🇮🇳

*VANGLAINI - INFIAMNA*

*London derby : Champion tum Chelsea vs Spurs*

13th August 2022

Premier League an ṭan deuh chauh a, inkhel hmuhnawm en turin min hmuak nghal - Pathianni zan dar 9:00-ah Chelsea chuan Tottenham Hotspur an mikhual dawn a, a hmuhnawm loh ring suh.

Stamford Bridge-a inkhel tur hi London derby a nih miau avangin hei ringawt pawh hi inkhel boruak tihsan nan a tling tawk - mahse, chu ai maha boruak ti 'hot' zual tur chu Antonio Conte a ni.

Chelsea ban hnu Conte hian a club hlui lakah phuba lak a la châk reng ang tih a chiang a, Pathianni zanah hun ṭha a nei dawn - champion team-a Spurs tuai thar tumtu hian thei tak ang maw?

Chutihrual chuan Chelsea hi coach ṭha Thomas Tuchel-a'n a kaihruai ve tho tih hriat a ṭha a, mahni muala inkhel tur Blues hian hun rei tak chhung champion dan thiam tawh lo team hi an hlau lo ang.

A bul ṭan ṭhat

Premier League-a an match hmasa berah team pahnih hian hnehna an chang ve ve a, mahse, an hnehna chan dan thlir chuan kawng engkimah Spurs an chungnung zawk tiin a sawi theih.

Thomas Tuchel-a hnuaiah Chelsea an la bazar zo lo niin a lang a, tunah pawh Barcelona duh loh Pierre-Emerick Aubameyang leh Frenkie de Jong chu an la dawr mek nia sawi a awm.

Blues hi tlarhnung lam khawng ṭha viau mah se an game a dul a, a hmuhnawm tawk lo. First half hun pek belha Jorginho penalty an vanneihpui hlauh a, an mualpho lo mai zawk a ni.

Hetihlai hian Spurs erawhin Southampton lakah goal li ngawt an khung a, goal khat chhuah ve bawk mah se 4-1 in hnehna an chang a, an khel a hmuhnawm takzet.

Tlarhnung vs tlarhma

Chelsea-in tlarhmaa khel turin Kai Havertz, Mason Mount leh player lakluh thar Raheem Sterling an nei a, mahse, Everton nena an inkhel thlirtu an fan-te chuan an hriam tawk lo an ti ngei ang.

Tlarhnungah player lakluh thar Kalidou Koulibaly erawh a khawng em em a, tawnhriat nei ṭha Thiago Silva nen an inkawp bawk avangin, Everton tlarhma tan ṭhiah ngaihna an awm lo a ni ber.

Mahse, Everton hian tlarhmaah tawnhriat nei tam lo Anthony Gordon chu an chhawr a ni a, player hmabak nei êng tak ni mah se a la hriam tawk lo - Spurs erawh Son Heung-min leh Harry Kane te nena goal nawr tur an ni.

Chelsea defender thar Koulibaly tan fiahna tak tak a ni thei ang tih a chiang a, Dejan Kulusevski lah London-ah a tlangnel tawlh tawlh a, Silva leh a ṭhiante tan hna a tam dawn.

Spurs an inringtawk

Conte awm hnuah Spurs-in rin an hlawh lehzual a, kum 53 mi coach hian November, 2021 khan London club hi a zawm chauh a, tun season hi bul a ṭanpuina hmasa ber a ni.

Sky Sports pundit Jamie Redknapp chuan, "Spurs player ṭhenkhat nen kan inkawm a, tun hma zawng aiin an inringtawk lehzual a ni," a ti a, Italian coach-in a player-teah hna ṭha tak a thawh thu a sawi.

Conte hian nipui transfer-ah Ivan Perišic, Fraser Forster, Yves Bissouma, Richarlison leh Djed Spence a lalut a, a duh ang ngei player ho a thawhpui theih tawh dawn avangin Italian coach hian nomawi a beisei ngam ang.

Chelsea-a a season hmasa bera Premier League nomawi chawitu Conte hian Stamford Bridge-a chhuahsan hnuah Inter Milan tan Serie A nomawi a chawi leh tawh a, Spurs-ah a hlawhtlinna chhunzawm a beisei dawn - chumi tur chuan team ṭha 'Chelsea' level hneh an zir phawt a ṭul.

Chelsea an ṭha

Conte hnuaia Spurs insiamṭhatna sawi hnawm theih a ni lo a, chutihrual chuan Chelsea ṭhatzia hi hai der chi a ni bik lo - Tuchel-a'n a duh angin nipui transfer-ah a team la thuam lo mah se tuna a neihsa pawh an ṭha tawk.

Chelsea tan pound maktaduai 62 man Marc Cucurella chu bul ṭan tura beisei a ni a, chuti a nih chuan Ben Chilwell a chawl hahdam ang a, Cucurella hian Reece James nen fullback hna an thawk ang.

Tlarhnungah captain César Azpilicueta hoin Silva leh Koulibaly an ding ang a, midfield-ah N'Golo Kanté leh Jorginho awmin, Sterling, Mount leh Havertz an awm thei bawk - chutihrual chuan match hmasa bera beisei phak lo Havertz aiah Armando Broja a lut thut thei bawk.

Chelsea tana bul ṭan thei player han thlir hian Spurs laka chak tur khawp team chu an nei tih a chiang a, mahni muala khel tur an ni bawk - Pathianni zan nghak phawt ila, engkim a chiang dawn e!

