.....

انهاردة حابب أتكلم عن معلومة مش رأي شخصي وهو أزاي الڤيرس بيبوظلي الجهاز

معرفش أنا قلبت على حصة كومبيوتر ليه بس جت في دماغي أمبارح وأنا ببعت اللينك

مبدأيا كده فيه نوعين من المواقع اللي موجودة اونلاين

Https / Http

اللي فيه "إس" بيبقى أكثر أماناً بكتير من اللي مفيهوش لأنه بيشفر المعلومات اللي رايحة جاية كلها من الموقع وليه .... نظام الأمان بتاعه معقد أكتر وبالتالي أغلى في الاشتراك بتاعه لو أنت عايز تعمل الموقع بتاعك كده

بس في المقابل محدش يقدر يخترق بياناتك لو أنت موصل على شبكة عامة ولو الموقع معتمد تقدر تحط فيه بيانات حسابك البنكي وانت مطمن إن شاء الله

طب هل ده معناه إن الباقي وحش ؟

لا طبعا مواقع كتييير جدااا بتبقى من غير ال"إس" وبتبقى أمان عادي هو الفكرة في الشبكة اللي أنت موصل عليها لو في البيت عادي متقلقش إنما لو على وايفاي عام ممكن تستخدم أي برنامج VPN يحمي بياناتك

وعامة الموضوع ده ميتقلقش منه اوي في مصر لأنه الحمدلله مش منتشر بس طبعاً الاحتياط واجب

طب تمام ده بالنسبة للأمان وأنت داخل الموقع طب لو الموقع نفسه مش أمان دي تبقى قصة تانية

بيبقى الموقع نفسه مجرد ما تدخل عليه فيه ڤيرس ودول ممكن يتقسموا ل 3 أنواع رئيسية

الهاكرز ودول بيبقوا ناس هدفهم تجميع بيانات مهمة باسوردات وحسابات بنكية وده مش منتشر أوي إلا لو معندكش حماية ع الجهاز وغالبا بيكون للكومبيوتر الموبايل على حد علمي بيبقى أمان شوية من النقطة دي

ڤيروسات التعدين ودي تقريباً أكتر الڤيروسات انتشاراً دي هي اللي بتبطأ الأجهزة هو ببساطة وبدون دخول في تفاصيل بيستخدم جهازك ويهلك المعالج عندك عشان مصالحه الشخصية وكل ما كان فيه كذا جهاز شغالين لمصلحته بيستفيد أكتر عشان كده الجهاز بيبقى تقيل مش عشان الڤيرس بوظه لا عشان بيستعمله ودي برضو بتصيب أجهزة الكومبيوتر من المواقع لازم يكون عندك حماية كويسة

ڤيروسات الفدية ودي أخطر أنواع الڤيرس ولحسن الحظ الإصابة بيها مبتبقاش بالموقع وتنزل ع الجهاز وخلاص لا ده أنت بتحملها بمزاجك والجهاز يحذرك يقولك خلي بالك تقوم أنت مسطبه والجهاز يحذرك تاني وأنت تتجاهل كل التحذيرات دي وتطفي حماية الجهاز بإيدك ساعتها بيصيبك

ايه ده معقولة حد غبي أوي للدرجة ؟

هو أه بس هو طبعا بيبقى متنكر أنت بتحاول تحمل لعبة مثلا ولقيتها بس الجهاز قرأها على إنها ڤيرس هتقوم أنت طافي الحماية عشان تعرف تسطبها تقوم هوبااا ... لبست ڤيرس فدية

ده بقا بيعمل تشفير لبيانات الجهاز بتاعتك كلللها صور وأبحاث و مستندات وفيديوهات كللله بيشتفر وفك التشفير بيبقى صعب جدا جدا وغالبا مبينفعش

الحل إنك تدفع فدية وسعر الفدية دي ممكن يوصل ما يقارب ال 15 ألف جنيه

لو حد عنده ملفات مهمة جداً للاسف بيضطر يدفعهم

طب ياعم الحمدلله على نعمة الموبايل أجهزة الكومبيوتر فيها مشاكل كتير

لا هو برضو الموبايل مش أمان 100٪ مهم جداً إنك تحاول متحملش أي برامج من أي اماكن مش موثوقة هو حاجة نادرة إن البرنامج يبوظ الجهاز بس بتحصل وساعتها الحل بيبقى إنك تعمل سوفت للجهاز

هو عامة المواضيع دي أنت لو شغال في الحجات الطبيعية وبتستخدم الموبايل او الكومبيوتر الاستخدام الطبيعي حتى لو بتحمل حجات أحياناً مش على جوجل بلاي من ع الانترنت مباشرة الموضوع ميقلقش بس فيه ناس بتقعد تدور على برامج غريبة وحجات مش موجودة فدول غالباً هما اللي بيتأذوا

هو فيه حاجة ملهاش علاقة بالموضوع بس اتذكرت قدامي انهاردة واستفزتني أوي

ليه يا ترى حد يعمل لأي حد "تثبيت للمحادثة" في الواتساب ؟

يعني لو لو بعتت رسالة هتطلعك فوق ده الطبيعي ليه بقا أثبته فوق وهو مش باعت رسايل يبقى دايماً فوق

كل ما اسأل السؤال ده لحد ميجاوبنيش إجابة مقنعة وغالباً بتبقى عشان مقعدش أدور عليه ... هو تقريباً مخترع زرار "السيرش" في الواتساب كان عماله عشان يستخدمه هو وصحابه بس

حتى الآن ملقتش سبب مقنع للموضوع