...

Аввал хабар қилинганидек, жорий йилнинг 1 ноябридан «Ўздавкарантин» инспекциясига ихтиёрий мурожаат қилган ва уларнинг оқибатларини бартараф этган шахслар маъмурий жавобгарликдан озод қилиниш тартиби жорий қилинди.

Бунда эса Президентимизнинг жорий йил 13 октябрда қабул қилинган «Ўсимликлар карантини бўйича давлат хизмати фаолиятини янада такомиллаштириш чора-тадбирлари тўғрисида» ги қарори дастуриламал бўлмоқда.

Эндиликда ўсимликлар карантини давлат инспекторлари ўз ҳудудида экспортбоп қишлоқ хўжалиги маҳсулотлари етиштириш, тайёрлаш ва қадоқлаш билан шуғулланувчи тадбиркорлик субъектларига хорижий давлатлар фитосанитария талабларига тегишли маслаҳатлар ва амалий ёрдам беради.

Бу борада Тошкент шаҳар ўсимликлар карантини давлат инспекциясида ҳам амалий ишлар олиб бориляпти. Айни вақтдаги пойтахтимиздаги 11 туманга инспекторлар бириктирилган бўлиб, улар тадбиркорлик субъектларига маҳсулотларининг экспорт географиясини кенгайтиришга кўмаклашмоқда.

– Ҳозирга қадар гул импорти билан шуғулланаётган эдик, – дейди Миробод туманидаги «Шавкат ота» корхонаси раҳбари Мурод Бадалов. –Энди Туркияга чинор кўчатлари экспорт қилмоқчимиз. Бунинг учун кўчатхоналар ташкил қилдик. Уларни парваришлаш ва агротехник тадбирларни ўз вақтида амалга оширишда инспекторлар маслаҳат ва тавсиялар бермоқда. Албатта, кўчатларимизни фитосанитария талаблари асосида етиштирмоқдамиз.

Қайд этиш керакки, ҳозирда дунёда ўсимликларда учрайдиган 335 дан ортиқ карантин организмлари рўйхатга олинган. Ана шундай хавфли зараркунанда ва касалликлардан саккизтаси бизнинг мамлакатимизда ҳам аниқланган.

Бу каби карантин организмларини юртимиз ҳудудига кириб келиши ва бошқа давлатларга биз орқали ўтиб тарқалишини олдини олиш бўйича кенг қамровли чоралар олиб борилмоқда.

@AGROBLOGER канали

uza.uz