*La Liga kan nghak chhuak leh ta!*

13th August 2022

European league-a ngaihven hlawh pawl La Liga chu nizan khan khelh ṭan a ni leh ta a, Osasuna leh Sevilla te chuan zanlaiah match hmasa ber khelin result kan hre hman lo.

Khaw khat contractor bill la ang maia che na Barcelona chu zanin dar 12:30-ah hian an inlan dawn a, leiba tam tak nei chunga sum hman ṭhulh lo team hian Rayo Vallecano an mikhual ang.

UEFA Super Cup champion hlim Real Madrid erawh Pathianni zanah an inlan dawn chauh a, La Liga champion lai hian zan dar 1:30-ah Almeria an lenchilh dawn thung.

Atletico Madrid ṭantute erawhin karleh lam an nghah a la ngai a, Diego Simeone enkawl team hian Thawhṭanni zan dar 11:00-ah Getafe an lenchilh dawn a ni.

Barca buaina

Nipui transfer-ah Barcelona an che na a, Robert Lewandowski, Raphinha, Jules Kounde, Andreas Christensen, Franck Kessie leh Pablo Torre an lalut tawh a, an player lakluhte hi European club liante chil tiput tak tak vek an ni a, sum nei lo Barca-in an lalut hian mak tih a hlawh.

Hei chauh a ni lo - Catalan club hian Ousmane Dembele leh Sergi Roberto te chu contract thar an ziahpui bawk a, mahse, an sum hman dan leh lakluh a inrem loh avangin contract thar ziak leh player lakluh tharte hi he thu buatsaih a nih lai hian La Liga-ah an la ziak lut thei lo vek!

Barca hian television rights leh Barca Studios-a share an hralh ṭhen avangin sum an nei a, mahse, an sum lakluh leh an hman dan chu La Liga thlirna aṭangin a la inbuk tawk chuang lo.

La Liga lam hian Catalan club hi euro maktaduai 100 la mamawh belhah an ngai a, player an hralh a nih loh chuan Barca Studio-a an share 24.5% chu an hralh leh a ngaiin a rinawm.

Lewy tel loin?

Barca fan-ten an club jersey nena La Liga-a Lewandowski inlan lai hmuh an châk tawh a, mahse, a inlan loh a rinawm zawk. La Liga-ah hian inelna ṭan hma minute nga thleng player registration tih fel theih a ni.

Mahse, La Liga thuneitute chuan Barca hi a tawp thleng nghah an tum lo tih an hrilh niin sawi a ni a, hun a tep ter lutuk chuan document zawng zawng tifel vek tura an hmanhmawh loh tur thu Barca an hrilh.

Barca hian Barca Studios share 24.5% chu an hralh leh tawh nia sawi a ni a, mahse, La Liga lamin engmah an la hre lo thung. Ningani zan khan Barca board an ṭhukhawm a, a chinfelna tur an la nei lo niin an sawi.

Tuna a lan dan chuan zanin dar 12:30-ah Barca player tharte an la inlan theih hmel loh a, mahse, Catalan club hian Ferran Torres leh Pierre-Emerick Aubameyang te ho an neih sa avangin Rayo Vallecano laka chak turin squad an la nei ṭha tawk.

Real an phur

Champions League nomawi kawltu Real Madrid-in UEFA Super Cup-ah Eintracht Frankfurt chu 2-0 in an hneh a, an thiampuipa Karim Benzema-a'n goal a khung leh nghal bawk avangin an phur hle.

Hetihrual hian Vinicius Junior pawh season hmasa ang thoin a la hmuhnawm reng a, season hmasaa La Liga-a Real goal 69% kha Vinicius leh Benzema thawhchhuah a ni - Almeria tan anni ang player dan hi a awlsam lo ang.

Carlo Ancelotti-a'n tun season-a inelna an hmachhawn tur parukah champion vek an tum thu a sawi a, UEFA Super Cup an la phawt - Champions League, La Liga, Copa del Rey, Supercopa de España leh FIFA Club World Cup an la bak.

King Carlo ṭawngkam aṭangin Real an inringtawk tih a lang a, Pathianni zanah chak tura beisei an ni - fan-ten player thar Antonio Rüdiger leh midfielder Aurélien Tchouaméni an hmu châk tawh khawp ang. An hmachhawn tur Almería hi La Liga kai thar an ni a, season hmasa khan Segunda division-ah an champion - player 10 ngawt nipui transfer-ah an lalut tawh a, match hmasa bera tlawm nghal an tum bik dawn lo.

Spanish La Liga

Nizan Inkhel (Result kan hre hman lo)

Osasuna 12:30 AM Sevilla

Zanin Inkhel Tur

Celta Vigo 08:30 PM Espanyol

Real Valladolid 10:30 PM Villarreal

Barcelona 12:30 AM Rayo Vallecano

August 14, Pathianni Zan

Cadiz 09:00 PM Real Sociedad

Valencia 11:00 PM Girona

Almeria 01:30 AM Real Madrid

August 15, Thawhṭanni Zan

Athletic Bilbao 09:00 PM Real Mallorca

Getafe 11:00 PM Atletico Madrid

Real Betis 01:00 AM Elche

*Jesus nen kan in man dawn - Odegaard*

13th August 2022

Arsenal captain thar Martin Odegaard chuan an striker Gabriel Jesus nen an inkawp rem dawn tih a sawi a, nipui bazar laia Gunners zawm tharte chuan phurna nasa tak a siamsak thu a sawi tel bawk.

