...
= حامل!! حامل إزاي يعني؟!
- هو إيه إلي حامل إزاي؟!
= أيوة احنا متفقناش على كده.
- يعني ايه متفقناش، ما هو الجواز بييجي بعده حمل وولادة وطفل زى القمر يتربى في عزكم.
= لأ أنا كنت عاملة حسابي على جواز بس، ايه الي دخلني في الحوارات دي كلها!!
- ما الجواز والخلفة باكيدج على بعضه مفيش حاجة اسمها جواز بس!!
= يا ماما أنا راضية ذمتك وحدة زيي بالتفاهة دي كلها هتخلف وتربي وتكبر إزاى، ده أنا نفسي مش متربية وعقلي أصغر من عقل عمر ابن أختي.
- والله أنا نفسي مش عارفة الله يكون في عونه والله.
= ربنا يكون في عوني أنا، مش أنا الي هحمل تسع شهور وهولد وأرضع وأسهر الليالي، ده أنا مسهرتش الليالي لطلب العلا، حتة طفل اتنين سنتي هيسهرهالي!!
- عشان تبقي تحسي بيا شوية.
= طب ومصطفى عرف ولا لسه؟!
- مش عارفة حماتك قالتله ولا لأ.
= أكيد قالتله إنتي مشوفتيش فرحت إزاى، أكيد هتحب تكون هي أول مين يقوله ويفرحه.
- والله حقها ده أول حفيد ليها.
= يختااااي ده بيتصل.
- ردي عليه.
= أقوله إيه بس، لأ أنا هنام وإنتي ردي عليه.
- أيوة يا مصطفى ألف مبروك يا بني عقبال ما تشيله بإيديك يا رب... علا... علا نايمة... لما ترجع البيت ابقوا اتكلموا وهنوا وباركوا براحتكم، بس خلي بالك منها دي لسه في الشهور الأولى ومحتاجة راحة وعناية.
" أيوة أنا محتاجة راحة وعناية بس عشان تعبانة نفسيا وجسديا فعلا مش عشان الحمل وخطر نزوله، بس لحظة هو أنا ليه متأثرتش لما قلت نزوله دي زي ما بيحصل مع أي أم، إلي هو تحس إن قلبها اتخلع مع الكلمة كده، هو أنا مالي بجد!! للدرجادي هبقى أم مش كويسة، للدرجادي أنا قلبي قاسي لدرجة إن حتة مني مش فارقة معايا كده!!".
- علا إنتي بتعيطي!!
= إنت جيت امتى؟!
- من شوية، كنت أحسبك نايمة فقعدت برة لغاية ما تصحي بس سمعت صوت عياطك.
= مفيش حاجة أنا كويسة.
- ألف مبروك يا حبيبي، اعملي حسابك راحة تامة ومفيش تعب لا نفسي ولا جسدي كل الي عليكي الفترة دي إنك تفكري في ابننا أو بنتنا وحياتنا هتنور إزاي بعد ما ييجي.
= هو احنا هنعمل إيه لما ييجي؟!
- هنخلي بالنا منه ونربيه طبعا زي أي أم وأب.
= أم!! إنت شايف إني أستحق لقب زي ده!!
- إيه الكلام الكبير ده؟!
= جاوبني بصراحة، إنت شايف إني هقدر أخلي بالي منه وأربيه كويس!!
- أكيد مش هتبقي بيرفكت وخاصة إنه أول مولود ليكي بس أنا هبقى معاكي متقلقيش.
= طب إنت إزاي متأكد كده إنك هتعرف تربي وتعتني وإنت أول تجربة ليك في موضوع الأبوة ده!!
- مش عارف بس هحاول.
= إنت جاهز لخطوة زى دي دلوقتي؟!
- هو أنا ليه حاسس إنك مش مبسوطة؟!
= عشان دي الحقيقة، أنا مش مستعدة، أنا لسه صغيرة، أنا متحملة مسؤولية نفسي بالعافية وبتخبط من أول جوازنا في مسؤولية البيت، هتحمل مسؤولية طفل إزاي، أنا أقل من إني أتحط في موقف زي ده.
