...
_أيوه أنا المعلمة سماح كبيرة الحتة دي أنت مين بقا يا حيلتها..!!
"الحياة بتجبرنا في أوقات كتير إننا نتقمص شخصية غير شخصيتنا، بس ورا كل تقمص قصة وسبب مش هين بيخلينا نعمل كدا."
_أنتِ معلمة
_مش مالية عينيك ولا إيه يالدلعادي
"حسيته خاف وبلع ريقه بالعافية"
_لا أبدًا بس أنا جاي أشتغل هنا
"قعدت على كرسي القهوة اللي كنت قاعدة عليه قبل ما يدخل علينا"
_تشتغل هنا..اممم..تشتغل إيه بقا هنا..؟
_أنا اشتريت الورشة اللي في الوش دي
_هات بطاقتك
_ليه..؟
"ساعتها جه صوت الواد حمامة صبي القهوة من جوا"
_المعلمة مبيتقلهاش ليه يا أفندي أنت
"زق الشيشة اللي كانت موجودة في الأرض وقعها وقرب مني ورفع حاجبه"
_أنتِ مفكرة نفسك مـ..
"وقبل ما يكمل الكلمة كانت مطوتي على رقبته وطبعًا مش هنسى إبتسامة السخرية"
_عرفت أنا مين..؟
"رفع ايديه ورجع لورا باستسلام"
_علشان تعيش هنا يا حلو في قوانين لازم تمشي عليها زيك زي الباقي
١/ممنوع تقرب من أي ست في المنطقة هنا وإلا فيها رقبتك
٢/عينيك تحافظ عليها ومتروحش وتيجي ورا أي واحدة معدية
٣/مناخيرك أحسلك تحافظ عليها في مكانها اللي هو وشك ومتدخلش فللي ملكش فيه
٤/كل شهر هتدفع 200 جنيه في صندوق القهوة اللي قدامك ده، ولو عدا معادك ومدفعتش هيبقوا الضعف يعني 400 يا حلو، إنما لو قررت إنك تعاند ومتدفعش خالص يبقى قول على نفسك يا رحمان يا رحيم
آمين..!!
"حك جنب شفته بالابهام وبعدين بصالي من تحت لفوق وابتسم وميل رأسه على جنب"
_تؤمري يا معلمة، اتفضلي البطاقة أهي بس متدققيش في الصورة لأحسن تتخضي
"بصيت في البطاقة وطلع مهندس ميكانيكا"
_وأنت إيه اللي حدفك هنا يا حلو
_أكل العيش مُر...بس شكله هيبقى مسكر هنا
_لو ملتزمتش بالقوانين هتخرج من هنا على نقالة يا جدع أنت، كُتر كلام مش عايزين يلا هوينا
"حك جانب شفته مرة تانية معرفش إيه الحركة دي وأول مرة أكون متوترة قدام راجل كدا..!"
_واد يا حمامة
_عيوني يا معلمة
_ضبط الشيشة ياواد
"راح فتح ورشته وبدأ يروقها لوحده ومبصش الناحية دي خالص، كويس إننا نلاقي حد يلتزم بكلامنا ويطبقه"
_يا أستاذ حمامة
"أنا لقيت الناس بتضحك ببص لقيته بينادي على حمامة وبيقوله يا أستاذ"
_جرا إيه يا جدع أنت وهو مش في سرك احنا هنا كل واحد على شغله
"فعلًا كل واحد انسحب وراح على شغله ودا اللي كان لازم يحصل محدش بيقولي لأ، قربت منه وقولتله"
_أستاذ إيه يا جدع أنت..!! أنت هنا في حارة شعبية عارف يعني ولا لأ
_يعني إيه يا معلمة..!؟
_هسيب اليومين اللي هتقضيهم هنا يعرفوك يا حلو أصل شكلك مش هتعمر هنا
"رمى الفوطة اللي كانت في ايديه في الأرض وقرب وقف قدامي ونزل برأسه علشان يبقى في مستوايا"
_نصيحة بلاش تقولي لراجل يا حلو
"حطيت ايدي على صدره وزقته لورا"
_لا تكون صدقت إنك حلو يا ...حلو
"حك جانب شفته للمرة اللي مش عارفه عددها وقال بثقة"
_للاسف مصدق وعارف إني حلو يا...معلمة
_خلي غرورك ينفعك ومتنساش أنت اليومين دول تحت العين
"ابتسم بخبث عارفه أنا الابتسامة دي كويس"
_المعلمة بذات نفسها حاطه عينيها عليا دا يا نهار فُل أوي
_يا معلمة إلحقي يا معلمة
_في إيه يا واد ما تنطق حصل إيه
_عزيز يا معلمة ضرب الحاج صالح علشان فلوس الإيجار
"أكتر حاجة بكرهها إن حد يمد ايده على حد كبير، الصغير ساعات بنعديها ونقول عيال وبتتربى إنما راجل كبير لحد هنا واستووب، مسكت طرف العباية وطلعت على أول الشارع لقيت ناس كتير ملمومة وصوت عمي صالح بيقول"
_بتمد ايدك عليا يابني علشان بطلب بحقي
_رُدله القلم يا عم صالح
"الكل التفت على صوتي وعزيز اللي الذعر بان على وشه بس بيكابر كان بيبلع ريقه بالعافية، جه عمي صالح وقف قريب مني وقال"
_خلاص يا بنتي المسامح كريم
_وأنا ولا مسامح ولا كريم..اضربه
_بس يا بنتي..