Premier League an match hmasa berah Mikel Arteta naute hian Crystal Palace an hneh. Palace lakah Jesus khel ṭha viau mah se goal a khung lo, midfielder Odegaard chuan, "Player thar zawng zawng ten thil kalhmang an hre vek tawh.

"Kan hnenah an rawn kal hma a, training pawh an nei pangngai hma hle. Gabriel Jesus pawhin team khelh dan a hre nghal, Palace lakah khan keimah nen tak hian kan in thlawp tam tawk lo deuh a, match lehpekah chuan a hma aiin hma kan sawn ngei ang," tiin a sawi.

Zanin dar 7:30 hian Emirates Stadium-ah Arsenal hian Leicester City an lo mikhual dawn, season hmasa khan Foxes hi si hnih fai ve ve in an hneh a, tun season bul an ṭan ṭhat bawk avangin zaninah pawh chak tura rinkai zawk an ni ang.

Palace an hmachhawn ṭum khan Jesus-a'n Odegaard tan ball ṭha bik a siamsak a, mahse Norway midfielder hian goal atan a chantir thei lo. An khelh dan phung inhre viau tawh mah se siam rem ngai leh hmasawn ngaihna lai chu a la tum.

Kum 23 mi Odegaard chuan, "Jesus hnen aṭanga ball ṭha tak a lo kal khan, ka lo dawngsawng fuh tawk lo, ball ka a kal lohna tur lamah ka ti lir hmasa hret a, a harsat phah ta a ni. Remchang a awm leh a nih chuan kha aia ṭha khan tih ngei ka tum ang," tiin a sawi.

*Gerrard leh Lampard intawng dawn*

13th August 2022

Steven Gerarrd nge Frank Lampard ṭha zawk? tih hi football khawvela zawhna kum hlun a ni a, English midfielder ropui pahnih hi an vanglaiin khaikhin an hlawh nasa a, vawiin thlengin a ropui zawk thlan a la harsa.

Player pahnihin inkhelh an chawlhsan hnuah coaching hna an thawk dun a, Gerrard-a'n Rangers tan Scottish Premiership nomawi a chawi tawh laiin Lampard erawh kut ruakin a la awm thung.

Vawiin tlai dar 5:00-ah footballer ropui ni ṭhin pahnih team enkawl an intawng dawn a, Gerrard-a enkawl Aston Villa chuan Lampard kaihhruai Everton an mikhual dawn - tuna zawhna chu, "Zaninah tu nge ropui zawk dawn?" tih hi a ni.

Kum 42 mi Gerrard hian November thla khan Villa hi a enkawl ṭan a, a league match hmasa parukah vawi li hnehna a chanpui avangin fak a hlawh hle. Mahse, season tawp lama an match hnuhnung 10-ah vawi hnih chiah a chakpui a, vawi nga an tlawm thung.

Gerrard hian Villa hi table-ah 14-na dinhmun luahpuiin, relegation zone hlatpui viau mah se Dean Smith bana Gerrard an lakluh khan Villa hian top 10-a awm an duh vang a ni pakhat a, English coach-in a hna a thawk ṭha tawk lo a tih theih.

Villa hian heti chung hian season ṭan dawnah Gerrard an thlawp a, season hmasaa loan-a an hawh, goal li leh assist vawi thum neitu Philippe Coutinho an lak nghehsak a, France international midfielder Boubacar Kamara chu Marseille aṭangin an lalut a, Sevilla defender Diego Carlos an lalut bawk.

Mahse, Villa hian tun season-a an match hmasa berah kai thar Bournemouth chu rin loh takin an ngam lo - Gerrard chuan he inkhelah hian a captain nihna a hlihsak, Villa fan-te atchilh rawn Tyrone Mings chu bul a ṭantir lo bawk.

Stevie G-a'n sawisel a hlawh ṭan a, 'Captain Fantastic' tih hming lem an pek ṭhin hian 'Coach Fantastic' tih hming lem nei tur chuan zaninah Everton hneh a mamawh - season bul ṭanna match hnihah a tlawm nghal chuan pressure a sang dawn.

Hetihlai hian Frank Lampard pawhin season bul a ṭan fuh bik lo - mahse, a ngam loh erawh Chelsea an ni a, kai thar team laka tlawm ai chuan a zia deuh!

January thla tawp lam khan Lampard hian Everton hi a enkawl ṭan a, a tir lama an talbuai hnuah, an match hnuhnung pakuaah vawi li an chak a, an hneh zingah Manchester United leh Chelsea an tel avangin Lampard-a hming chhe lutuk tur thairehin a awm a, Premier League khel chhunzawm turin an him bawk.

Everton hian nipui transfer-ah tawnhriat nei ṭha defender James Tarkowski leh Conor Coady an lalut a, Lille aṭanga Belgium midfielder Amadou Onana lak nan pound maktaduai 33 ngawt an seng a, Burnley aṭangin winger Dwight McNeil an lalut bawk.

Merseyside club lamin Lampard-a hoa season ṭha tak hman an beisei ang tih a chiang a, Chelsea legend tan Liverpool legend hneh a ngai - inkhel a hmuhnawm ang.

