....

*هحاول أرفع الكلام أونلاين هيبقى أسهل من لينك صراحة*

إنهاردة هحاول مطولش

كنت حابب أتكلم عن حاجة موجودة عند الناس كلها تقريباً وكلنا بنعملها رغم إنها غلط

هي مش غلط خالص بس مش دايما بتصيب وهي الانطباع الأول .... أول إنطباع بتاخده عن الشخص اللي قدامك ده بيبقى الانطباع الأول وغالباً بتحكم على الشخص فوراً من خلاله

يعني لو واحد اتعصب وأتخانق في مكان عام طبيعي الناس كلها هتحكم عليه أنه عصبي أو بتاع مشاكل

في حين أن نفس الشخص لو أتشاف في المدرسة أو الكلية ممكن زمايله يشوفوه حد إنطوائي وهادي وفي كلتا الحالتين ممكن يبقى غلط أصلا

وطبعاً لأن الناس بطبعها بتاخد بالانطباع الأول وغالبا بيفضل حتى بعد ما بتعرف الشخص كويس ولو هو مختلف عن شخصيته انطباعك الأول عنه مش بيتغير بسهولة

لذلك لو الواحد رايح إنترفيو في شركة مثلا أو هيقابل ناس لأول مرة لازم ييجي بدري مينفعش يبقى أول إنطباع عنه إنه مش ملتزم

طب هل إحنا المفروض يعني منحكمش بالانطباع ده ونطنشه ولا أيه ؟

بالعكس رغم أنه ممكن يكون مش دقيق أوي بس هو اللي بيساعدنا باطنياً أننا نتعامل في حياتنا كلها في الشارع أنت كل يوم تقريباً بتنزل فيه الشارع بتتعامل مع ناس أول مرة تشوفها من أول بتاع التذاكر وسواق المكروباص أو الراجل اللي في السوبر ماركت لحد زمايلك في الكلية أو الشغل أكيد متعرفش الناس كلها

لذلك الانطباع الأول هو اللي بيسعفك لأنه غريزة باطنية الإنسان مخلوق بيها هي اللي بتحميك لو الشخص اللي قدامك ده نواياه مش طيبة أو عنيف أو شخص عدائي وبتنبهك تتعامل مع مين ومتتعاملش مع مين وأزاي تلقائياً وتقريباً زي ما قولت كل الناس عندها الغريزة دي

يعني أنا متأكد أن رغم إنك متعرفينيش ولا شوفتيني إلا أنك خدتي عني انطباع أولي برضو

يعني بتوقع أن أول انطباع ممكن يبقى أني شخص متوحد ومعنديش صحاب عشان مفيش حد بيعمل اللي بعمله ده ... شخص مش مرح أوي جد شوية ... حد شايف نفسه شوية مش متواضع أوي ... ممكن حد غلبان ووحيد ... شخص هادي وممكن طيب

دي صفات أنا لو قريت الكلام ده ممكن أستنبطها عن الشخص اللي بيكلمني بغض النظر أني كده فعلا أو لا أنا مش حابب أقول ... وبغض النظر انتي استنتجتي الصفات دي أو لا بس الأكيد أن كان فيه إنطباع أولي سواء حاجة كويسة أو وحشة

طولت برضو كالعادة بس يلا مش مشكلة