...
-انتِ مش شايفة انك بتتكلمِ بأسلوب وحش
عينى دمعت وأنا برد عليها
-طاب منا طول عمرى بتكلم بأسلوب حلو عمرك اهتميتى انا حاسه بـ ايه، مرة من نفسي يا ماما سيبينى اطلع اللِ جوايا
ردت عليا باستهزاء
-ابتدينا في الدراما والكلام اللِ ملوش لازمة
ضحكت على كلامها
-ملوش لازمة! مشاعرى ملهاش لازمة يا ماما! أُمال ايه ليه لازمة
كنت هترد عليا قاطعتها بعصبية مش عارفة ازاي جتلى جرأة اتكلم بيها
-اقولك انا.كفاية انى لما بطلب حاجة بتجبيهالى صح،انتِ عمرك ما حسيتِ بيا لو فاكرة انك بتحبينى والمفروض انا اكون عارفة ده فـ صدقينى انا بقاوم عشان منساش اي لحظة حسيت بـ حُبك فيها بجد
كُنت هسيبها واخرج بس ندهتلى بعصبية
-تعالى هنا رايحة فين
وصلت لمرحلة انى بعافر عشان منهارش رديت عليها وانا بترجاها
-من فضلك انا حاسة ان البيت كله بيديق عليا وهيموتنى سيبينى اخرج اشم شوية هوا وهرجع احسن ولله..وهرجع اعتذرلك عن اسلوبى اللِ مكنش ينفع اكلمك بيه
لأول مرة احس انها فهمانى وفاهمة انا محتاجة ايه
سابتنى ودخلت اوضتها
فتحت الباب ونزلت
كنت بتمشى في الشارع وانا بفتكر كل لحظة اتمنيت بابا يكون معايا فيها وملقيتهوش اه هو كمان مكنش بيفهمنى بس كان حضنه بيطمنى..وزيه زي ايه حاجة بطمنى مبتفضلش كتير
قعدت علي مقعد في الشارع وانا ببص لوشوش الناس على امل انى انسي اللِ حصل من شوية
لفت انتباهى صوت ست بتكلم طفل صغير
-كدا يا تميم خضتنى عليك كُنت فين؟
بصلها ببرأة وهو بيمدلها ايده ب شوكلاتة
-انا كنت بجبلك شوكلاتة وراجع يا ماما
حضنته شوية وبعد كدا بصتله
-انا مش عاوزا اي حاجة في الدنيا غيرك متخضنيش عليك تانى انت فاهم..بعدها مسكت ايده ومشيوا سوا
فضلت ببص عليهم لحد ما اختفوا وفجأة لقتنى بعيط انا كمان محتاجة حضن دلوقتى اوى محتاجة حد يطبطب عليا..هو تميم احسن منى فـ ايه عشان يتحضن وانا لا؟!
خدت بالى ان صوت عياطى كان عالى وناس كتير كانت بتبصلى مسحت دموعى بسرعة وقومت عشان اروح
فتحت الباب ودخلت وانا بدور علي ماما بس ملقيتهاش..معرفش ليه خوفت بس ماما مش متعودة تطلع بليل نزلت تانى ادور عليها وانا مش عارفة ادور فين و برضو ملقيتهاش..المرة دي كان عياطى و وجعى اكبر غابت عنى وقت ميكملش ربع ساعة وحاسة انى تايهة انى في خطر من غيرها رجعت البيت وانا بجرى عشان اشوفها رجعت ولا لا
فتحت الباب ودخلت لقيتها واقفة قدامى وبتبصلى بعصبية
-ممكن اعرف انتِ كنتِ فين انا نزلت ادور عليكِ لما نسيتى تليفونك وملقيتكيش و
قاطعتها وانا بحضنها وبعيط
-انا اسفة ولله مش هنساه تانى..مش هسيبك تانى أبداً
حسيت بأديها على ضهرى بس كانت وصلت لقلبي
خرجتنى من حضنها وابتسمت
-وانا راجعة قولت اكيد هتكونى في البيت فـ جبتلك معايا شوكلاتة..فتحت شنطتها وخرجت منها شوكلاتة
بصيت للشوكلاتة وبصتلها وانا بضحك من وسط دموعى ورجعت حضنتها
-أنا مش عاوزا اي حاجة فى الدنيا غيرك