*Brentford hmachhawn tur Eriksen*

13th August 2022

Manchester United chuan zanin dar 10:00 hian Community Stadium-ah Brentford an tlawh dawn. Danish midfielder Christian Eriksen chu hun harsa a tawh laia amah ring ngamtu Brentford-ah kir dawn a, Bees jersey ha loin Manchester United jersey a ha thung ang.

Eriksen hian season liam ta khan Bees tan a khel a, a chet ṭhat zarah harsatna nei loin Premier League-ah an inhamtang. Danish midfielder Eriksen hian season chanve chauh contract a ziak a, nipui transfer-ah free transfer-in Man United a zawm.

Man United-in Brighton 2-1 a an hneh loh ṭumin Eriksen hi 'false nine' ah an hmang a, Bees lakah pawh hmun pawimawh a chan leh a rinawm. Tlarhmaah Anthony Martial chu hliam vangin a la khel thei lo a, season liam taa top scorer Cristiano Ronaldo chu bul ṭan thei dinhmunah a ding. Seagulls laka team anga Man United an khelh ṭhat loh avangin Erik Ten Hag-a'n starting eleven a siksawi ngei a rinawm.

Match hmasa berah Victor Lindelof chu squad-ah a awm lo a, Raphael Varane erawh mimala training a neih hnuah bench-ah a awm thung. Tlarhnungah captain Harry Maguire leh player thar Lisandro Martínez te an inkawp a, midfield-a inkawp McFred (Scott McTominay leh Fred) ten sawisel an hlawh avangin Martinez hi midifield-ah sawn hma a ni thei bawk.

Man United-in Seagulls an hneh hnuah chhawr theih tur player langsar an lakluh belh loh avangin danglamna lian tham hmuh a rinawm a, chutirhualin Bees lakah point thum hmu tura beisei an ni.

Brentford erawhin Euro 2020-a hming chher Mikkel Damsgaard chu Sampdoria aṭangin an lalut a, Danish striker hian training a zawm tawh avangin chhawr theih tura beisei a ni. Amaherawhchu document tih fel ngai a la awm avangin Damsgaard hi a la inlan lo thei bawk.

Bees hian season liam ta khan match hmasa berah Arsenal an hneh a, tun season-ah chakin bul ṭan lo mah se Leicester City laka 2-0 a an hnufual hnuah goal hnih khungin point khat hlu tak an hlawh chhuak. Striker rinrawl Ivan Toney-a'n match hmasa berah goal a khung a, tlarhnung phui lo Man United tan ven uluk a ṭul ang.

*Quarterfinal-ah Kyrgios a lut*

13th August 2022

Nick Kyrgios a che fuh chhunzawm zel a, nimin zing khan Alex de Minaur chu 6-2, 6-3 a hnehin Canadian Open quarterfinal a lut, a match hmasa zawkah world number 1 Daniil Medvedev a lo hneh tawh bawk.

Wimbledon finalist Kyrgios hian tun hnaiah a khel ṭha hle. Amah ang bawka Australian player Minaur lakah pawh a chungnung fal viau a, set hnih an khelh chhungin harsatna lian tham thawh a nei lo.

Seeded pawh chang phak lo, kum 27 mi Kyrgios hian a match lehpekah chuan Hubert Hurkacz a hmachhawn leh ang. Inkhel dangah Jack Draper leh Dan Evans te chuan quarterfinal an inhlangkai ve bawk.

*Opening match-ah Qatar Vs Ecuador*

13th August 2022

Football inelna lian FIFA World Cup chu ruahmanna hmasa aiin ni khatin an khel hma dawn. November 21-ah a thlengtu Qatar leh Ecuador ten match hmasa ber an khel ang, a tira ruahman dan chuan Senegal leh Netherlands te chu inkhel hmasa ber tur an ni.

South America khawmualpuia football thuneitu sang CONMEBOL aṭanga rawtna an hmuh angin FIFA chuan fixture hi a ngaihtuah nawn a, inkhel tur Qatar leh Ecuador te a biak bakah khawmualpui hrang hrang football thuneitu lamin an ngaihtuah hnuah thutlukna hi an siam.

Kumin hian a vawi khat nan thlasik laiin World Cup khelh a ni dawn. November 21 aṭanga khel ṭanin December 18-ah an zo ang. World Cup khelh hun sawn a nih avang hian European league liante pawhin an kalphung an tih danglam a ngai a ni.

*MIZBA-in Mizoram Fight Night a hriatpui*

13th August 2022

Mizoram chhunga boxing thuneitu sang ber Mizoram Boxing Association (MIZBA) chuan July August 9, 2022 khan thuchhuah siamin tun dinhmunah Mizoram Fight Night chauh inelna an hriatpui thu an sawi. Mizoram Fight Night hi Aizawl District Boxing Association leh Zonet te ṭangkawpin November thlaa an buatsaih tur a ni.

MIZBA chuan, "Mizoram chhungah leh pawnah Mizoram Boxing Association huaihawt emaw phalna loa Championship/Torunament/Fight Night etc buatsaih reng rengah Amatuer Boxer khel te leh R&J/ Official tel an awm a nih chuan Boxing Federation of India-ah report a ni ang a, National leh State level Championship/Tournament/Fight Night etc reng rengah an tel ve a phal a ni tawh lo ang," tiin an thuchhuahah hian an ziak tel bawk.

