...

Қишлоқ хўжалиги маҳсулотлари орасида мева-сабзавот экспорти кун сайин ортиб бормоқда. Хусусан, анор ва хурмо етказиб бериш борасида кўплаб хорижий мамлакатлар билан шартномалар тузилган.

Айни кунларда Сурхондарё Қашқадарё ва водий вилоятлари Россия ва бир қатор қўшни давлатларга анор экспортида пешқадамлик қилмоқда. Ушбу мева турини экспортга фитосанитар тоза ҳолатда етказилишида эса карантин инспекторларининг назорат тадбирлари муҳим аҳамият касб этмоқда.

Тошкент шаҳар ўсимликлар карантини давлат инспекцияси маҳсулотларни фитосанитар тозалигини таъминлаш ва карантин ҳолатини назорат қилиш чораларини кўряпти. Мисол учун, пойтахтимиз бозорларига вилоятларда етиштирилган анор маҳсулотларини етказиб беришда қатъий назорат тадбирлари амалга оширилмоқда.

Инспекторлар сотиладиган анорни карантин кўригидан ўтказиш, тадбиркор ва сотувчиларга мазкур зараркунандалар тўғрисида тушунча бериш, хашорат аниқланса зарарсизлантириш ишларини олиб бормоқда.

– Жорий йилда анор ўтган йилгидан кўра кўп ҳосил бераётгани қувончли, – дейди Чилонзор тумани агроном-инспектори Мунира Согатова. – Бунинг асосий сабабларидан бири – ҳудудлардаги карантин инспекторлари анор етиштирувчилар билан ҳамкорликда ишлади. Парваришлаш даврида зараркунандалар тушиши олди олиниб, минерал ўғитлар вақтида берилди. Жойларда «комсток қурти ва анор қурти» зараркунандаларига қарши кураш самарадорлигини оширишда шаҳар ҳудудидаги аҳоли томорқасидаги оз миқдорда етиштирилаётган анор дарахтлари ҳам назардан четда қолмаяпти. Хонадон эгаларига, тадбиркорларга ушбу зараркунандалар ҳақида маълумот берилиб, унга қарши кураш бўйича таклиф ва тавсиялар берилмоқда.

Тошкент шаҳар ўсимликлар карантини давлат инспекцияси агрономи Мадина Бакиеванинг айтишича, анор қурти анор меваси учун ҳавфли зараркунанда ҳисобланади. У асосан анор дарахтини ўсув даврида дарахт тўқималарини кемириб, зарар етказади ва натижада ҳосилдорлик кескин пасайиб кетади. Анор қурти пишган меваларни ҳам қаттиқ зарарлайди. Бундай мева чириб сақлашга яроқсиз бўлиб қолади.

Қайд этиш керакки, вилоят карантин инспекторлари ҳудудлардаги анор дарахтларини назоратга олган. Айниқса, анорзорларда ферамон тутқичлардан фойдаланилган бўлиши, экспортга мўлжалланган анор импортёр давлатлар талабига кўра зарур ҳолларда зарарсизлантириш (фумигация) ишлари бажарилиши хамда экспорт учун йўналтирилиши лозим.

@AGROBLOGER канали

ЎзА, uza.uz