🚀🌎🚀

*The Aizawl Post*

   *ARTICLE*

*Thalaite vaihlo laka fihlim tura hmalak*

 11/09/2021

Dr H. Lianthangpuia

State Nodal Officer

National Tobacco Control Programme

National Health Mission

Chhiartu mipui zawng zawng te vawiin “8th Mizoram State Anti-Tobacco Day” hmingin chibai ka buk vek a che u. Kumin State Anti-Tobacco Day thupui atan hian thupui pawimawh tak “|halaite vaihlo laka fihlim tura hmalak” tih chu thlanchhuah a ni a.

Global Adult Tobacco Survey-2 (2016 – 2017) chuan Mizoram mipui zinga mi 96.7% lai te chuan vaihlo zuk leh hmuam hian natna khirh tak (serious illness) a thlen thei a ni tih an hriat thu leh mi 93.6% in midangte meizuk khu an hip avangin meizu ve lo te chungah natna khirhkhan tak tak a thlen thei a ni tih an hriat thu a tarlang a ni. Amaherawhchu, vaihlo zuk leh hmuam that lohna thu mi heti zat hian kan hriat tawh laiin he zirchianna vek hian 58.7% te chuan vaihlo zuk leh hmuam kan la hman mek thu a tarlang bawk a ni.

GATS-2 hian 84.1% lai te chuan mahni inchhungah midang meizuk khu (secondhand smoke) kan hip/tawrh thu a tarlang bawk a ni. Nu leh pate zingah mahni fate, vaihlo zuk leh hmuam laka an fihlim duh lo tumah kan awm awm love. Amaherawhchu, GATS-2 in a tarlan dan hian mahni inchhungah ngei pawh kan fate meizuk khum kan la awm tam hle niin a lang a, kan tu leh fate hmuha vaihlo zuk leh hmuam kan tih fo a, a lei tur hial pawha kan tirh thin avang te hian anmahniah tih ve chhin chakna leh pawmzamna; thil pawi leh tha lo anga ngaih lohna a thlen thei a ni tih reng kan ngaihtuah lo mai thei. Kan nun dan leh awm dan min zir reng an nih avangin naupang kan enkawl dan kan insiam that a pawimawh takzet a ni.

Mithiamte chuan vaihlo hi “Ruihhlo bul tanna kailawn” (Gateway Drugs) an lo ti hial a. Hetiang tak hian vaihlo lakah kan thalai leh naupangte kan venhim a pawimawh avangin vaihlo khuahkhirhna dan – COTPA, 2003 chuan kum 18 hnuailam hnenah vaihlo leh a kaihhnawih zawrh leh heng kum tling lo te zawrhtir pawh a khap a. Tin, he dan hian zirna-in atanga 100 yards (300 ft) huam chhunga vaihlo leh a kaihhnawih reng reng zawrh a khap bakah naupang ten vaihlo leh a kaihhnawih product te awlsam taka an neih theih (easy access) tur zawnga zawrh/chhawp chhuah a phal lo bawk a ni.

17th August 2021-a North East States hrang hrang Health Minister- te meeting an neihna a tlangzarh tak Global Youth Tobacco Survey – 4 (GYTS-4) chuan kan thalai naupang (13-15 yrs) te zinga 58 % lai te chuan vaihlo an hman thu leh heng zinga 52,7% te chuan meizuk sim an duh bakah 50.2% te chuan vaihlo hmuam chi sim an duh thu a tarlang a. He zirchianna vek hian heng thalai naupangte vaihlo hman tan hun (mean age of initiation) a rawn tarlang tel bawk a, hetiangin – cigarette = 11.1 yrs, bidi/zozial = 11.5 yrs, leh hmuam chi (smokeless) = 10.1 yrs. He zirchiannain a tarlan dan hian kan thalalai leh naupang tamtak, vaihlo zuk leh hmuam ti ve rual pawha kan la ngaih loh te zingah hian zuk leh hmuam laka harsatna tawk mek an awm nual a rinawm bakah heng zingah hian vaihlo sim duh si sim dan kawng hre lo puih ngai ngawih ngawih pawh an awm a rinawm. Heng harsatna tawk mek thalai leh naupang zingah hian kan tu leh fate an lo tel ve reng em le?

Hetiang tak hian kan thalai naupang ten vaihlo zuk leh hmuam laka harsatna an tawh mek avangin kumin “Mizoram State Anti-Tobacco Day” thupui atan pawh “|halaite vaihlo laka fihlim tura hmalak” tih chu thlanchhuah niin he thupui denchhen hian chak lehzuala kan thalai leh naupang te vaihlo laka an fihlim theihna tura hmalak a pawimawh hle a, he hmalakna-ah hian nu leh pa, Kohhran, khawtlang leh tlawmngai pawl hrang hrangte pawh kan tu leh fate vaihlo laka an fihlim theihna tura theih tawpa hma min lakpui turin leh hemi kawnga min finchhuaha min tawiawm zel turin kan sawm tak meuh che u a ni.

A tawp berah chuan vawiin 11th September, 2021 “Mizoram State Anti-Tobacco Day” hi vaihlo zuk leh hmuam hmang mek ten vaihlo hman kan sim tan ni atan leh a la hmang ngai lote pawhin hmang lo tura kan intiam thar ni atana lo hmang theuh turin ka sawmin ka ngen che u a, rilru ngaihtuahna thar nen a hnuaia ‘Thutiam/Pledge’ hi lo la ve turin mitinte ka ngen che u a ni. Tin, ‘Thutiam’ hi nu leh pa ten kan fate/nau te lo tiamtir ve theuh turin kan inngen bawk e.

(Note: Vaihlo sim duhte tanpui turin District Hospital hrang hrangah Tobacco Cessation Clinic (TCC) a awm a, mamawhte chuan i pan zel ang u.)