MIZBA C. thuchhuahah hian president Lalṭanpuia chuan hming a ziah hnan a ni.

*Transfer titi: Man United an la buai zel*

13th August 2022

Nipui transfer chu September 1, Ningani zanah a tawp dawn a, thil thleng thei a la ṭhahnem hle. Manchester United-in an duh khawp an lalut lo a, an neihsa an la chanbelh thei bawk.

Erik Ten Hag-a hote hian striker an mamawh a, Premier League striker vantlang zinga telh ṭhin Marko Arnautovic nen sawizawm an ni hial. Amaherawhchu club ṭantute lama duh lohna a nasat avang leh kum 33 mi Austrian forward khelh mekna Bologna lamin chhuah an phal loh avangin Man United an bawhzui ta lo.

Nimin khan Man United ṭantute tana thu hriat nuam loh a awm a, player pawimawh Marcus Rashford aiawhte chu Paris Saint-Germain nen an indawr. English club hian tlarhma tichak tura an mamawh player pahnih chu sawi loh pakhat pawh an lak theih loh laiin an neihsa hi chu an chhuah a rinawm lo a, chutihrualin PSG-in tlarhmaaah Kylian Mbappe, Lionel Messi leh Neymar bakah Mauro Icardi leh Hugo Ekitike te an neih avangin Rashford hi an mamawh niin a lang lo bawk.

Chutihrualin transfer hunlai chuan thil engpawh thleng thei a ni a, Rashford aiawhte leh PSG erawh an indawr ngei thung. French champion hian player thar erawh an nei hnai a, Spain international midfielder Fabián Ruíz chu Napoli aṭangin an lakluh a rinawm. Kum 26 mi Ruiz hian PSG nen hian mimal contract-ah inremna an nei tawh a, Napoli leh French champion hi an inrem theih a nih chuan kum nga daih contract a ziak ang.

Fabian Ruiz hi Man United nen pawh sawizawm a ni a, Frenkie de Jong an la thei lo a nih chuan Dutch midfielder aia an lak tur niin sawi a awm. Tunah erawh United hian Ruiz an la dawn lo tih chu a chiang titih tawh. Chutihrualin Man United hian Adrien Rabiot lakluh lam an hnaih zel.

Kum 27 mi Rabiot hi PSG aṭanga khawvel hriat a ni a, a nungchang vanga a nih tur ang thleng pha lo nia sawi a ni. Rabiot hi Juventus tan khel mekin Italian club hian hralh an duh a, euro maktaduai 17-in English club nen inremna an nei tawh. Nimin khan United sporting director John Murtough leh Rabiot-a nu leh agent ni bawk Veronique Rabiot te chu Turin-ah an indawr a, he thu i chhiar meuh chuan inremna an nei tawh hial ang.

*Pro Fight tel tum an ṭhahnem*

13th August 2022

Tata Yodha 4x4 LPS Pro Fight-a tel tum tan hming pek luhna hun August 20, Inrinni thleng hawn a ni a, Mizoram bakah ṭhenawm state Manipur leh Assam aṭangin boxer 140 chuangin hming an pe lut tawh.

Nimin tlai thlenga form theh lut tawh boxer 149 zingah Mizoram district hrang hrang aṭanga title chuh tum bakah, a duh apiang tel theih a nih angin ṭhenawm Assam leh Manipur state aṭanga tel tum an awm bawk.

Pro Fight hnuhnung ber 2019 khan Mizoram aṭangin champion lai nen boxer 194 an tel a; Arunachal Pradesh, Meghalaya, Manipur, Assam leh Sikkim aṭangin sawm bik 12 nen India hmar chhak state paruk aṭangin weight hrang pangaah boxer 206-in title an inchuh a ni.

Pro Fight tharah hian weight category panga tho ni mah se tel an tam ṭhin loh avangin middle leh lightheavy paih a ni. Mizo tamna feather leh welter telh ni ve thungin champion-in Rs 50,000 ṭheuh an dawng dawn a, lawmman pawisa fai Rs 5,50,000 sem chhuah a ni ang.

Covid-19 leng avangin kum hnih chhung mumal takin infiamna kalpui theih a ni lo a, kum thum chuang hnuah Pro Fight chhunzawm leh tura tih a nih rualin Mizo boxer-te inhnek theihna tur leh tihhmasawnna tura ruahman a ni tih organising committee chuan an sawi.

August 31-ah R. Dengṭhuama Indoor Stadium, Mualpuiah ṭan a ni dawn a, zanah vek inhnek huaihawt tura tih niin inhnek zan apiangin GIG Motors Fighter of the Night lawmman ṭha tawk tak sem a ni ang.

KT Enterprise chuan championship chhunga boxer ṭha ber hnenah lawmman hlu tham tak a pe dawn a, boxer mi mal lawmman dang leh referee leh judge ṭha ber lawmman a tum vek dawn bawk a ni.

RC Shirt House chuan official-te thawmhnaw tumsakin official shirt sponsor a ni leh dawn bawk a. Boxer-ten hma an sawn theihna tura Mizo sumdawngte inhawnna avangin organising committee a lawm hle a ni.