- إنك تبقي أم مسمياه موقف!!
= أيا كان المسمى أنا مش عايزاه، على الأقل دلوقتي.
- أكيد بتهزري أو شاربة حاجة، مش معقول كلامك ده.
= افهمني احنا ممرش على جوازنا غير شهرين بس، يعني لسه مش فاهمين الدنيا ولا حتى عرفنا طباع بعض كويس، نقوم نجيب طفل يتوه معانا بدل ما نفهم بعض وحياتنا الأول!!
- أيوة يعني بعد الكلام ده كله عايزة إيه!!
= مش عايزة نستعجل.
- علا إنتي حامل، إنتي جاية تقولي مش عايزة تستعجلي دلوقتي!!
= ما هي دي المصيبة ومش عارفة هعمل إيه.
- لأ إنتي تنامي دلوقتي أحسن وبكرة نبقى نشوف الحوار ده، إنتي أكلتي الأول؟!
= لأ ماليش نفس.
- مفيش حاجة اسمها كده، قومي نتعشى سوا.
= روح كل إنت ماما جهزت الأكل قبل ما تمشي وسيبني انام بطني مقلوبة لوحدها.
" هو أنا خايفة من إيه، من مصطفى طيب إنه يطلع مش هو ده الزوج ولا الأب لولادي إلي بتمناه، فأجيب أطفال معقدين نفسيا وعايشين في جو متوتر وكارهين نفسهم وحياتهم ولا خايفة من نفسي، أنا فاشلة في موضوع الأطفال ده، انا ممكن أعيط جنبهم بدل ما أخلي بالي منهم، أنا إيه إلي دخلني في الحوارات دي بس، وفكرة إنه يكبر ويكرهني لأني معرفتش أخلي بالي منه وهو صغير أكيد هيفتكرهالي، أكيد مش هيحبني، هو أنا متحبش معترفة بده، لكن إن ابني ميحبنيش تقيلة أوي عليا، يا رب أموت قبل ما أشوف اليوم ده".
- علا.. علا إنتي بتعيطي بردو!!
= مفيش حاجة، أحضرلك الأكل؟!
- أكل إيه، احنا أربعة الفجر.
= أجهزلك لبسك عشان تنزل الشغل طيب؟!
- لأ حالتك مبقاش يتسكت عليها، شغل إيه إلي هروحه الفجر!!
= أنا كويسة متقلقش.
- مقلقش إيه بقالك شهر من ساعة ما عرفتي إنك حامل وإنتي لا بتاكلي ولا مركزة معايا ودايما نايمة معيطة وصاحية معيطة، وإيه حكاية الكوابيس دي كمان؟!
= مش عارفة، مش فاكرة أي حاجة.
- كنتي بتهلوسي وتقولي أنا أمك أنا مش وحشة.
= متركزش معايا تاني، وحاول تنام إنت عندك شغل الصبح.
- أنا مش فاهم كل إلي إنتي فيه ده إيه، عارفة لو مامتك كانت قاسية عليكي مثلا أو قصرت معاكي كنت هقول عندك عقدة وخايفة تبقي زيها، لكن مامتك مش كده، خايفة من إيه بقى؟!
عليت صوتي = قلتلك متركزش معايا أنا هبقى تمام.
- اهدي هتلمي الجيران علينا، احنا بكرة هنروح للدكتورة، حالتك مبقاش يتسكت عليها فعلا.
= إلي تشوفه.
********************
- اكتئاب حمل!!
= هو فيه حاجة اسمها كده أصلا!!
* اه للأسف مش بييجي غير لسبعة في المية من الستات الحوامل في العالم.
= يا فرحتي!!
- بس يا دكتورة أنا سألت دكتورة قريبتي قالتلي إنها لغبطة في الهرمونات وهتتظبط بعدين.
