш ишлари олиб борилган. Аммо ҳамма гап бу ишлар қанчалик сифатли амалга оширилганида... Автомобиль йўллари ва ички йўллар ёзми-қишми, ёмғирми-қорми фарқи йўқ – шошма-шошарлик билан таъмирланмоқда. Қанчадан-қанча маблағ эвазига таъмирланган йўлларда бир ёмғирли мавсумдан кейин яна ўйдим-чуқурлар пайдо бўлиши йўллар сифатсиз қурилганидан далолат-ку? Ахир йўллар таъмири маълум бир меъёрларга жавоб бериши ва ўз муддати давомида халққа хизмат қилиши керак эмасми? Кўплаб Йўл транспорт ҳодисалари айнан йўлларнинг носозлиги оқибатида рўй беряпти”...
Бир қарашда кичик бўлиб туюлган бу муаммони олиб чиқиш шартмиди, дейишга шошилманг. Гап шундаки, биз кўп ҳолларда ўз мақола ва лавҳаларимизда “фалон йўллар таъмирланди”, “иншоотлар барпо этилди” деган қуруқ маълумотларни тақдим этишга кўникиб қолгандекмиз. Аслида эса қилинган ишларнинг сифати, муддати ва натижаси билан унчалик қизиқмай қўйдик. Бироқ бугун халқимизнинг талаби бутунлай ўзгарди. Энди ҳар бир бажарилган ишнинг сони эмас, сифати ҳақида қизиқишнинг вақти келди...
Юқорида келтирилган автомагистраль йўллардаги ҳолат ҳам бизу сизни қониқтирмаслиги аниқ. Бу каби йўллардан ҳаракатланган сайёҳлар бетакрор табиатга эга юртимизга яна қайтиб келармикан? Ахир, автомагистраллар сизу бизнинг юзимиз-ку...
Ҳурматли мутасадди ташкилотлар вакилларидан сўрагимиз келади: қилаётган ишимизни қуруқ ҳисобот учун эмас, халқимиз, юртимиз меҳмонлари, фарзандларимиз узоқ йиллар баҳраманд бўлиши учун сифатли ва ўз вақтида бажаришни ўйлаш вақти келмадимикан? Қачонгача “таъмирланди”, “бажарилди” мазмунидаги ҳисоботлар билан чалғитамиз?