*Italian Serie A an khel ṭan dawn ta ; AC Milan elpui tur chu AS Roma?*

13th August 2022

Juvenus rorelna kha a tawp tawh a, indinthar leh mek an ni. Champion lai AC Milan tan Serie A nomawi humhim tur chuan elpui hautak an tam dawn. Old Lady leh Inter Milan an la ṭha reng - Jose Mourinho enkawl AS Roma pawh sawi bo a thiang dawn lo.

Zanin dar 10:00 hian tun season Serie A match hmasa ber an khel dawn. AC Milan chuan an khelmual hman thiam San Siro-ah Udinese an lo mikhual dawn, zanreiah an hmelma Inter Milan chu Lecce mualah an lenglut thung ang.

Pioli-a Milan

Ban an tum hman tawh, amah thlaktu tur pawh an biak fel hman kha a ni a, mahse coach Stefano Pioli hian season hmasa khan Milan chu Serie A nomawi a chawipui a, tunah chuan Milan hian a chhuak ang tih an hlau ru zek zek tawh zawk.

Player naupang rual tak tak a chher a, an karah tawnhriat nei ṭha an inzep bawk. Season hmasa lama a midfilder rinrawl Franck Kessie chuan Barcelona a pan san a, a hmunruak hnawh khah nghal chu a harsa mai thei.

Hliam vangin Zlatan Ibrahimovic chu kumin chhung an chhawr thei dawn lo, striker palian Oliver Giroud pawh a tihrawl hliam vangin a dinhmun a chiang lo, season hmasa league goal 11 khungtu a awm loh chuan Ante Rebic chungah mawhphurhna a sang ang.

Italian manager Pioli-a'n a duh a nih chuan Liverpool aṭanga a lakluh Divock Origi pawh chhawr tur a nei. Midfielder thar Charles De Ketelaere pawh a hmel kan hmuin a rinawm - Belgian player an neih thar pahnih hian Milan training an zawm pangngai tawh a ni.

Milan hian zanina an khingpui tur Udinese lakah record an nei ṭha. League match bika an intawn hnuhnung vawi 10-ah vawi khat chiah tlawm an nei, an tan chuan season thar khuhhawn nan chuan anni hmachhawn hi thil châkawm a ni ang.

Jose-a leh a naute

Tun hnaiah AS Roma boruak a lian thar. Jose Mourinho enkawl team hian season hmasa khan Europa Conference League nomawi an chawi - Roma tan European nomawi hmasa ber a ni a, inelna hi a vawi khatna ni mah se an ngaihlu hle.

Nipui bazar hun a ni a, Juventus tana contract hmang zo Paulo Dybala an lalut. Argentine forward hi Rome khawpui kawrthlerah tlangzarh a ni a, fans an pungkhawm ṭhahnem hem hem hle; Roma boruak nung tak ang kha an nei let mek.

Portuguese manager Mourinho chuan, "Roma ka enkawl chen tur ka sawi thei lo, a ṭul a nih chuan rei tak pawh ka cham mai ang. Club ruahmanna leh hmalak dan hi ka duhzawng tak a ni," tiin a sawi a, a enkawl lai club kalphungah a lungawi.

Season hmasa khan Mourinho hian Tammy Abraham a hmang thiam hle. English striker thlawp tur hian Dybala an neih bakah Lorenzo Pellegrini leh Nicolò Zaniolo ten an chawm thei dawn bawk, an hmatawng hi an hlauhawm dawn.

A kalna lamah chuan Mourinho-a'n nomawi a chawi deuh zel - Tottenham pawh League Cup final a luh pui, final erawh a enkawl hman ta lo. Nomawi chawi thiam a ni miau a, tun season-ah pawh Roma hian Serie A nomawi an chuh ngam ang.

Zanin Inkhel Tur

AC Milan 10:00 PM Udinese

Sampdoria 10:00 PM Atalanta

Lecce 12:15 AM Inter Milan

Monza 12:15 AM Torino

August 14, Pathianni

Fiorentina 10:00 PM Cremonese

Lazio 10:00 PM Bologna

Salernitana 12:15 AM Roma

Spezia 12:15 AM Empoli

August 15, Thawhtanni

Verona 10:00 PM Napoli

Juventus 12:15 AM Sassuolo

*Nottinghamshire-ah Premier League a kir dawn ta*

13th August 2022

Nottingham Forest-in kum 23 chhung Premier League an khelh loh hnuah tun season-ah an rawn inlan a, match hmasa berah Newcastle United chu St James Park-ah 2-0 in an hneh lo.

August 14, Pathianni zan dar 6:30-ah Forest hian Nottinghamshire-a an khelmual City Ground-ah West Ham United an mikhual dawn a, hun chhinchiahtlak bik a ni dawn.

Nottingham Forest hi football history-a sulhnu nei ṭha an ni pha a, manager ropui Brian Clough hoin kum 1979 leh 1980 khan European Cup-ah an champion. Clough ho hian 1977–78 season khan English top flight football-ah nomawi an chawi a, manager danglam bik a nihzia chu kum 2009-a film tihchhuah 'The Damned United' aṭang khan a chiang hle.

Forest ṭantu ruhkawl Dave Marples chuan, "Neutral fan-ten Brian Clough vangin duhsakna min hlan ṭhin a, hriat a nawm em avangin kan ngaithla kham ngai lo. Mahse hun lo takah Premier League aṭangin kan tla a, football kalhmang inthlak danglam hun lai tak a nih avangin insiamṭhat mai kan harsat a ni," tiin a sawi a, Premier League-a an let leh chu lawmawm a tih thu a sawi.

