📡

*Sawrkar Hmalak Danah Tih Dik Loh A Awm Lo -Revenue Minister*

By Theaizawlpost Last updated Sep 14, 2021

National highway zauhna turah Kawnpui ram huamchhunga dan dik loin valid pass siam tumin sawrkarin thil a ti ni awma MLA Pu Lalduhoma’n a sawi chu, dan ang loa thil tih pakhatmah a awm loh thu leh, enfiah ngai a awm a nih chuan en that leh an inhuam reng tih Land Revenue & Settlement minister Lalruatkima chuan a sawi.

Revenue minister chuan Kolasib district chhung, NH-06/306 kawng zauh that tur bikah Ministry of Road Transport & Highways (MoRTH) in hriattirnna a siam zulzuiin kawng siamthatin a lak tur ramah revenue dan angin valid/ revenue pass ni lo VC pass nei an tam a, heng VC pass neitute list hi Bhoomirashi Portal-ah MoRTH hian 3(A) angin update/dah a ni. VC pass neite hian an ram leh huan hi hun rei tak atanga eizawnna atana an lo hman tawh, an pi leh pu atanga an huan ro kumkhuaa tih chhiat tur te an ni hlawm a, hengte hian sawrkarah dan hnuaia pass an neihna tura order chhuah mai a ni a.

“Dan loa periodic patta siam tumna a awm lo a, ram neitu diktak leh kuthnathawktute tan erawh dan angin valid pass siamsak tum a ni. Periodic patta lem siam tumna a awm sawrkar chuan a hrelo,” a ti a. Mizoramah mi engemawzat ram pass (valid pass) nei lo, mahni ram enkawl ve reng an tam hle tih sawiin, hetianga phalna nei loa ram enkawl hi a enkawltu tan dan hnuaiah a him loh bakah sawrkar pawhin revenue a lak theih loh avangin engemaw chenah revenue an chan tih a sawi a ni.

NH-06/306 atana ram lak turah hian a laitu tur NHIDCL chuan heng ram huamchhunga ramah hian ram lei leh hralh bakah ram inpek thar awm tawh lo turin a rawn ti a, kawngpui kal dan tur chu an thlak tih hre loin, kawng hi cheithat leh tihchangtlun tur anga an lehkha subject ah hian tarlan a nih avangin NH-06 leh NH-306 atan ram inpek thar leh valid pass ni lote tinung belh tawh lo tura tihna freezing order tihchhuah a ni a. MoRTH hian ram lak tur chungchanga hma la turin Kolasib additonal DC chu compenent authority of land acquisitio (CALA) atana ruatna chu gazette ah a tichhuak zui ta tih Revenue minister hian a sawi.

NHIDCL hian kumin Jnauary khan LR&S department chu lehkha thawn lehin geo-coordinates anga ram lak tur hi ‘freeze’ tha turin a rawn ngen leh tih a sawi a. A hmaa freezing order chhuakah geo-coordinates a awm loh vanga hetianga rawn ti nawn an nih thu sawiin, NHIDCL hian a hmaa order chhuah tawh hnu lama ram pekte chu compensation an pek theih dawn loh thu an rawn sawi tel bawk tih a sawi a ni.

“NHIDCL-in geo coordinates anga freeze tha tura min rawn ngen angin kumin April 7 khan road alignment thar tur atan freezing order tihchhuah that lehah tihchhuak hmasa zawka ram dilna dawn tawh chu dan anga process tur tih a nih bakah provision thar – ‘Ram enkawl tha, eizawnna leh chhungkaw chawmna atana ram lo hmang, revenue danin valid pass nei lo ni anga a sawi leh ngaih, chutiang an lo awm a nih chuan an ram awmna VCP leh settlement officer (district) ten an certified chuan valid pass pek tura ngaihtuah theih a ni anga; heng documentary proof te hi a dik lo a nih erawh chuan a certified-tu chungah The Mizoram Land Revenue Act 2013 a tarlan leh hemi chungchang dan hmanlai in a sawi angin hremna pek an ni ang,’ tih chu dah tel a ni tih a sawi.

He hriattirna tihchhuah a nih dawn hian LR&Settlement minister a nihna angin kumin Assembly Budget Session lai khan Assembly Secretariat Recess Room-ah MLA pathum – Zodintluanga Ralte, C. Lalsawivunga, VL Zaithanzama leh Dr Vanlalthlana te pawh a sawipui a, thurawn emaw rawtna emaw pek tur an hre bik lo niin Lalruatkima hian a sawi bawk.

“Mi 71 valid pass nei lo dan dik lo taka valid pass pek tum nia sawi awm hi keini chuan a awm kan hre loa, a awm a nih chuan a en leh theih anga, dik lo an awm a nih chuan hma kan la ang,” a ti a. Tuna valid pass nei lo, valid pass neih tirna erawh NH Act Section 3(A) hnuaia ram neitu diktakte vek an nih thu leh, an zingah hian ZPM VC te pawh an tel thu a sawi a.

ZPM leader chu an mite chawbel benbuak sak tuma a ngaih thu te, Tuirial bialtu MLA boral ta Pu Andrew H Thangliana pawhin heng mite hian valid pass an neih theih nan amah, minister ngei pawh a ngenpui thu a sawi a ni.

Pass siam tumnaah sawrkar official thenkhat thawhpui theih lohte sawnchhuak anga puhna pawh LRS minister hian a chhang a. Officer-te sawn chu DP&AR thu a ni a, tuna an thil buaipui lai nen inkungkaihna a nei loa, amah emaw Revenue department emaw a inrawlh lo tih a sawi a ni.