* ممكن بدأت معاها كده الأول، لكن فقدات الشهية عدم التركيز النوم الكتير نوبات الخوف والوسواس إلي عندها مالوش غير تشخيص واحد.
= وده سببه إيه؟!
* لأ أسبابه كتير، أولهم ممكن يكون وراثي.
= بس والدتي مجالهاش أنا متأكدة.
* ومن إلي أنا شايفاه مفيش مشاكل زوجية كبيرة أعتقد.
= لأ خالص احنا متفاهمين جدا ومصطفى كويس معايا.
مسك إيدي وابتسم..
* ممكن بقى بسبب سنك الصغير، أو الاضطرابات الكتير إلي كانت بتجيلك فترة الحيض، وممكن تبقى مضاعفات حمل عادية.
- طب ليه حل يا دكتورة؟!
* متقلقش خالص هكتبلها دلوقتي على أدوية مضادة للاكتئاب.
= وده مش هيأثر على ابني يا دكتورة؟!
" اه ابني أومال ابن مين يعني، هو أنا ليه أول مرة أحس بطعم الكلمة دي وجمالها دلوقتي، كان فين الاحساس ده قبل كده، هو أنا بدأت أتعالج قبل ما آخد العلاج ولا إيه؟!".
* متقلقيش، كل الأدوية إلي هكتبهالك آمنة جدا عليكي وعليه، بس لازم تهتمي بأكلك وخاصة بالأكل المليان بأوميجا ثري.
= زي إيه يعني؟!
* الجوز وطبعا السمك و....
= سمك!!!
* ده بالذات لازم تاكليه، ولازم تتعرضي للشمس فترة في اليوم عشان تقلل أعراض الاكتئاب دي وتابعي معايا بالتليفون دايما لو فيه جديد.
- تمام يا دكتورة، شكرا لحضرتك.
********************
- العلاج اتاخد!!
= اه.
- والجوز!!
= أكلت منه كفايتي وزيادة.
- طلعتي في البلكونة زي ما اتفقنا؟!
= طلعت لغاية ما حسيت إن جالي ضربة شمس.
- حاسة إنك أحسن طيب!!
= من يومين!! ليه يعني ده دور البرد بيقعد أسبوع!!
- أنا مش عايز أضغط عليكي واتجه لحاجة بتكرهيها.
= أوعى بحذرك إن السمك يدخل بيتي!!
- ومين قالك إني هدخله، بس ممكن أوديكي ليه.
بحماسة = متقولش، هتوديني الاسكندرية!!
- اتهدي كده اسكندرية إيه إلي نروحها، أنا بقول أوديكي مطعم سمك.
= ده على جثتي.
- طب يلا قومي اتفرجي على حلقة الدكتورة إلي قالتلك عليها.
= مش فاكراها دي.
- عشان كده كتبت اسمها، عشان عارف الزهايمر بتاعك.
= طب هسمع الإعادة بتاعتها عشان ميعاد المسلسل.
- ده على أساس إن المسلسل مالوش إعادة، وبعدين ما انتي كنتي مقضياها لنوم لعياط وتشحتفة، طلعلك منين المسلسل ده!!
= مش إنت إلي قلتلي حاولي تخرجي نفسك من المود ده بأي طريقة، فقلت أتصرف.
- لأ واضح إن السمك هيدخل بيتي عادي.
= قولي اسم القناة بسرعة.