European Cup an champion ṭuma captain John McGovern chuan, "Kan chanchin hluiah kan cheng a, coach Steve Cooper tan pawh a harsa dawn. Mahse season liam ta khan Cooper hian a theihna a rawn lantir.

"Hun rei tak chhung kan khelmualah kan khingpui club ṭantuten hlimna an chang tawh a, kan duhthusam chu vawi khat tal Wembley Stadium-a inkhelh a ni. Tun hmaa kan thil tawn ang kha tawn leh hi kan châk.

"Tuna kan tawn tur erawh kan hre lo. Europe-ah hian season khat tal kan khel leh ang em? 'Nge League Cup final kan khel dawn. Chutihrualin Manchester City-in 6-0 in min sawp thei bawk. Engpawh chu ni se vawi thum vel tal chu hlimna tur nei ila kan ti hle a ni," tiin an duhthusam a sawi.

*Bayern-in Bundesliga an thunun dawn?*

13th August 2022

Bayern Munich-in Robert Lewandowski an chân a, season liam taa club top scorer tel lo hian Bavarians-in Eintracht Frankfurt chu 6-1 in an sawp. Julian Nagelsmann-a hote hneh Eintracht Frankfurt hi club satliah an ni lo a, season liam ta Europa League champion niin tun season-ah pawh Champions League an khel dawn.

Bayern-in match hmasa bera chiang taka hnehna an chan avangin tun season-ah pawh German football thunun leh tura ngaih an ni a, August 14, Pathianni zan dar 9:00-a Wolfsburg an mikhual hunah an dinhmun a chiang lehzual ang.

Bavarians-in Sadio Mane an lalut a, match hmasa berah Lewy awm loh a lang lo. Chutihrualin Lewy zunzama uai hrim hrim tan erawh Polish striker awm lo hi a kim lo thung.

Nagelsmann-a'n tlarhmaah Mane leh Serge Gnabry te a dah a, Jamal Musiala leh Thomas Muller ten an thlawp. Bayern formation hi 4-2-2-2 tia sawi theih a ni a, Marcel Sabitzer leh Joshua Kimmich te midfield-ah an inkawp.

Bavarians hian hliam vangin Leon Goretzka an chhawr rih thei dawn lo a, Sabitzer leh player thar Ryan Gravenberch ten chance an ngah theih phah dawn. Match hmasa berah hian Leroy Sane leh Kingsley Coman ten bul an la ṭan lo zawk a, Bayern tlarhma an rang ṭha dawn tih a chiang hle.

Bayern tana pawimawh ber erawh tlarhnung tih phui a ni a, match hmasa bera Dayot Upamecano khel ṭha chu Nagelsmann tan chanchin lawmawm a tling ang. Aphonso Davies, Lucas Hernandez, Upamecano leh Benjamin Pavard ten bul an ṭan a, Juventus aṭanga an lakluh centre back Matthijs de Ligt leh Ajax aṭanga an lakluh right back Noussair Mazraoui te tan hmun nghet chan a harsa dawn.

Zanin Inkhel Tur

Bayer Leverkusen 7:00 PM Augsburg

RB Leipzig 7:00 PM FC Cologne

Hoffenheim 7:00 PM Bochum

Hertha Berlin 7:00 PM Eintracht Frankfurt

Werder Bremen 7:00 PM Stuttgart

Schalke 04 10:00 PM Borussia M'gladbach

August 14, Pathianni

Mainz 7:00 PM Union Berlin

Bayern Munich 9:00 PM Wolfsburg

*Number 1 Swiatek a chak lo*

13th August 2022

Hmeichhe tennis world number 1 Iga Swiatek chu Canadian Open last 16-ah a chak lo. Nimin zing inkhelah Swiatek hian Brazil nula Beatriz Haddad Maia chu 6-4, 3-6, 7-5 in a ngam lo a, quarterfinal lut zo loin a zinkawng a tawp.

Set hmasa berah Swiatek hian double fault a neih avangin a khingpui hi hma a hruai tir a, set a hloh zui bawk. Set hnihnaah tho chhuak thei mah se, a hnuhnung berah Maia-i a che na leh zawk a, inkhel hmuhnawmah a dingchang.

Kum 26 mi Maia chuan, "Ka match hmasa ber aṭanga khan harsa ka ti nghal. Swiatek ka hmachhawn dawn tih ka hriat phei kha chuan rilru a hah duh hle. Amaherawhchu ka rilru ka ti zângkhai lui a, nuam ti takin ka khel tawp mai a ni," a ti.

Brazil nula hian a match lehpekah chuan Belinda Bencic a tum leh dawn. Tokyo Olympic champion Bencic hian Serena Williams a hneh hnuah, world number 1 hlui leh seeded pariatna ni bawk Garbine Muguruza a paltlang leh tawh.

French Open champion Swiatek hian season tir lam a hmang ṭha, a zawnin match 37 zet a chak a nih kha. Mahse, thla hmasaa khelh Wimbledon third round-ah a chak lo a, a hnu lamah pawh beisei angin a la hlawhtling zui leh thei rih lo.

Wimbledon champion Elena Rybakina a hneh hnuah Coco Gauff a la chak zel. American tleirawl hian seeded parukna Aryna Sabalenka chu 7-5, 4-6, 7-6(4) in a hneh. Inkhel dangah Simona Halep chuan Jil Teichmann 6-2, 7-5 in a hneh bawk.