_اضربه أحسن ما أضربه أنا
"قرب منه عمي صالح علشان يضربه وعزيز بيجز على سنانه وميقدرش يتكلم، عمي صالح رفع ايده وحطها على وش عزيز ودا شيء ضايقني"
_أنا قولت اضرب يا صالح مش حسس عليه
"رفع ايده المرادي ونزل بيها جامد على وش عزيز اللي الشر كان بينط من عينيه، ابتسمت بسخرية وبعدين قربت منه"
_ليك كام يا عم صالح..!!
_250 يا بنتي
_اطلع بفلوس الراجل
"رفع رأسه من الأرض وبصيلي"
_معيش يا معلمة
"شمرت كُوم العباية ومديت ايدي في جيوبه"
_وماله يأخويا نتأكد برضك
"فتشت جيوبه ولقيت في جيب القميص اللي كان لابسه فلوس"
_أومال إيه دول يا حيلتها، حطهم الغراب في جيبك وطار..!!
_د..د..دول
_دول بالصلاة على النبي 450 جني، عمي صالح له 250 والباقي طبعًا أنت عارف هيروح فين..!!
_لا يا معلمة خلاص معيش غيرهم..سماح المرادي
_حظك إن أبويا سماني اسم مش على مسمى خالص
"قربت من ودانه وقولتله"
_فكرك إني معرفش إن في جيبك اللي ورا 180 جنية لسه واخدهم من الولا عطا..!!
"لقيته جرى مرة واحدة على عمي صالح وباس رأسه واعتذرله قدام الناس كلها"
_يلا كل واحد يشوف وراه إيه..فضيناها سيرة هي
"قربت منه تاني بعد ما الناس مشت وقولتله"
_أنت عارف يا عزيز إنك لو غلطت تاني هتكون فين يا حلو..!!
_عارف يا معلمة سماح
_على شغلك
"راجعة تاني مكاني لقيته واقف في وشي ومذبهل تخطيته ولا كأني شوفته"
_إيه اللي حصل ده..!! ازاي الناس دول بيخافوا منك كدا، أنتِ المفروض ست يعني النعومة والرقة مش البلطجية دي
"رديت عليه بلامبالاة"
_النعومة دي تحس بيها لما تحلق دقنك يا حلو
_أنتِ أكيد بتاجري في المخدرات أو السلاح ودول ناسك مش كدا..!!
_آها هو كدا ويلا شوف شغلك بدل ما نسلم على جيبك أنت كمان
"انسحبت وروحت قعدت على القهوة في مكاني، وفجأة لقيت أمال نازلة تعيط وواخدة في وشها على برا"
_خدي يابت مالك
_أمي يا معلمة تعبت تاني..أنا مليش غيرها يا معلمة أبوس ايدك ساعديني
"مسكتها من ايديها وطلعنا على شقتها"
_السُخونية مبهدلة أمك سايباها ازاي كدا أنتِ
"سبتها قبل ما ترد وطلعت البلاكونة ونديت على حمامة بس مش باين، فلقيته بيبص لفوق"
_أنت يا باشمهندس أنت
_خير يا معلمة..!!
_شايف البيت القديم اللي قصادك على أول الشارع ده، روح هناك هتلاقي دكتور هاته بسرعة
"راح فعلًا من غير ما يتكلم ويلُوك زي عوايده، شويه ولقيت الباب بيخبط كانت أمال هتقوم تفتح بس قعدتها وقومت أنا"
_خش يا دكتور شوف أم أمال مالها أصلك دكتور بهايم لو كنت بتفهم مكناش جبناك كل شويه كدا.
