ДЎСТЛАР ЭСКИ ГУНОҲЛАРНИ ЭСЛАТИШСА 

Ассалому алайкум! Ҳозир беш вақт намозимни ўқийман, лекин дўстларим аввалги қилган ишларимни юзимга солишади, лекин мен тавба қилганимни айтсам хам, уларга нима деб жавоб беришим керак? 

ЖАВОБ: 

- Ва алайкум ассалом! Расулуллоҳ соллаллоҳу алайҳи васаллам “Гуноҳдан тавба қилувчи худди гуноҳ қилмагандек” деганлар. 

عَنْ مُعَاذِ بْنِ جَبَلٍ رَضِي اللهُ عَنْهُ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: مَنْ عَيَّرَ أَخَاهُ بِذَنْبٍ لَمْ يَمُتْ حَتَّى يَعْمَلَهُ  

Муъоз ибн Жабал розияллоҳу анҳудан ривоят қилинади:

«Набий соллаллоҳу алайҳи васаллам:

«Ким биродарини бир гуноҳда айбласа, ўзи ўша (иш)ни қилмай туриб ўлмайди», дедилар».

Шарҳ: Бировларнинг айбини беҳуда равишда, ғийбат тариқасида гапириш ўз эгасининг бошига кулфат келтиради. Тавба қилиб, хатосини яшириб юрган одамларни айблаш яхши эмас. Аммо тавба қилмай, ошкора тарзда гуноҳ қилиб юрганларни танқид қилиш жоиз. ("Ҳадис ва Ҳаёт" китобидан). Валлоҳу аълам!

"Зикр аҳлидан сўранг" ҳайъати