*Messi leh Neymar kiangah Mbappe a khel thei - PSG coach*

13th August 2022

Zanin dar 12:30 hian Paris Saint-Germain chuan Montpellier an mikhual dawn. Coach thar Christophe Galtier kaihhruaina hnuaiah an khelmual Le Parc des Princes-a league match an khelh hmasak ber tur a ni.

PSG coach Galtier chuan Paris khawpuia an inkhel tur chu a boruak a nuam hle tih a sawi a, tun kar chhunga training an neih danah tlarhma lama a player ṭha Lionel Messi, Neymar leh Kylian Mbappe te inman takin an inkawp thei tih a sawi chhuak.

Hliam vangin Mbappe hian pre season a hmang ṭha tawk lo, an league match hmasa berah pawh a khel lo. Messi leh Neymar erawhin inbuatsaihna an nei ṭha a, league match-ah pawh goal leh assist an nei nghal mawlh mawlh.

Galtier chuan, "Tun kar chu thil tam tak kan zir chhuak. Neymar leh Messi te chu pre season aṭang khan a nih dan turin an inkawp thei nghal mai a, inelna takah pawh ka duh leh beisei angin an khel chhuak nghal.

"Kylian pawhin ṭha takin training a nei leh tawh, anni pathum hi chu season hmasa lama inhre sa tawh an ni a, hun rei lote chhungin an ṭhat dan takin an khel chhuak thei ang. Player ṭha tan chuan a ṭha ve dangte bula khelh chu duhthusam a ni," tiin a sawi.

Barcelona captain Messi-a'n season hmasa khan PSG tan beisei a phak lo. Tun season-ah erawh bul a ṭan ṭha, match hmasa berah goal hnih a khung bakah assist a nei nghal - zaninah pawh Argentine forward lak aṭangin goal kan hmuh leh a beiseiawm.

PSG coach Galtier chuan, "Leo chet dan khan min barakhaih lem lo, a chhan chu ni tina a training hmutu ka nih vang a ni. Hlim hmel a pu thei reng a, nuam ti takin training hun a hmang ṭhin. A ṭhiante a kawmngeih em em a, midang tana entawk tlakin a awm.

"Messi a nuih chuan kan team kan nui a ni mai a, a hma lama ka sawi tawh ang khan ani hi chu PSG tan mi bik a ni a, ani ka enkawl thei hi nihlawh ka inti hle," tiin a sawi a, a forward lakah beisei a nei sang hle bawk.

Zanin Inkhel Tur

AS Monaco 08:30 PM Rennes

PSG 12:30 AM Montpellier

August 14, Pathianni

Lorient 4:30 PM Lyon

Ajaccio 6:30 PM Lens

Auxerre 6:30 PM Angers

Reims 6:30 PM Clermont

Troyes 6:30 PM Toulouse

Nice 8:35 PM Strasbourg

Brest 12:15 AM Marseille

*City-in ka duh an hria - Silva*

13th August 2022

Manchester City midfielder Bernardo Silva chu Barcelona nen sawizawm an ni a, chhuak thei dinhmunah a ding. Kar liam ta khan Pep Guardiola chuan Silva hian chhuah a duh chuan a dan loh tur thu a sawi bawk.

Amaherawhchu City hian Bernardo Silva manah hian pound maktaduai 80 ($97 million) an beisei a, Barcelona tan Portuguese midfielder lalut tur chuan player ṭhahnem tak an chhuahtir a ṭul dawn. Tuna Catalan club sum dinhmun thlir phei chuan thil theih loh ang hial a ni.

Silva chuan, "Club nena kan inkar boruak a ṭha a, thil nihna dik tak kan inhrilh tawn. Ka cham a nih chuan rilru hlim tak leh club zahna nen ka theihna zawng zawng ka chhuah chhunzawm ang a, ka chhuak ta a nih pawhin football nih phung kan ti tawh mai ang," tiin a sawi a, club-in a duh an hriat thu a sawi bawk.

Man City hian Raheem Sterling, Oleksandr Zinchenko, Gabriel Jesus leh Fernandinho te an chân a, rintlak player an lakluh chu Erling Haaland leh Kalvin Phillips te chauh an la ni.

Chutihrualin Haaland hian match hmasa berah goal hnih a khung nghal a, zanin dar 7:30-a Bournemouth an mikhual hunah pawh Norwegian striker hian en bik a hlawh ang.

*Veng/Khua U17 Football Tournament*

13th August 2022

Aizawl DFA chuan Aizawl District huam chhung tan Joseph Construction Under 17 Football Tournament a buatsaih dawn a; Veng/khua, Football Club, GSA, Zone FA leh School hmingtein chhuah theih a ni.

Entry fee hi Rs 1,000 a ni a, August 20, 2022 thleng Y2Goal, Chanmari & M-28, Bazar Bungkawn (Mama Dawr) ah a pek theih ang.

Competition Regulations hi ADFA Facebook page https://www.facebook.com/ADFA ah download theiha chhawpchhuah a ni a, phone number 9862387738, 9862647664, 9862491700 ah te hian zawhfiah theih a ni.

_ _ _ _ _ _ _ _ _ v _ _ _ _ _ _ _ _ _ _