"دخل الدكتور مع أمال جوا ودا لسه واقف"
_أنت واقف ليه..؟!!
_علشان أوصل الدكتور
_حد قالك إنه نُغه ومش هيعرف يرجع لوحده، يلا روح شوف وراك إيه
"قفلت الباب في وشه ودخلت جوا عند أم أمال"
_خير يا دكتور مالها الست أم أمال..؟
_واخده دور سخونية يا معلمة فـ بحكم السن معندهاش المناعة الكافية فدا هيأخر الدور معاها شويتين، بس هتبقى كويسة
_عالله يطلع كلامك غلط..لأحسن بصراحة احنا مش عايزين نشوف وشك تاني
"مشى وأنا قربت من أمال اللي كانت بتعيط"
_بتعيطي ليه يابت، أمك وزي الفل دي فيها صحة عننا كمان مش كدا ولا إيه يأم أمال..!!
_الله يبارك في شبابك اللي ضايع علينا يابنتي
_يلا يا أمال روحي اعملي للحاجة حاجة تأكلها علشان العلاج، أقولك الولا اسماعيل مربي فراخ فوق السُطح اطلعي خدي واحدة ادبحيها لأمك ولو اتكلم قوليله تخص المعلمة.
"الليل جه وكله بدأ يقفل شغله ويروح وأنا مروحة لقيته داخل معايا نفس البيت"
_رايح فين يا جدع أنت
_طالع أنام يا معلمة في مشكلة..!!
_طالع عند مين..؟
_عدم المؤاخذة في الأوضة اللي فوق السُطوح
"هزيت رأسي ودخلت شقتي وهو كمل طلوع فوق، دخلت وقفت قدام المرآية وخلعت خماري الطويل وبدأت أفكر من امتى وأنا بطلت أشوف نفسي بنت..!! دخلت في شخصية مكنش يجي حتى في خيالي إني أكونها بس لو مكنتش اتقمصت الشخصية القوية دي مكنش زماني عايشة، أو كان زماني عايشة خايفة منهم كلهم وبدور على مكاني أنام فيه ومش عايزة حاجة تانية غير كدا، بس الزمن ده مش عايز كدا زمن الضعيف ول وخلص، دلوقتي الدنيا غابة والبقاء فيها فعلًا للأقوى مش للأطيب والأحن، من يوم الحادثة وكل حاجة اتغيرت، بصيت على الصورة المحطوطة على التسريحة ورايا"
_وحشتيني يا سهيلة
"الأيام بتكرر وكلها بقت شبه بعضها والوقت بيمر بس البني آدم هو اللي ثابت مكانه، النهاردة هنلم فلوس الشهر"
_فاضل حد مدفعش يا حمامة..!!
_حمزة الميكانيكي يا معلمة
_هو فين..!!
_الورشة قافلة من الصبح ومش باين
_جهز أنت الفلوس على ما أجي
_أوامرك يا معلمة
"رجعت تاني ناحية البيت وطلعت فوق مكان ما هو ساكن فتحت الباب الرئيسي بتاع السطح لقيته واقف وواقفة قدامه منة الصغيرة بنت الست منال العامية وحاطط ايده على كتفها، قربت شديته لورا ورفعت ايدي بكل قوتي علشان أضربه بالقلم بس ايدي وقفت في الهوا لما مسكها هو"
_بترفعي ايدك عليا ليه أنتِ..!!
"بصيت لمنة لقيتها بتعيط ومخبية ايديها ورا ضهرها، سحبت ايدي منه وزقيته لورا بقوة وصرخت فيه"
_عملتلها ايييه..!!!
"جريت على منة مسحتلها دموعها ولقيت ايديها متعورة، حاولت اكلمها بالراحة علشان متخافش مني"
_مالك يا حبيبتي، إيه اللي عورك كدا.. عملك إيه الراجل ده..!!
"جريت عليا حضنتني وساعتها شوفت سهيلة قدامي مش منة، حضنتها جامد وسمعتها بتهمس"
_متقوليش لماما يا معلمة
"دلوقتي عيني بتطلع نار هتحرقه مكانه"
_ايه اللي حصل يا منة..!!