" هو أنا بتحسن مقدرش أنكر بس مش حاسة إنه بسبب الأدوية والجوز إلي خلاني شبه الكرنبة ده ولا بسبب حلقات الدكتورة ولا قعدة البلكونة في الشمس، هو بعد فضل ربنا هيكون بسببه هو، اهتمامه بصحتي وبأدويتي ومواعيدها وإنه ماشي ورايا زي ما أكون طفلة صغيرة عشان منساش حاجة من تعليمات الدكتورة ومتابعته معايا، وأكتر حاجة واخدة قلبي لما لقيته عامل سيرش على الأكل إلي فيه الأحماض الدهنية إلي قالت عليها الدكتورة إلي اسمه أوميجا ثري تقريبا وبعدين لقيته جايبلي منهم وبكميات كبيرة زى ما يكون دخلت مزرعة تسمين مش اتجوزت، وسؤاله عليا وهو في الشغل كل شوية لما عرف من الدكتورة موضوع الانتحار إلي ممكن أفكر فيه كمضاعفات للاكتئاب ده، هو أنا اه الحمدلله عمري ما فكرت فيه بس حتة إنه خايف عليا وخايف يفقدني محسساني بأمان مش طبيعي، لأول مرة أحس إني حابة نفسي كده، حابة نفسي لأنه حاببها لأنه أكيد مش هيحب حاجة مش حلوة، ما الطيور على أشكالها تقع وأنا مش شايفة أحلى من ده طائر بصراحة وألف حمد إن ربنا كتبلي أكون من نصيبه وأدخل عشه، يلا يا قلب ماما استعجل شوية عشان تيجي تشوف بابا وتدوق من حنيته شوية، أنا بقيت متأكدة دلوقتي إنت هتحبه أد إيه وكل يوم هتشكرني عليه أد إيه".
- إيه الريحة دي؟!
= اعمل نفسك مش واخد بالك.
- متقوليش إنه سمك!!
= متذكرش اسمه أدامي لأني مش عارفة دماغي فين، وبحاول أقنع نفسي إني هاكل شاورما سوري مع تومية وبطاطس مش حاجة فيها سين وميم أبدا.
- طب وليه ده كله؟!
= لأني عايزة أخف بسرعة، أنا تعبتك معايا بما فيه الكفاية الفترة إلي فاتت فلازم تنتبه لشغلك وحياتك بقى.
- والله هو آخر معلوماتي إن الراجل لما يتجوز حياته دي بتبقى عبارة عن مراته وبيته.
= ده أساسي بس بيبقى فيه شوية رفاهيات زي قعدة على قهوة تسمع ماتش تلعب بلايستيشن بدل برامج الصحة النفسية إلي بتسمعهم معايا وإلي أنا نفسي زهقت منهم دول.
- طب ولما أنزل إنتي هتعملي إيه؟!
= هنضف هسمع مسلسل هنام هقضي وقت لطيف متقلقش.
- طب لو حسيتي إنك متضايقة أو مليتي رني عليا أنا هاكل وأنزل ومش هأخر بإذن الله.
= حاضر.
أكلنا وهو نزل وأنا دخلت أنضف المطبخ عقبال ما المسلسل ييجي، شوية ولقيت الباب بيتفتح فقلقت وافتكرته حرامي، فأخدت سكينة وطلعت، مكنتش عارفة هعمل إيه بيها وخاصة وأنا بتنفض وإيدي بتترعش كده بس أهو أي حاجة أدافع بيها عن نفسي.
- إنتي هتقتليني ولا إيه؟!
= هو إنت!! خضتني.
- إنتي لما بتتخضي بتقتلي، مكنتش أعرف إن زعلك وحش كده!!
ضحكت = إيه إلي رجعك، نسيت حاجة ولا إيه؟!
- نسيتك، أصل بصراحة جه في دماغي سيناريو مخيف خلاني قلقت فرجعت.
= سيناريو إيه؟!
- متاخديش في بالك، مسلسلك امتى؟!
= بعد ساعة تقريبا.
- بتعرفي تلعبي بلايستيشن طيب؟!
بصيتله باستغراب = لأ.
- حاسس إن مضحوك عليا سيكا.
= أيوة عايز إيه دلوقتي، هتسيبني مثلا؟!
ابتسم وأخد إيدي وقعدني جنبه - لأ، هعلمك لغاية ما المسلسل يبدأ.
" يا حبيبي مهما طال عمري معاك بردو أيامه قليلة".
" يبدو أن قد حان التقاء غريبين قد تآلفت روحهما، فالأرواح جنود مجندة وأنا روحي تألفك".