...

Мамлакатимизнинг Хитой Халқ Республикасидаги элчихонасида «Beijing GOKO Investment Management Co., LTD» компанияси бош менежери Ху Нинг билан учрашув бўлиб ўтди, деб хабар бермоқда «Дунё» АА.

Мазкур компания қадоқланган қуруқ мевалар ва қуритилган денгиз маҳсулотларини ишлаб чиқаришга ихтисослашган йирик компания ҳисобланади.

Ху Нинг Ўзбекистонда тайёрланган сифатли ва табиий қуритилган меваларнинг Хитой бозорига етказиб берилишидан манфаатдорлик билдирди.

Учрашув чоғида мамлакатимиз заминида етиштирилган қора майиз, қуритилган олхўри ва бошқа қуруқ меваларни Хитойга экспорт қилиниши билан боғлиқ масалалар атрофлича муҳокама этилди. Компания вакилларига элчихона ходимлари томонидан мамлакатимиз ишлаб чиқарувчилари таклиф этаётган маҳсулотларнинг намуналари тақдим этилгани баробарида, қуритилган мевалар сифатига қўйиладиган талаблар ҳамда логистика билан боғлиқ масалалар юзасидан ҳам ўзаро фикр алмашилди.

Учрашув якунлари бўйича 2020 йилнинг охирига қадар Хитойга Ўзбекистондан 500 тонна қора майиз етказиб берилиши юзасидан келишувга эришилди.

Шунингдек, «Beijing GOKO Investment Management Co., LTD» раҳбари ўз компаниясининг ишлаб чиқариш жараёнлари билан танишиш ва бундан кейин ҳам ўзаро ҳамкорликни давом эттириш масалаларини муҳокама этиш учун мамлакатимиз корхоналари вакилларини Пекин шаҳрига таклиф этди.

Ўзбекистоннинг Пекиндаги элчихонасида мамлакатимизда ишлаб чиқарилган қишлоқ хўжалиги маҳсулотларининг Хитой бозорига етказиб берилиши юзасидан йўлга қўйилган тизимли ишлар изчиллик билан давом эттирилмоқда.

@AGROBLOGER канали

xs.uz