.......

.......


للأسف مش هعرف أطول إنهاردة عشان ورايا حجات بكرا الصبح وكان المفروض أنام بدري أصلا بس يلا هبقى أنام الضهر

ليه الولاد بتحب القهوة ؟

هحاول أتكلم في سياق منطقي أكتر منه درامي أو عاطفي عشان شوفت بوستات كتير القهوة أسلوب حياة ومكان يجتمع فيه كل الجمال والعظمة وبصراحة حاجة أوڤر جدا

بس بجد ليه الولاد بتحب القهوة ؟

*بغض النظر عن الماتشات وكده أنا هتكلم عن القعدة العادية اللي مش في وقت الماتشات*

القهوة عامة هي بالنسبة للولاد نوع من أنواع الهروب من الواقع الواحد بيبقى طول اليوم مخنوق ومسحول سواء في دراسة أو شغل أو غيره فبتروح تقعد مع شوية ناس صحابك أو معارفك وتقعدوا تتكلموا في أي حاجة وخلاص ... مكان بتقعد فيه بعيداً عن البيت ومشاكله أيا كانت وبعيد عن كل المشاكل اللي حواليك وتقدر ب3 أو 4 جنيه بس (اللي هي كوباية شاي) تقعد لحد ما تزهق ومحدش هيقولك قوم وتقعد تلعب شوية ألعاب مش هدفها التسلية على قد ما هدفها قتل الصمت لو اتنين مش لاقيين حاجة يتكلموا فيها فليه متتحبش ؟!

طب أيه يعني كده القهوة طلعت مكان حلو وكيوت ؟

هو عامة القهوة مش مكان شرير هي مكان عادي بس المشكلة هي اللي احنا بقينا بنعمله وبقا ده دلوقتي الطبيعي

أنك تفرش في القهوة في وسط الشوارع واللي رايحة واللي جاية بتتعاكس .... وطبعاً الأصوات والكلام بيبقى بأعلي صوت وفي وسط الشارع ودي كده حجات خارجية بس

الحجات الداخلية هي كمية الدخان اللي موجودة حواليك مش شيشة أو سجاير او ال"ڤيب" دول حتى وإن كنت مش مدخن هيأثروا عليك تأثير سلبي

ده غير الناس اللي ممكن تقعد حواليك أكيد مش هتسلم من المشاكل

ده غير أن قعدة القهوة هي تضيع وقت جدا جدا ودي تقريباً أكبر سلبياتها

طب أنت كده حيرتني ماشي هي ولا حلوة ولا وحشة طب أيه صح الولاد يقعدوا عليها ولا غلط ؟

هو القعاد ع القهوة من وجهة نظري لازم ليه شروط لو حققتها تبقى قعدتك مش هتضرك ولا هتضر غيرك

تحاول متقعدش ف الطريق وفي نفس الوقت مش في القفلة عشان الدخان

بيبقى فيه قهاوي فيها أماكن جنبها مفتوحة بس مش طريق بيعدي منه ناس عشان ميتأذوش

ميبقاش حواليك أو معاك مدخنين

تحاول بقدر الإمكان تبعد عن الدخان عشان متبوظش رئتيك

القعدة متطولش عن 3 ساعات وتبقى مرة كل أسبوع حد أقصى

قعدة القهوة كل يوم دي عَطَلة جامدة وغير كده عمرك أصلاً ما هتلاقي حد ناجح في حياته كل يوم بينزل يقعد بال6 وال 7 ساعات ده أكيد مش صح

وأه الأرقام دي مش مبالغ فيها فيه ناس بتقعد كده فعلا

أه بيبقى فيه ناس متقاعدة او كبار بينزلوا كل يوم ساعة ولا حاجة وغالباً بيبقوا مدخنين

هو أينعم أنا من وجهة نظري ده مش صح بس بيبقى حد مستقر ماديا ومستمر في شغله غير الشباب اللي بيبقوا لسه بادئين

بغض النظر أنا شايف أن الاتنين غلط

حاجة كمان قعدة بالليل خالص اللي بعد 1 دي مش صح

هو عامة ده مش مبدأ يعني أنا شايف أن ده أفضل حل ممكن بغض النظر عن أنا بعمل أيه او ايه اللي بيحصل بس ده الصح

فكرة أن حد عمره مثلا ما قعد على قهوة دي صعبة

هو فيه بس غالباً بيبقى عشان معندوش صحاب أو محترم بزيادة أوي

عامة .... عامة القهوة مكان عادي ليه مزاياه وليه عيوبه بس حالياً عيوبه أكتر من مزاياه وللأسف ناس كتير بتضرر بسببه

هو لازم الواحد يبدأ بنفسه بصراحة والأصل بقا إن المفروض الموضوع يتحل جذرياً أن ممنوع الفرش في الكرق العامة ويبقى فيه تحجيم شوية بس طبعا لا حياة لمن تنادي

الموضوع عام ودردشة مفيش مبادئ علمية ولا حجات نظريات مكلكعة انهاردة :)


Report Page