...

Олтингугурт мевали боғларда, токзорларда ва очиқ дала экинларидаги ун шудринг, занг, олма дарахтидаги парша (қўтир), данакли меваларнинг ичидан чириши ва бошқа касалликларга қарши қўлланади.

Олтингугурт кукун ёки сувли эритма сифатида ишлатилади. Ҳаво ҳарорати +32 даражадан юқори бўлганда олтингугуртдан фойдаланмаслик керак, чунки ўсимлик баргларини куйдириш хусусиятига эга. 

Айниқса, иссиқхонлардаги экинларда қўллаш қатъиян ман этилади, лекин профилактика учун юқоридаги тортилган симларга докага 100-150 грамм солиб, ҳар 10 кв.м да 1 тадан илиб қўйиш мақсадга мувофиқ. Бу тадбир қуёшли кунларда ҳашоратларни ҳам иссиқхонадан қайтаради. 

 Олтингугурт фойдали ҳашаротларга зарар етказмайди. Олтингугуртли препаратни сепган одам махсус ҳимоя кийимини кийиб олиши керак. Олтингугурт кукуни билан нафас олмаслик ва териси ёки кўзларига текизмасликка ҳаракат қилиш зарур.

Олтингугуртнинг токзорларда қўлланилиши.

Агротехник тадбирлар ўтказиш билан бир қаторда токларга туйилган олтингугурт билан ишлов бериш яхши самара беради.

Токларда биринчи маротаба эрта баҳорда новдалар боғланиб, 3–4 тадан чинбарг ҳосил бўлганда, 8–10 кундан кейин – иккинчи маротаба, ток гуллаб бўлгандан кейин 2 ҳафта ўтгач, учинчи маротаба олтингугурт чанглатилади. 

Узумзорларни ёшига ва қалинлигига қараб гектарига 20 кг дан 35–40 кг гача олтингугурт сарфланади. Олтингугурт кукуни бўлмаса 1 фоизли ҳўлланувчи олтингугурт пуркалади (10 л сувга 100 г). 

Унинг ўрнига 10 фоизли Топаз эм.к. (10 л сувга 5 г) ёки Вектра (10 л сувга 3 г) препаратларини ҳам қўлласа бўлади. Ёки улардан кўра хавфсизроқ ва самаралироқ бўлган Спорагин биологик фунгицидини 10 литр хлорланмаган сувга 150 грамм миқдорида ишчи эритма тайёрлаб, пуркаш ишларини олиб бориш тавсия этилади.

AGROBLOGER канали