_كنت جايبه لماما بيض وطالعة جري وقعت من على السلم وأيدي اتعورت وعمو حمزة كان نازل لقاني بعيط خدني ربطلي ايدي ونزل جابلي بيض بدل اللي اتكسر، ماما لو عرفت إني اتعورت هتزعل وأنا مش عايزاها تزعل مني علشان هي تعبانة، مش أنتِ قولتيلي متزعليش ماما علشان هي تعبانة..!!
"حطيت ايدي على قلبي واتنهدت براحة"
_أيوه يا حبيبتي، يلا خدي البيض بتاعك وانزلي لماما علشان متقلقش عليكِ
"خدت الحاجة وابتسمت لحمزة ونزلت، وأنا كنت لسه هنزل ونسيت أصلًا كنت جايه ليه"
_فكرك راح لفين يا معلمة..!!
"رسمت الجمود على وشي وبصيتله"
_اللي حصل دا ميتكررش تاني...لمصلحتك
"جه وقف قدامي وملامح الصدمة باينة عليه"
_دي طفلة..طفلة إيه اللي في عقلك علشان تفكري إني ممكن أبص لطفلة لسه مبلغتش حتى..!!
"محستش على نفسي غير وأنا بقول"
_سهيلة برده كانت طفلة لما قتلها
_سهيلة مين..!!
_أختي الصغيرة
_حصلها إيه..؟!!
"فوقت على نفسي إيه اللي أنا بقوله ده، ومين دا أصلًا علشان أحكيله"
_اتفضل انزل حط الـ 200 جنية في الصندوق مش فاضيلك احنا
"سبته ونزلت وهو وقف مذهول، خليه مذهول ملهوش حق يعرف حاجة، وأنا عمري ما هحكي لحد"
"نزل بعدها بشويه حط الفلوس وطلع على أول الشارع من غير ما يتكلم"
_سهيلة أخت المعلمة سماح ماتت ازاي..!!
_حمزة..!! إيه اللي جابك هنا يابني وايه اللي جاب السيرة دي..!!
"شد كرسي وقعد قصاده"
_أنا من ساعة ما جيت هنا وأنا بحترمك يا عم صالح، وعارفه إن العلاقة بينك وبين المعلمة مش علاقة معلم وواحد من أهل الحارة، أنا بشوف في عينيك إنك بتعتبرها بنتك صح..!!
_صح يابني، سماح دي بنتي اللي مخلفتهاش
_يبقى احكيلي الله يبارك، سهيلة ماتت ازاي..!! وليه وازاي سماح بقيت معلمة والكل بيسمع كلامها هنا الكبير قبل الصغير..!!
_وأنت إيه اللي عرفك بـ سهيلة..وهيفيد بإيه الفتح في المقفول يابني..!!
_المعلمة نفسها كانت بتحكيلي عن سهيلة بس وقفت فجأة ومكملتش وأنا عايش هنا لحد دلوقتي بقالي شهر وعايز أفهم، ليه الحياة المكلكعة دي هنا..!!
"الراجل قام مرة واحدة مصدوم"
_المعلمة سماح كانت بتحكيلك عن سهيلة طب ازاي، دي عمرها ما عملتها وفتحت الموضوع ده مع حد..!
_اقعد بس واحكيلي ونبقى نفهم القصة دي بعدين..!!
_بس يابني أصله...
_في بير والله
"رجع قعد وبص لقدامه كأنه بيسترجع اللي حصل من سنين"
_سهيلة دي أخت المعلمة الصغيرة لم جم يعيشوا هنا كان معاهم أبوهم الحاج عبدالله الله يرحمه، مات بعد القعدة هنا بحوالي خمس شهور وفضلوا البنات لوحدهم سماح كانت لسهيلة الأم والأب والأخت وكل حاجة، سهيلة كان عندها 12 سنة في يوم سماح كانت بتساعد واحدة جارتها علشان حنتها بتعمل معاها الواجب يعني، سمعت صوت صريخ جامد طلعت تجري على شقتها لقت أختها بتنزف وقدام جنبها واحد ابن حرام بعد ما اعتدى عليها كان عايش هنا في الحارة، طلعت تجري على سهيلة لقتها قاطعة النفس، الشر طلع من عينيها وقامت ماسكة الشاب ده من هدومه ونازلة بيه لنص الحارة هنا، الناس اتلمت تشوف إيه اللي يخلي بنت هادية وفي حالها زي سماح تضرب راجل كدا، الناس كانوا لسه هيدخلوا في الموضوع بس صرخت فيها إن محدش يقرب والكل وقف مبهوت بعيد، سحبت ماسورة مياه قديمة كانت متلقحة في الأرض وفضلت تضرب فيه وهو مش قادر يدافع عن نفسه حتى وقع في الأرض بينزف من كل حتة وهي طلعت تجري معرفش جابت جاز منين بس فجأة صوت الصريخ عُلا لما الحارة كلها شافت النار ماسكة في الراجل ده، مات محروق..الناس بقت مذهولة لأقصى حد ازاي بنت عندها عشرين سنة تعمل كدا، الكل بدأ يخاف ويكش منها، والرجالة قبل الستات، ومن ساعتها راحت سماح اللي كانت هادية وفي حالها واترسم مكانها المعلمة سماح وبقت المسؤولة عن الحتة دي، بس بأمانة يابني عمرها ما ضلمت حد في يوم ولا جات على حد هي تبان قوية بس عشان مصلحة الكل، علشان كدا الكل بيحترمها قبل ما يخاف منها.
"قومت روحت الورشة وأنا كمان زي زيهم مصدوم ازاي واحدة قدرت تعمل كدا ومخافتش..!!"
_حمامة
_أيوه يسطا
_أومال المعلمة فين مش باينه
_يخصك في إيه..؟؟!
_يابني ما تخلص في مصلحة وعايز أشور عليها بما إنها كبيرة الحتة هنا
_المعلمة في المدرسة ومش هتيجي دلوقتي
_فين..!!؟
_في المدرسة يسطا حمزة مالك
_في سنة كام
_ههههههههه دمك يلطش يسطا والله، لو المعلمة سمعت كلامك ده هتعمل منك طعمية
_طب يا خفيف ما تتكلم عِدل وتقول بتعمل إيه في المدرسة..!
_المدرسة دي المعلمة بتبنيها علشان ولاد الحارة يتعلموا وبتأخد الفلوس بتاعت كل شهر وتروح بيها للعمال..عن اذنك أنا بقا علشان القهوة لوحدها
"إيه الست دي"
"الليل جه والحارة تقريبًا بقت شبه فاضية وهي لسه مجتش، حسيت بقلق عليها مش عارف أصله إيه، فضلت قاعد في الورشة لحد ما شوفتها جايه من بعيد، قفلت الورشة بسرعة وطلعت أجري مشيت جنبها"
_أنت لسه فاتح ليه لحد دلوقتي..؟
_مستنيكِ
"لوهلة حسيت بكهربا في جسمي من نبرة صوته، بس لأ مينفعش"
_إلعب غيرها يا حلو
_طالما هلعب معاكِ معنديش مانع.
"دخلت من باب البيت وهو كمان وصلت لحد شقتي وفتحت الباب ولسه هدخل لقيته بيبصلي بعد ما طلع شويه فوق"
_متتأخريش تاني كدا يا معلمة في ناس بتخاف عليكِ.
"الجملة هزتني من امتى محدش حسسني إنه مهتم بيا..!!"
_اللي يخاف ملهوش مكان هنا يا باشمهندس
"عدا شهور وفيها أيام حلوة كتير، مش هنكر إن الباشمهندس ده عمل روح للمكان وكذا مرة أشوفه بيساعد الناس في السر، أيوه بعترف إني غلطت لما قولتله شكلك مش هتعمر هنا، دا خلى كل الناس تحبه، ودي حاجة صعبة اليومين دول، نسيت أقولكم كل سنة وأنتوا طيبين النهاردة العيد"
_كل سنة وأنتِ طيبة يا معلمة
"النهاردة العيد مفيش مانع لو ابتسمت شويه صغيرين"
_وأنت طيب يا باشمهندس
"قرب مني وكان لسه هيمسك ايدي"
_ما تيجي نركب المرجيحة وأقولك كلمة سر
"قربت برأسي منه وهمست"
_خد بالك أنت بتكسر القوانين يا حلو
_القوانين معمولة أصلًا علشان تتكسر يا معلمة، وبعدين ما أنا من زمان بكسر القوانين وأنتِ سكتالي..سكتالي ليه بصحيح..!!
_عايز إيه أنت..؟
_اتجوزك وأجيب معلمة صغيرة
"وشي احمر ودا طبعًا تلقائيًا"
_ايه ده أنت بتتكسفي زي البنات وكدا..!!
_وبعدين معاك يا جدع أنت..اللاه
_يبقى على خيرة الله، نجيب المأذون
_خد هنا يا حلو هو أنا قولت أها
_الكسوف علامة الرضا يا معلمة
_ولو قولت لأ ..؟
_الست اللي بحق متقولش لراجل حلو لأ